រាជធានីភ្នំពេញ ៖ ឌុម កែវដា មកពីក្លិបមកុដរាជសីហ៍ និងឃីម ឌីម៉ា មកពីក្លិបរស្មីភូមិគាបខេត្តបន្ទាយមានជ័យ មិនទាន់ដឹងថា អាចរកបាន៣ពិន្ទុបន្ថែមទៀតឬអត់ទេពេលជួបកីឡាករថៃក្នុងវគ្គជម្រុះវិលជុំឈានទៅ
រាជធានីភ្នំពេញ ៖ ឌុម កែវដា មកពីក្លិបមកុដរាជសីហ៍ និងឃីម ឌីម៉ា មកពីក្លិបរស្មីភូមិគាបខេត្តបន្ទាយមានជ័យ មិនទាន់ដឹងថា អាចរកបាន៣ពិន្ទុបន្ថែមទៀតឬអត់ទេពេលជួបកីឡាករថៃក្នុងវគ្គជម្រុះវិលជុំឈានទៅដណ្ដើមខ្សែក្រវាត់គោជល់រដូវកាលទី៧ក្នុងប្រភេទទម្ងន់៦៣,៥គីឡូក្រាម នៅលើសង្វៀនទូរទស្សន៍ស៊ីអិនស៊ីថ្ងៃសៅរ៍ទី៨ មេសា ខាងមុខនេះ ។
ឌុម កែវដា ដែលឈ្នះមួយប្រកួតរួចមកហើយនោះត្រូវជួបកីឡាករថៃឈ្មោះហ្វានិមិត្ត វិរិយៈហ្វាម ដែលចាញ់មួយប្រកួតក្នុងជុំទី១ ហើយបើសិនជាចាញ់លើកនេះទៀតប្រហែលជាពិបាកឆ្លងទៅវគ្គបន្តទៀតណាស់ ។ ចំណែកឌុម កែវ ដាវិញ បើយកឈ្នះត្រឹមពិន្ទុក៏មិនប្រាកដថាអាចឡើងទៅវគ្គបន្តទៀតបានដែរ ព្រោះក្នុងពូលកម្ពុជាមានសេក គឹមរួន មកពីក្លិបអង្គរមានជ័យខេត្តសៀមរាបម្នាក់ដែលមានពិន្ទុខ្ពស់ជាងគេដោយសារតែគេបានយកឈ្នះកីឡាករថៃ ដោយវាយឱ្យសន្លប់នៅក្នុងទឹកទី៣ កាលពីសប្ដាហ៍មុន ។
ចំណែកឃីម ឌីម៉ា មកពីក្លិបមោងឫស្សីមរតកគុនខ្មែរក៏ឈ្នះមួយប្រកួតដូចឌុម កែវដា ដែរ លើកនេះគេត្រូវជួបប្រកួតជាមួយកីឡាករថៃឈ្មោះមុងឃុនភេត ណាយ៉ាប៉ៈវិរៈ ដែលបានចាញ់មួយប្រកួតរួចមកហើយដែរ ។ ដូច្នេះឃីម ឌីម៉ាប្រកួតលើកនេះត្រូវធ្វើយ៉ាងណាវាយគូប្រកួតឱ្យសន្លប់ក្នុងទឹកទី១ឬទី២ ទើបបាន បើមិនអញ្ចឹងទេឱកាសឆ្លងទៅវគ្គបន្តពិតជាពិបាកសង្ឃឹម ។
ក្រៅពីគូដណ្ដើមខ្សែក្រវាត់នៅលើសង្វៀនដដែលក៏មានការប្រកួតលក្ខណៈមិត្តភាពជាតិនិងអន្តរជាតិពីរគូទៀតដែរ ។ កីឡាករ យ៉េន ឌីណា មកពីសមាគមកីឡាប្រដាល់ក្រសួងកសិកម្ម ត្រូវបានផ្គូផ្គងឱ្យជួបប្រកួតជាមួយកីឡាករថៃឈ្មោះ ភិតផ្សាក់ ភិតសូរ៉ាត់ ក្នុងប្រភេទទម្ងន់៦០គីឡូក្រាម និងកីឡាករ រ៉ែម រាជ មកពីក្លិបអង្គរមានជ័យខេត្តសៀមរាប ប្រកួតជាមួយកីឡាករ ឡុង ជិន មកពីក្លិបខ្លារខិនមានឫទ្ធិ ៕
ចែករំលែកព័តមាននេះ