គិតត្រឹមថ្ងៃទី២៤ នៃសប្តាហ៍ចុងក្រោយនៃខែតុលា ឆ្នាំ២០២២នេះ អាកាសធាតុនៅខេត្តមណ្ឌលគិរី ចាប់ផ្ដើមធ្លាក់ខ្យល់ត្រជាក់ហើយ ដែលស្ថានភាពបែបនេះ ហាក់ខុសប្លែកពីឆ្នាំមុនបន្តិច ព្រោះនៅឆ្នាំ២០២១ អំឡុងខែវិច្ឆិកា ទើបអាកាសធាតុខេត្តមណ្ឌលគិរី ចុះត្រជាក់ធ្លាក់ខ្យល់រងារ តែសម្រាប់ឆ្នាំ២០២២នេះ
ខេត្តមណ្ឌលគិរី ៖ គិតត្រឹមថ្ងៃទី២៤ នៃសប្តាហ៍ចុងក្រោយនៃខែតុលា ឆ្នាំ២០២២នេះ អាកាសធាតុនៅខេត្តមណ្ឌលគិរី ចាប់ផ្ដើមធ្លាក់ខ្យល់ត្រជាក់ហើយ ដែលស្ថានភាពបែបនេះ ហាក់ខុសប្លែកពីឆ្នាំមុនបន្តិច ព្រោះនៅឆ្នាំ២០២១ អំឡុងខែវិច្ឆិកា ទើបអាកាសធាតុខេត្តមណ្ឌលគិរី ចុះត្រជាក់ធ្លាក់ខ្យល់រងារ តែសម្រាប់ឆ្នាំ២០២២នេះ សីតុណ្ហភាពបានធ្លាក់ចុះបន្តិចម្ដងៗចាប់តាំងពីដើមខែតុលាតែម្តង ហើយមេឃនៅតែបង្អុរទឹកភ្លៀងជាញឹកញាប់ ។
គេសង្កេតឃើញថា នៅក្រុងសែនមនោរម្យ ចាប់ផ្ដើមធ្លាក់ខ្យល់ខ្លាំងលាយឡំដោយសីតុណ្ហភាពត្រជាក់នៅប៉ុន្មានថ្ងៃចុងក្រោយ នេះដែលធ្វើឲ្យប្រជាពលរដ្ឋក្នុងខេត្ត ចាប់ផ្ដើមប្រើប្រាស់អាវរងារឡើងវិញ ដើម្បីថែទាំសុខភាពពីផលប៉ះពាល់ នៃការធ្លាក់ចុះនៃស្ថានភាពត្រជាក់នេះ។
ប្រជាពលរដ្ឋរស់នៅក្រុងសែនមនោរម្យ ខេត្តមណ្ឌលគិរីផ្ទាល់តែម្ដង បានឲ្យដឹងថា ជាទូទៅនៅរដូវរងារ គឺពួកគាត់ និងក្រុមគ្រួសារតែងតែត្រៀមសម្លៀកបំពាក់ក្រាស់ៗ ដើម្បីទប់ទល់ជាមួយភាពត្រជាក់ ប៉ុន្តែទោះជាយ៉ាងនេះក្ដី ឲ្យតែរដូវរងារចូលមកដល់ មិនថាតែក្មេងតូចៗទេ សូម្បីតែមនុស្សចាស់ ក៏តែងតែឈឺស្ទើររៀងរាល់ឆ្នាំ ដោយមានអាការៈក្អក ផ្ដាសាយជាដើម តែមិនធ្ងន់ធ្ងរអីទេ។
ប្រជាពលរដ្ឋបាននិយាយថា រដូវរងារសម្រាប់ខេត្តមណ្ឌលគិរីឆ្នាំនេះ ហាក់ចុះត្រជាក់លឿនជាងឆ្នាំមុនៗ ប៉ុន្តែមិនត្រជាក់ខ្លាំងពេកទេ នៅអាចទ្រាំបាន។ ពួកគាត់បានរម្លឹកថា កាលពីអំឡុង១០ ឬ២០ឆ្នាំមុន ខេត្តមណ្ឌលគិរីមានភាពត្រជាក់ រងារខ្លាំងណាស់ ដោយកាលនោះគឺចុះត្រជាក់រហូតសម្រាកមិនបាន ទោះដណ្ដប់ភួយប៉ុន្មានជាន់ក៏ដោយ ។
សូមបញ្ជាក់ផងដែរថា សម្រាប់ខេត្តមណ្ឌលគិរី ជាពិសេសក្រុងសែនមនោរម្យ ទោះបីរដូវរងារបានចូលមកដល់លឿនជាងឆ្នាំមុនបន្តិចមែន ប៉ុន្តែស្ថានភាពអាកាសធាតុ មិនទាន់ត្រជាក់ខ្លាំងនោះឡើយ ដោយសីតុណ្ហភាពនៅត្រឹម១៨ទៅ២០អង្សារនៅពេលព្រឹក ដោយនេះជាកម្រិតសីតុណ្ហភាពមួយ មិនត្រជាក់ខ្លាំងសម្រាប់ក្រុងសែនមនោរម្យទេ ព្រោះជាទូទៅនៅអំឡុងខែធ្នូ ឬខែមករា បរិយាកាសត្រជាក់អាចធ្លាក់ចុះក្រោម១៥អង្សារទៅទៀត ។
ទន្ទឹមនឹងនេះដែរ ចំពោះរដូវរងារនៅខេត្តមណ្ឌលគិរី នឹងអូសបន្លាយប្រហែល៣ទៅ៤ខែ គិតចាប់ពីតុលា រហូតដល់ខែមករា ឬអាចដល់ខែកុម្ភៈ ដែលអំឡុងពេលប៉ុន្មានខែនេះ អ្នកទេសចរមកកម្សាន្តនៅខេត្តមណ្ឌលគិរី ពិតជាបានស្គាល់នូវបរិយាកាសត្រជាក់ខុសប្លែងពីតំបន់ផ្សេង ចំណែកទេសភាពវិញនោះ វាលស្មៅគ្របដណ្ដប់តាមកំពូលភ្នំ ក៏នឹងប្រែទៅជាពណ៌មាសផងដែរ៕
ចែករំលែកព័តមាននេះ