រាជធានីភ្នំពេញ ៖ រដ្ឋមន្ត្រីក្រសួងពាណិជ្ជកម្មអះអាងថា កម្ពុជាអនុវត្តកាតព្វកិច្ចបានជាង៤០%សម្រាប់បញ្ញត្តិផ្នែក A នៃកិច្ចព្រមព្រៀងសម្រួលពាណិជ្ជកម្ម (FTA) របស់អង្គការពាណិជ្ជកម្មពិភពលោក ខណៈបញ្ញត្តិផ្នែក B និង C ផ្តោតលើការងារកំណែទម្រង់អាទិភាព នឹងត្រូវជូនដំណឹងទៅកាន់អង្គការ WTO ដើម្បីកៀរគរជំនួយបច្ចេកទេសនាពេលខាងមុខ ។
ថ្លែងក្នុងសិក្ខាសាលាស្តីពីការអនុវត្តកិច្ចព្រមព្រៀងសម្រួលពាណិជ្ជកម្មរបស់អង្គការពាណិជ្ជកម្មពិភពលោក នៅសណ្ឋាគារឡឺរ៉ូយ៉ាល់កាលពីថ្ងៃទី៤ មេសា រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ មានប្រសាសន៍ថា កិច្ចព្រមព្រៀងសម្រួលពាណិជ្ជកម្មបានចូលជាធរមាននៅថ្ងៃទី២២ ខែកុម្ភៈ ឆ្នាំ២០១៧ ក្រោមការផ្តល់សច្ចាប័នចំនួន១១២ ស្មើនឹង២ភាគ៣ ក្នុងចំណោមសមាជិក១៦៤ប្រទេសនៃអង្គការ WTO ។
លោក ប៉ាន សូរស័ក្តិ បញ្ជាក់ថា ៖ « កិច្ចព្រមព្រៀងសម្រួលពាណិជ្ជកម្ម គឺជានីតិវិធីថ្មីទាក់ទងនឹងព្រំដែន វិធីសាស្ត្រ និងកាតព្វកិច្ចដែលតម្រូវឲ្យរាជរដ្ឋាភិបាលអនុវត្ត។ កិច្ចព្រមព្រៀងនេះផ្តល់នូវតម្លាភាពផ្នែកច្បាប់ វិធាន និងនីតិវិធី ព្រមទាំងសមភាពក្នុងការសម្រេចចិត្តរបស់ភ្នាក់ងារតាមព្រំដែន សម្រួលការបំពេញបែបបទគយ និងកាត់បន្ថយឧបសគ្គរដ្ឋបាលសម្រាប់ការដឹកទំនិញឆ្លងកាត់ » ។
លោករដ្ឋមន្ត្រីបន្តថា ៖ « ការអនុវត្តកិច្ចព្រមព្រៀងសម្រួលពាណិជ្ជកម្ម នឹងកាត់បន្ថយចំណាយលើពាណិជ្ជកម្មសកលជាមធ្យមប្រហែល១៤,៣% ក្នុងនោះប្រទេសកំពុងអភិវឌ្ឍន៍ និងអភិវឌ្ឍន៍តិចតួចនឹងទទួលបានផលប្រយោជន៍ច្រើនពីការអនុវត្តពេញលេញនៃកិច្ចព្រមព្រៀងនេះ ដោយសារប្រទេសទាំងនោះបានចំណាយខ្ពស់លើការធ្វើពាណិជ្ជកម្ម » ។
គួររំឭកដែរថា កម្ពុជាបានក្លាយជាប្រទេសអភិវឌ្ឍន៍តិចតួចទី៨ និងសមាជិកទី៦៩របស់អង្គការ WTO ដែលបានផ្តល់សច្ចាប័នលើពិធីសារនៃវិសោធនកម្ម FTA កាលពីថ្ងៃទី១៦ ធ្នូ ២០១៥ ។ ការផ្តល់សច្ចាប័ននេះ បានបង្ហាញពីការបេ្តជ្ញាចិត្តរបស់រាជរដ្ឋាភិបាល ក្នុងការជំរុញកិច្ចសម្រួលពាណិជ្ជកម្មទាំងនៅថ្នាក់តំបន់ និងសកលលោក តាមរយៈការស្វែងរកវិធីពន្លឿនការដឹកទំនិញ ការបញ្ចេញទំនិញ និងការសម្រួលបែបបទគយ ព្រមទាំងការដឹកទំនិញឆ្លងកាត់ព្រំដែន ៕
ចែករំលែកព័តមាននេះ