បក្សប្រឆាំងដកថយ ព្រមដកពាក្យស្លោកជាផ្លូវការ និងក្បាលម៉ាស៊ីនបក្សរក្សានៅដដែល
រាជធានីភ្នំពេញ ៖ លោក កឹម សុខាប្រធានគណបក្សសង្គ្រោះជាតិ បានផ្ញើលិខិតចំនួនពីរច្បាប់ផ្សេងគ្នាទៅសម្តេចក្រឡាហោម ស ខេង ឧបនាយករដ្ឋមន្ត្រី
រាជធានីភ្នំពេញ ៖ លោក កឹម សុខាប្រធានគណបក្សសង្គ្រោះជាតិ បានផ្ញើលិខិតចំនួនពីរច្បាប់ផ្សេងគ្នាទៅសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ អំពីការសម្រេចដកចំណងជើងគោលនយោបាយជា អាទិភាពទាំង៥ចំណុចដែលបានបង្កភាពចម្រូងចម្រាសគឺ «ដូរមេឃុំបម្រើបក្សដាក់មេឃុំបម្រើរាស្ដ្រ» កាលពីពេលថ្មីៗកន្លងមកនេះ។
យោងតាមលិខិតរបស់លោក កឹម សុខា បានលើកយកកម្មវត្ថុស្តីពីការជូនដំណឹងការដកចំណងជើងចេញពីគោលនយោបាយអាទិភាព៥ចំណុច សម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៤ ឆ្នាំ២០១៧ ។
លោកបញ្ជាក់ថា ៖ «យោងតាមមាត្រា ២៦ថ្មីនៃច្បាប់ស្តីពីវិសោធនកម្មច្បាប់ស្តីពីគណបក្សនយោបាយលិខិតជូនដំណឹងរបស់ក្រសួងមហាផ្ទៃចុះថ្ងៃទី២២ ខែមីនា ឆ្នាំ២០១៧ និងលិខិតលេខ៥៧២នោះ ខ្ញុំសូមជម្រាបជូនសម្តេចក្រឡាហោមនូវសេចក្តីសម្រេចដាក់នូវចំណងជើង «ដូរមេឃុំបម្រើបក្ស ដាក់មេឃុំបម្រើរាស្ត្រ» ចេញពីគោលនយោបាយអាទិភាព៥ចំណុចរបស់គណបក្សសង្គ្រោះជាតិ សម្រាប់ការបោះឆ្នោត ឃុំ សង្កាត់ អាណត្តិទី៤ ឆ្នាំ២០១៧ខាងមុខនេះ» ។
លោកថា គោលនយោបាយអាទិភាព៥ចំណុចរបស់គណបក្សសង្គ្រោះជាតិសម្រាប់ការបោះឆ្នោតជ្រើសរើសឃុំ សង្កាត់ អាណត្តិទី៤មាន ៖
១-ពង្រឹងសិទ្ធិអំណាចប្រជាពលរដ្ឋ
២-លើកកម្ពស់ជីវភាពប្រជាពលរដ្ឋ និងការអភិវឌ្ឍ
៣-សេវាសាធារណៈ
៤-សន្តិសុខ
៥-វិមជ្ឈការ (គោលនយោបាយថ្នាក់ជាតិសម្រាប់ឃុំសង្កាត់) ។
ចំណែកលិខិតមួយច្បាប់ទៀតរបស់លោក កឹម សុខា ក៏បានឲ្យដឹងពីសមាសភាពក្បាលម៉ាស៊ីនថ្មី ដែលគណៈកម្មាធិការនាយកគណបក្សបានសម្រេចជាថ្មីផងដែរ ។
លោកបានបញ្ជាក់ថា៖ «ខ្ញុំសូមជម្រាបសម្តេចក្រឡាហោមមេត្តាជ្រាបថា គណៈកម្មាធិការនាយកគណបក្សសង្គ្រោះជាតិ បានបើកកិច្ចប្រជុំនៅរសៀលថ្ងៃទី២ ខែមេសា ឆ្នាំ២០១៧ ហើយបានសម្តែងការអបអរសាទរជាថ្មីម្តងទៀតដល់រូបខ្ញុំជាប្រធានគណបក្សសង្គ្រោះជាតិ រហូតដល់ចប់អាណត្តិជំនួសលោក សម រង្ស៊ី ដែលបានលាឈប់ពីប្រធានបក្ស ស្របតាមប្រការ៤៧ថ្មីនៃលក្ខន្តិកៈគណបក្ស គណៈកម្មាធិការនាយកបានសម្រេចជាឯកច្ឆ័ន្ទនៃសមាជិកវត្តមានផ្តល់ការគាំទ្រជាថ្មីម្តងទៀតដល់សមាសភាពអនុប្រធានគណបក្ស គឺលោក ប៉ុល ហំម លោកស្រី មូរ សុខហួរ និងលោក អេង ឆៃអ៊ាង ស្របតាមប្រការ៤៧ថ្មី នៃលក្ខន្តិកៈគណបក្ស» ។
លោកបន្ថែមថា សមាសភាពប្រធាន និងអនុប្រធានគណបក្សសង្គ្រោះជាតិមានដូចជា ៖
១-លោក កឹម សុខា ជាប្រធានគណបក្ស
២-លោក ប៉ុល ហំម ជាអនុប្រធាន
៣-លោកស្រី មូរ សុខហួរ ជាអនុប្រធាន
៤-លោក អេង ឆៃអ៊ាង ជាអនុប្រធាន
យ៉ាងណាក្តីការផ្ញើលិខិតរបស់មេបក្សប្រឆាំងធ្វើឡើងបន្ទាប់ពីក្រសួងមហាផ្ទៃបានលើកឡើងថា ការធ្វើសមាជវិសាមញ្ញកាលពីថ្ងៃទី២ ខែមីនា ដើម្បីជ្រើសរើសក្បាលម៉ាស៊ីនថ្មីកន្លងមកនោះគឺខុសនឹងលក្ខន្តិកៈគណបក្សរបស់ខ្លួន ហើយថានឹងមានវិធានការចំពោះគណបក្សសង្គ្រោះជាតិ ប្រសិនបើមិនគោរពតាម ។
សម្រាប់លិខិតរបស់គណបក្សសង្គ្រោះជាតិដែលដាក់ទៅកាន់ក្រសួងមហាផ្ទៃនោះ មិនទាន់មានការឆ្លើយតបយ៉ាងណាពីក្រសួងនោះទេ រហូតមកដល់ពេលនេះ ៕
ចែករំលែកព័តមាននេះ