រាជធានីភ្នំពេញ ៖ ក្រសួងធនធានទឹក និងឧតុនិយមបានបញ្ជាក់ថាចាប់ពីថ្ងៃទី២៦ តុលា ដល់០១ វិច្ឆិកាខាងមុខនេះ តំបន់ខ្លះរបស់ប្រទេសកម្ពុជានឹងមានភ្លៀងធ្លាក់ពីតិចទៅមធ្យមលាយឡំបាតុផ្គរ រន្ទះ ។
យោងតាមសេចក្តីជូនដំណឹងស្ដីពីស្ថានភាពធាតុអាកាសរបស់ក្រសួងធនធានទឹក ចាប់ពីថ្ងៃទី២៦ ខែតុលា ដល់ថ្ងៃទី០១ ខែវិច្ឆិកា ឆ្នាំ២០២២ នៅថ្ងៃទី២៥ តុលា ឆ្នាំ២០២២បានលើកឡើងថា ទ្រនុងសម្ពាធខ្ពស់ពីភាគខាងជើង (ប្រទេសចិន) បានលាតសន្ធឹងចុះមកក្រោមលើប្រទេសកម្ពុជាប្រសព្វ និងសម្ពាធទាបពីសមុទ្រចិនខាងត្បូង ។
ទន្ទឹមនោះខ្យល់ក៏បានប្តូរទិសជាបណ្តើរៗ។ ក្រសួងបានលើកឡើងថាលក្ខណបែបនេះនឹងធ្វើឲ្យតំបន់ទំនាបកណ្តាលសីតុណ្ហភាពអប្បបរមា មានពី២២-២៤ អង្សាសេ និងសីតុណ្ហភាពអតិបរមាមានពី២៩-៣១ អង្សាសេបណ្តាខេត្ត-រាជធានី ផ្នែកខាងក្រោមនឹងអាចមានភ្លៀងក្នុងកម្រិតពីតិចទៅមធ្យមក្នុងនោះផ្នែកខ្លះអាចមានភ្លៀងធ្លាក់បង្គួរដោយអន្លើរលាយឡំទៅដោយផ្គររន្ទះ។
ចំណែកតំបន់ខ្ពង់រាប មាន សីតុណ្ហភាពអប្បបរមា មានពី ២១-២៣ អង្សាសេ និងសីតុណ្ហភាពអតិបរមា មានពី ២៩-៣១ អង្សាសេ នឹងអាចមានភ្លៀងក្នុងកម្រិតពីខ្សោយទៅមធ្យមលាយឡំទៅដោយផ្គរ រន្ទះ ។
ដោយឡែកតំបន់មាត់សមុទ្រមានសីតុណ្ហភាពអប្បបរមា មានពី ២២-២៤ អង្សាសេសីតុណ្ហភាពអតិបរមា មានពី ២៩-៣១ អង្សាសេនឹងអាចមានភ្លៀងក្នុងកម្រិតពីខ្សោយទៅមធ្យមលាយឡំទៅដោយផ្គរ រន្ទះ ៕
ចែករំលែកព័តមាននេះ