រាជធានីភ្នំពេញ ៖ ប្រៃសណីយ៍កម្ពុជា ដែលស្ថិតនៅក្រោមក្រសួងប្រៃសណីយ៍ និងទូរគមនាគមន៍ ដែលមានតួនាទីជាអ្នកផ្ដល់សេវាសាធារណៈដល់ប្រជាពលរដ្ឋទៅលើបញ្ញើ និងការដឹកជញ្ជូន បានឲ្យដឹងថា
រាជធានីភ្នំពេញ ៖ ប្រៃសណីយ៍កម្ពុជា ដែលស្ថិតនៅក្រោមក្រសួងប្រៃសណីយ៍ និងទូរគមនាគមន៍ ដែលមានតួនាទីជាអ្នកផ្ដល់សេវាសាធារណៈដល់ប្រជាពលរដ្ឋទៅលើបញ្ញើ និងការដឹកជញ្ជូន បានឲ្យដឹងថា ក្នុងឆ្នាំ២០១៦កន្លងទៅ ខ្លួនរកចំណូលសរុបបានចំនួន៩.៤៧៦.២០៧ដុល្លារអាមេរិក លើសផែនការគ្រោងទុកដែលធ្លាប់រំពឹងថា ទទួលបានត្រឹមតែ៥.៧៦០.៣២៧ដុល្លារអាមេរិកប៉ុណ្ណោះ ។
ទោះបីយ៉ាងណា បើតាមរបាយការណ៍របស់ប្រៃសណីយ៍កម្ពុជា បានឱ្យដឹងថា ចំណាយផ្សេងៗក្នុងឆ្នាំ២០១៦របស់ប្រៃសណីយ៍កម្ពុជាសរុបអស់ទឹកប្រាក់ប្រមាណ៨.៨៨៩.៧២៦ដុល្លារអាមេរិក ។ សម្រាប់ប្រាក់ចំណេញរបស់ប្រៃសណីយ៍កម្ពុជា មុនបង់ពន្ធក្នុងឆ្នាំ២០១៦មានចំនួន៥៨៦.៤៨១ដុល្លារអាមេរិក កើនឡើង១៩៥,៥%ដែលមានទឹកចំនួន១៩៨.៤៦៤ដុល្លារអាមេរិក ។
នៅក្នុងពិធីបូកសរុបលទ្ធផលការងាររបស់ប្រៃសណីយ៍កម្ពុជា កាលពីថ្ងៃទី៣ មេសា ម្សិលមិញ លោកអោក បូរ៉ា អគ្គនាយកប្រៃសណីយ៍កម្ពុជា បានមានប្រសាសន៍ថាបច្ចុប្បន្ននេះសេវាកម្មរបស់ប្រៃសណីយ៍កម្ពុជា បានពង្រីកដល់ទូទាំងព្រះរាជាណាចក្រកម្ពុជា ហើយក៏ត្រៀមពង្រីកសាខាជាបន្តបន្ទាប់ទៀត ដើម្បីឱ្យបានកាន់តែជិតប្រជាពលរដ្ឋតែម្ដង ។
លោកមានប្រសាសន៍ថា ៖« កន្លងមកយើងបានបើករួចមកហើយនូវសេវាកម្មរបស់ប្រៃសណីយ៍កម្ពុជានៅផ្សារទំនើបអុីអនម៉ល ហើយនៅឆ្នាំនេះ យើងនឹងបើកសាខានៅតាមផ្សារធំៗជាច្រើនទៀត ដូចជាផ្សារធំថ្មី ផ្សារអូឡាំពិក និងផ្សារអូរឫស្សីជាដើម» ។ លោកបន្តថា សព្វថ្ងៃនេះ ប្រៃសណីយ៍កម្ពុជា ថ្វីដ្បិតតែជាសហគ្រាសសាធារណៈ តែមានដៃគូប្រកួតប្រជែងជាសហគ្រាសឯកជនជាង២០ក្រុមហ៊ុន ដូចជាក្រុមហ៊ុន DHL , UPS , U Express ជាដើម ក៏ប៉ុន្តែបរិមាណបញ្ញើតាមប្រៃសណីយ៍កម្ពុជា នៅតែឈរលើលំដាប់ថ្នាក់លេខ១ដដែលក្នុងចំណោមក្រុមហ៊ុនធ្វើសេវាកម្មដូចគ្នាទៅនឹងប្រៃសណីយ៍កម្ពុជានៅព្រះរាជាណាចក្រកម្ពុជា ។
លោកថា ៖« ចំណូលប្រៃសណីយ៍កម្ពុជានៅក្នុងឆ្នាំ២០១៦កន្លងទៅនេះ មានប្រមាណជាង៩លានដុល្លារអាមេរិក បើធៀបនឹងឆ្នាំ ២០១៥ មានកំណើនប្រមាណ៧៥% ដែលរកចំណូលបានតែជាង៥លានដុល្លារកន្លះប៉ុណ្ណោះ ដូចនេះហើយទើបប្រៃសណីយ៍កម្ពុជាត្រូវការពង្រីកសេវាបន្ថែមទៀត » ។
លោកអគ្គនាយកប្រៃសណីយ៍កម្ពុជា បានបន្ថែមថា នៅក្នុងឆ្នាំ២០១៧នេះតទៅ ក្រៅពីប្រកួតប្រជែងជាមួយក្រុមហ៊ុនបញ្ញើទាំងជាង២០ហើយនោះ ប្រៃសណីយ៍កម្ពុជានឹងចាប់ផ្ដើមប្រកួតប្រជែងជាមួយក្រុមហ៊ុនរថយន្ដក្រុង និងតាក់ស៊ីមួយចំនួនផងដែរ ហើយសង្ឃឹមថា នឹងទទួលបានការគាំទ្រពីអតិថិជន ។
លោកបូរ៉ាបន្ថែមថា ៖ « យើងជឿជាក់ថាដំណើរការប្រកួតប្រជែងនឹងទទួលបានជោគជ័យ ព្រោះយើងដឹងស្រាប់ហើយថា ការដឹកជញ្ជូនតាមតាក់ស៊ី និងរថយន្ដក្រុង មិនមានស្ថិរភាពប៉ុន្មាននោះទេ តែសម្រាប់ប្រៃសណីយ៍កម្ពុជាវិញបច្ចុប្បន្ននេះ មានស្នាក់ការ ការិយាល័យត្រឹមត្រូវ ។
ម្យ៉ាងទៀតពេលនេះ ប្រៃសណីយ៍កម្ពុជា ក៏មានរថយន្តដឹកទាំងអ្នកដំណើរ និងទំនិញជាង១០គ្រឿងផងដែរ ហើយក៏ត្រៀមបន្ថែមរថយន្តចំនួន៦គ្រឿងទៀតដើម្បីដឹកទាំងអ្នកដំណើរនិងបញ្ញើ ឱ្យបានគ្រប់ខេត្តនៅទូទាំងព្រះរាជាណាចក្រកម្ពុជា » ។
លោកអោក បូរ៉ា បញ្ជាក់ថា ក្នុងករណីប្រៃសណីយ៍កម្ពុជារកចំណូលបានកាន់តែច្រើននោះ ស្ថាប័ននេះនឹងត្រូវគិតគូរបន្ថែមទៀត ដល់បុគ្គលិក និយោជិតដែលកំពុងបម្រើការងារ។ ជាទូទៅ បុគ្គលិកតែងទទួលបានប្រាក់ខែទី១៣រៀងរាល់ឆ្នាំ តែបើសិនជាមានចំណូលច្រើន និងទទួលប្រាក់ចំណេញច្រើន នោះប្រៃសណីយ៍កម្ពុជា នឹងដាក់សំណើទៅក្រសួងពាក់ព័ន្ធនានាដើម្បីស្នើសុំបន្ថែមប្រាក់ខែទី១៤សម្រាប់បុគ្គលិកនិយោជិត ដើម្បីឱ្យពួកគាត់មានទឹកចិត្តក្នុងការបំពេញការងារកាន់តែបានល្អថែមទៀត ៕
ចែករំលែកព័តមាននេះ