ខេត្តកោះកុង៖ ក្រុមហ៊ុនវិនិយោគធំមួយរបស់ចិនបានបង្ហាញគម្រោងបោះទុនវិនិយោគលើវិស័យបច្ចេកវិទ្យាឧស្សាហកម្ម ដោយនឹងបង្កើតរោងចក្រ និងតម្លើងរថយន្តអគ្គិសនីក្នុងភូមិសាស្ត្រខេត្តកោះកុង នៃព្រះរាជាណាចក្រកម្ពុជា។ នេះបើយោងតាមរដ្ឋបាលខេត្តកោះកុង។
ក្រុមហ៊ុនធំរបស់ចិនដែលមានឈ្មោះថា China Matrix Technology Group-Horche Intelligent Automobile បានបង្ហាញឱ្យដឹងនូវគោលបំណងសាងសង់រោងចក្រនិងតម្លើងរថយន្តអគ្គិសនីនៅក្នុងកិច្ចប្រជុំមួយរបស់រដ្ឋបាលខេត្តកោះកុង ជាមួយគណៈប្រតិភូវិនិយោគចិន ស្តីពីសក្តានុពលវិនិយោគលើវិស័យបច្ចេកវិទ្យាឧស្សាហកម្ម ក្នុងខេត្តកោះកុង កាលពីថ្ងៃទី២២ខែតុលា ឆ្នាំ២០២២។
នៅក្នុងកិច្ចប្រជុំ លោកជំទាវ មិថុនា ភូថង អភិបាល នៃគណៈអភិបាលខេត្តកោះកុង បានបង្ហាញនូវក្តីសោមនស្សរីករាយក្រៃលែង និងមានមោទនភាពដែលគណៈប្រតិភូ នៃក្រុមហ៊ុនវិនិយោគចិន ដោយមានលោក លីវ ឈាន់ហ្វូ (LIU CHUANFU) អគ្គនាយកក្រុមហ៊ុន China Matrix Technology Group-Horche Intelligent Automobile បានចាប់អារម្មណ៍ និងមានគោលបំណងបោះទុនវិនិយោគលើវិស័យបច្ចេកវិទ្យាឧស្សាហកម្ម ដោយនឹងបង្កើតរោងចក្រ និងតម្លើងរថយន្តអគ្គិសនីក្នុងភូមិសាស្ត្រខេត្តកោះកុង នៃព្រះរាជាណាចក្រកម្ពុជា។
លោកជំទាវបានថ្លែងថា កិច្ចប្រជុំនេះ គឺជាការបើកឱកាសមួយសម្រាប់រដ្ឋបាលខេត្តកោះកុង ដើម្បីកសាងទំនាក់ ទំនងល្អប្រសើរ និងដើម្បីអាចឱ្យក្រុមហ៊ុនវិនិយោគចិនបានឈ្វេងយល់ពីគោលនយោបាយ កិច្ចសហប្រតិបត្តិការដីធ្លី ធនធានមនុស្ស និងសក្តានុពលនានាពាក់ព័ន្ធនឹងវិស័យបច្ចេកវិទ្យា ឧស្សាហកម្ម រថយន្តអគ្គិសនីក្នុងខេត្តកោះកុង។
ព្រមជាមួយគ្នានោះ អភិបាលខេត្តកោះកុងក៏បានជម្រាបទៅភាគីចិនថាទឹកដីខេត្តកោះកុងគឺមាន ភូមិសាស្ត្រ និងអំណោយផលសក្តានុពលវិនិយោគជាច្រើន ដូចជា កោះកុងជាខេត្តមួយក្នុងចំណោមរាជធានី ខេត្ត ទាំង២៥នៃព្រះរាជាណាចក្រកម្ពុជា ដោយមានព្រំប្រទល់ខាងកើតជាប់នឹងខេត្តព្រះសីហនុ និងខេត្តកំពង់ស្ពឺខាងលិចនិងខាងត្បូងជាប់នឹងឈូង សមុទ្រ និងព្រះរាជាណាចក្រថៃឡង់ដ៍ និងខាងជើងជាប់ខេត្តពោធិ៍សាត់។ ប្រជាជននៅខេត្តកោះកុងប្រមាណ ៥៥,៥% ជាកសិកររស់នៅពឹងផ្អែកលើវិស័យកសិកម្មដែលជាវិស័យចម្បង ក្នុងការទ្រទ្រង់ជីវភាពរស់នៅប្រចាំថ្ងៃ។ ក្រៅពីវិស័យកសិកម្ម នៅមានវិស័យផ្សេងៗទៀតដូចជាវិស័យឧស្សាហកម្ម ០,៣% វិស័យសេវាកម្ម ៤៤,២% ក្នុងនោះកម្លាំង ពលកម្មដែលជាកម្មករ កម្មការិនី បំរើក្នុងរោងចក្រ សហគ្រាស និងវិស័យឯកជនមានប្រមាណ ១៥,១% នៃប្រជាជនសរុប។
ទន្ទឹមនឹងនោះវិស័យរ៉ែ និងថាមពល បានផ្ដល់ភាពទូលំទូលាយ ដល់អ្នកវិនិយោគទាំងឡាយ ដើម្បីអភិវឌ្ឍវារីអគ្គិសនីខ្នាតតូច និងជម្រុញការអភិវឌ្ឍន៍បច្ចេកវិទ្យាប្រកបដោយ គុណភាពខ្ពស់ស្របតាមស្តង់ដាអន្តរជាតិមានតម្លៃថោកសមរម្យ និងមានសេវាកម្មទំនើបគ្របដណ្តប់ទូទាំងខេត្ត ដូចខាងក្រោម៖ ១. វារីអគ្គិសនី ស្ទឹងឫស្សីជ្រុំក្រោម មានអានុភាពតម្លើង ៣៣៨មេហ្គាវ៉ាត់, ២. វារីអគ្គិសនីគិរីរម្យ៣ មានអានុភាពតម្លើង ១៨មេហ្គាវ៉ាត់ និងទី ៣. វារីអគ្គិសនីស្ទឹងតាតមានអានុភាពតម្លើង ២៤៦មេហ្គាវ៉ាត់។
បើតាមលោកជំទាវ មិថុនា ភូថង បានឱ្យដឹងថា ក្នុងឆ្នាំ២០២១ ខេត្តមានឧស្សាហកម្មធុនធំចំនួន ០៧រោងចក្រ សហគ្រាស មានចំនួនកម្មករ និយោជិកចំនួន១០,៨៤៣នាក់ ដែលក្នុងនោះមានរោងចក្រតំឡើងរថយន្ត បង្គុំខ្សែភ្លើង គ្រឿងអេឡិចត្រូនិច វាយនភ័ណ្ឌកាត់ដេរ សំលៀកបំពាក់ សម្ភារកីឡា…….។ល។ សហគ្រាសធុនតូច មធ្យម និងសិប្បកម្ម ដែលមានចំនួន៧៥៥ មូលដ្ឋាន។ ខេត្តកោះកុងក៏បាននឹងកំពុងធ្វើការទំនាក់ទំនង និងបន្តកិច្ចសហប្រតិបត្តិការជាមួយខេត្តត្រាត ប្រទេសថៃ ក្នុងការបង្កើនបរិយាកាសកក់ក្ដៅសម្រាប់ការធ្វើអាជីវកម្ម រវាងប្រទេសទាំងពីរ។ បន្ថែមលើសនេះទៀត ខេត្តបានពង្រីកទំនាក់ទំនងរបស់ខ្លួនជាមួយខេត្តកាម៉ៅ និងខេត្តគៀនយ៉ាងនៃប្រទេសវៀតណាម និងខេត្តជីលីន ខេត្តយូណាន នៃប្រទេសចិន។
ជំទាវ មិថុនា ភូថង បានបន្តថា លោកជំទាវសង្ឃឹមយ៉ាងមុតមាំថា គណៈប្រតិភូក្រុមហ៊ុនចិន និងរដ្ឋបាល ខេត្ត អាចនឹងឈ្វេងយល់ពីគ្នាកាន់តែល្អប្រសើរ និងកសាងទំនាក់ទំនង កិច្ចសហប្រតិបត្តិការ និងអាចបង្កើតបាននូវកាលានុវត្តភាពវិនិយោគ ក្នុងខេត្តកោះកុង លើវិស័យបច្ចេកវិទ្យារថយន្តអគ្គិសនី ដែលជាការរួមចំណែកអនុវត្តគោលនយោបាយ “ខ្សែក្រវាត់មួយ ផ្លូវមួយ” របស់រដ្ឋាភិបាលចិន និងដើម្បីសម្រេចឱ្យបាននូវយុទ្ធសាស្ត្រចតុកោណរបស់រាជរដ្ឋាភិបាលកម្ពុជា ក្នុងដំណាក់កាល ប្រែប្រួលថ្មី និងសម្រេចឱ្យបានបាននូវចក្ខុវិស័យក្នុងការប្រែក្លាយកម្ពុជាជាប្រទេសមានចំណូលខ្ពស់ត្រឹមឆ្នាំ២០៥០៕
ចែករំលែកព័តមាននេះ