ការរឹតបន្ដឹងរបស់EU អាចប៉ះពាល់វិស័យស្រូវអង្ករកម្ពុជាដែរឬទេ ?
រាជធានីភ្នំពេញ ៖ សហគមន៍អឺរ៉ុបបានដាក់កំហិតជាថ្មីក្នុងការរឹតបន្តឹងគុណភាព និងសុវត្ថិភាពអង្ករដែលនាំចូលពីបណ្ដាប្រទេសនានាបន្ទាប់ពីកន្លងមករកឃើញថា
រាជធានីភ្នំពេញ ៖ សហគមន៍អឺរ៉ុបបានដាក់កំហិតជាថ្មីក្នុងការរឹតបន្តឹងគុណភាព និងសុវត្ថិភាពអង្ករដែលនាំចូលពីបណ្ដាប្រទេសនានាបន្ទាប់ពីកន្លងមករកឃើញថា
រាជធានីភ្នំពេញ ៖ សហគមន៍អឺរ៉ុបបានដាក់កំហិតជាថ្មីក្នុងការរឹតបន្តឹងគុណភាព និងសុវត្ថិភាពអង្ករដែលនាំចូលពីបណ្ដាប្រទេសនានាបន្ទាប់ពីកន្លងមករកឃើញថា អង្ករនាំចូលមួយចំនួនមានផ្ទុកជាតិពុល Tricyclazole លើសកំណត់ ហើយគ្រោងនឹងអនុវត្តចាប់ពីខែកក្កដា ឆ្នាំនេះតទៅ ។ ទោះបីយ៉ាងណា អ្នកជំនាញវិស័យស្រូវអង្ករកម្ពុជាយល់ថា វាពុំមានឧបសគ្គ ឬផលប៉ះពាល់អ្វីសម្រាប់វិស័យស្រូវអង្កររបស់កម្ពុជាទេ តែកម្ពុជាគួរប្រុងប្រយ័ត្នឲ្យបានខ្ពស់ទៅលើការប្រើប្រាស់ថ្នាក់គីមី ។
លោកឧកញ៉ា សុង សារ៉ន អគ្គនាយកក្រុមហ៊ុនអេមរុ រាយស៍ មានប្រសាសន៍ថា ៖ «ការដាក់កំហិតសារធាតុពុលក្នុងអង្កររបស់សហគមន៍អឺរ៉ុបនេះ គឺជាកំហិតមួយថ្មី ប៉ុន្តែវាមិនប៉ះពាល់ដល់វិស័យស្រូវអង្ករយើងទេ គ្រាន់តែកម្ពុជាប្រុងប្រយ័ត្នខ្ពស់ក្នុងការអនុញ្ញាតឲ្យនាំចូលសារធាតុគីមី ឬជាតិពុលផ្សេងៗមកប្រើប្រាស់លើស្រូវ និងកុំបន្ធូរឲ្យប្រើប្រាស់ថ្នាំនេះនៅកម្ពុជា » ។
លោកឧកញ៉ាបញ្ជាក់ថា ៖ « យើងគ្មានការព្រួយបារម្ភទេមកដល់ពេលនេះ ព្រោះកម្រិតជាតិពុលនេះមានតិចតួចតាមអ្វីដែលកំណត់ដោយសហគមន៍អឺរ៉ុប ឬគ្មានតែម្តង ។ ភាគច្រើនវាអត់មាន អីចឹងយើងអត់ព្រួយបារម្ភទៅលើការកំហិតរបស់ EU ទេ » ។
ដើម្បីទប់ស្កាត់អ្វីដែលសហគមន៍អឺរ៉ុបកំណត់ លោកអគ្គនាយកក្រុមហ៊ុនរូបនេះលើកឡើងថា ៖ « មានវិធានការតែមួយគត់ដែលមានប្រសិទ្ធភាព គឺត្រូវចុះផ្សព្វផ្សាយណែនាំដល់កសិករ ឬសហគមន៍កសិកម្មធ្វើស្រូវ ដើម្បីនាំចេញដោយប្រុងប្រយ័ត្នលើការប្រើប្រាស់គ្រឿងហាមឃាត់ផ្នែកកសិកម្មដូចជា ជី និងថ្នាំផ្សេងៗក្តី គឺត្រូវចុះអប់រំណែនាំឲ្យបានទាន់ពេលវេលា និងធ្វើកិច្ចសន្យាកសិកម្មទិញពីកសិករឲ្យគាត់មានជំនឿក្នុងការរកស៊ី » ។
លោកឧកញ៉ា ហ៊ុន ឡាក់ អនុប្រធានសហព័ន្ធស្រូវអង្ករកម្ពុជា មានប្រសាសន៍ថា កន្លងមកខាងក្រសួងកសិកម្ម និងសហព័ន្ធស្រូវអង្ករក៏បានផ្សព្វផ្សាយផងដែរទៅដល់តំណាងសាខានៅតាមបណ្តាខេត្តឲ្យយល់ពីរឿងនេះ យកចិត្តទុកដាក់ និងប្រុងប្រយ័ត្នខ្ពស់នឹងអ្វីដែលសហគមន៍អឺរ៉ុបបានកំហិត និងចាប់ផ្តើមអនុវត្តពីខែកក្កដា ខាងមុខ ។
លោកឧកញ៉ាបន្តថា ៖ « ថ្មីៗនេះ យើងបានបញ្ចូលសំណាកអង្ករបីប្រភេទមាន អង្ករសធម្មតា អង្ករសែនក្រអូប និងអង្ករពពួកផ្លាម្លិះ ទៅពិនិត្យនៅស្ថាប័នជំនាញរបស់បរទេស ដែលមានតំណាងនៅកម្ពុជា ក្នុងការចេញវិញ្ញាបនបត្រនូវពពួកជាតិគីមី និងសត្វល្អិត ហើយលទ្ធផលបង្ហាញថា សំណាកអង្ករទាំងបីប្រភេទនេះអត់មានផ្ទុកសារធាតុគីមីនេះទេ ប៉ុន្តែមិនសំដៅថា នៅទូទាំងប្រទេសអត់មានដែរ យើងត្រូវមានវិធានការបង្ការ និងចៀសវាងនូវការកើតឡើង » ។
លោកឧកញ៉ាយល់ថា ៖ « បើកើតមាន វាមិនមែនទូទៅទេ គឺដោយតំបន់ និងរោងម៉ាស៊ីនកែច្នៃស្រូវពិនិត្យឃើញថា មានសារធាតុគីមីលើសកម្រិតដែលគេហាម ។
ជាក់ស្តែង អង្ករមុនពេលវេចខ្ចប់នាំចេញទៅបរទេស គឺមានស្ថាប័នជំនាញត្រួតពិនិត្យ ហើយបើមានអ្វីស្ថិតក្នុងកម្រិតស្តង់ដានៃលក្ខខណ្ឌកិច្ចព្រមព្រៀងរវាងអ្នកទិញនិងអ្នកលក់ គេនឹងចេញវិញ្ញាបនបត្របញ្ជាក់ជូន ហើយវិញ្ញាបនបត្រនោះ យើងអាចប្រើជាផ្លូវការដើម្បីនាំចេញទំនិញទៅប្រទេសទទួលទិញ » ។
សហគមន៍អឺរ៉ុបបានទិញអង្ករពីកម្ពុជាប្រហែលជិតពាក់កណ្តាលនៃបរិមាណអង្ករដែលកម្ពុជានាំចេញសរុបក្នុងមួយឆ្នាំៗ ។ ដូច្នេះ នៅពេលសហគមន៍អឺរ៉ុបរឹតបន្តឹងនូវសារធាតុ Tricyclazole នេះ កម្ពុជាត្រូវយកចិត្តទុកដាក់ ជំរុញអប់រំណែនាំ និងបង្ការទប់ស្កាត់កុំឲ្យមានបញ្ហាបែបនេះកើតឡើងចំពោះវិស័យស្រូវអង្ករកម្ពុជា ដែលជាឧបសគ្គក្នុងការនាំអង្ករចេញទៅសហគមន៍អឺរ៉ុប ។
អគ្គនាយកនៃអគ្គនាយកដ្ឋានកសិកម្ម លោកបណ្ឌិត ហ៊ាន វណ្ណហន ថ្លែងថា ៖ «ឆ្លើយតបនឹងការដាក់កំហិតថ្មីក្នុងការរឹតបន្តឹងគុណភាព ពិសេសសុវត្ថិភាពអង្ករនាំចូលទៅកាន់សហគមន៍អឺរ៉ុប មិនឲ្យមានសំណល់ជាតិពុល Tricyclazole ក្នុងកម្រិតកំណត់អតិបរិមារលើសពី០,០១ក្រាមក្នុង១គីឡូក្រាមអង្ករ (០,០១ pmm) ដែលពីមុនមានដល់ទៅ ១pmm ឬ១មីលីក្រាមក្នុង១គីឡូក្រាមនោះ អគ្គនាយកដ្ឋានកសិកម្ម ដែលជាសេនាធិការបច្ចេកទេសរបស់ក្រសួងកសិកម្ម រុក្ខាប្រមាញ់ និងនេសាទ បានចាត់ការបង្កើតក្រុមការងារបន្ទាន់មួយដើម្បីសិក្សា និងលើកវិធានការបន្ទាន់ក្នុងការបញ្ចៀសបញ្ហា ក៏ដូចជាការពារទីផ្សារអង្កររបស់កសិករកម្ពុជានៅសហគមន៍អឺរ៉ុប (ទិសដៅនាំចេញអង្ករកម្ពុជាដ៏ធំទាំង៨ ក្នុងចំណោមទិសដៅធំបំផុតទាំង១០) » ។
យោងតាមរបាយការណ៍របស់លេខាធិការដ្ឋានច្រកចេញចូលតែមួយសម្រាប់បំពេញបែបបទនាំចេញអង្ករបង្ហាញថា ក្នុងរយៈពេល២ខែដើមឆ្នាំ២០១៧នេះ កម្ពុជានាំចេញអង្ករទៅបរទេសសរុបមានចំនួនជាង១០ម៉ឺនតោន កើនឡើងជាង១៤% បើធៀបនឹងរយៈពេលដូចគ្នាឆ្នាំមុន ។
របាយការណ៍បញ្ជាក់ថា ប្រភេទអង្ករដែលកម្ពុជាបាននាំចេញក្នុងរយៈពេល២ខែដើមឆ្នាំនេះគឺ អង្ករចម្រុះមានជាង៣,៥ម៉ឺនតោន, នាងម្លិះស២៨៣តោន, សូមាលី២៦៣តោន, ផ្ការំដួល ឬផ្កាម្លិះស២,៤ម៉ឺនតោន, សរីរាង្គជាង២ពាន់តោន, ភ្លឺ២៤តោន, អង្ករចម្រុះគ្រាប់វែងជាង៣,៥ម៉ឺនតោន, ប្រណីតគ្រាប់វែងជាង២ពាន់តោន, អង្ករចំហុយគ្រាប់វែងជាង៨ពាន់តោន ។ ចំណែកប្រទេសដែលកម្ពុជានាំចូលច្រើនមាន បារាំង, ប៉ូឡូញ, អង់គ្លេស, ហូឡង់, បែលហ្ស៊ិក, ឆែក, អីុតាលី, អាល្លឺម៉ង់ និងអេស្ប៉ាញ ៕
ចែករំលែកព័តមាននេះ