ខេត្តសៀមរាប ៖ រថយន្តកាមរីឆ្លាមបើកជែងដោយមិនប្រកាន់ស្តាំជ្រុលទៅបុករថយន្តហ៊ីយ៉ាន់ដាយ ដែលកំពុងចតស្ងៀមនៅលើចញ្ចើមផ្លូវពេញទំហឹងក្នុងទិសដៅបញ្ច្រាសទិសគ្នាបណ្តាលឲ្យភ្ញៀវទេសចរណ៍២នាក់រងរបួសធ្ងន់។ ហេតុការណ៍គ្រោះថ្នាក់ចរាចរណ៍នេះកើតឡើងនៅវេលាម៉ោង០៩ និង២០នាទី ថ្ងៃទី០៣ ខែមេសា ឆ្នាំ២០១៧ ស្ថិតក្នុងភូមិស្វាយ ឃុំសសរស្តម្ភ ស្រុកពួក ខេត្តសៀមរាប។ លោកវរសេនីយ៍ទោ ទេព ពុំសែន អធិការនគរបាលស្រុកពួក បានឲ្យដឹងនៅរសៀលថ្ងៃទី៣ ខែមេសា ឆ្នាំ២០១៧នេះថា មានករណីគ្រោះថ្នាក់ចរាចរណ៍ រវាងរថយន្តមួយគ្រឿងបើកបុករថយន្តឈប់ចតលើចិញ្ចើមផ្លូវ ត្រង់ចំណុចលើផ្លូវជាតិលេខ៦ ទឹកដីភូមិស្វាយ ឃុំសសរស្តម្ភ ស្រុកពួក។
លោកបន្តថា រថយន្តបង្កម៉ាកកាមរីឆ្លាម ពណ៌ស ពាក់ស្លាកលេខ ភ្នំពេញ 2C-5616 (អ្នកបើកបររត់គេចខ្លួន និងមានប័ណ្ណធានារ៉ាប់រងក្រុមហ៊ុនធានារ៉ាប់រង) បើកពីកើតទៅលិច និងមានឌុបជនបរទេសចំនួន៤នាក់ ដល់ចំណុចខាងលើក៏បានបុករថយន្តម៉ាកហ៊ីយាន់ដាយ ដឹកទំនិញ ពាក់ស្លាកលេខ ភ្នំពេញ 3D-2843 ឈប់ចតលើចិញ្ចើមផ្លូវខាងត្បូងតាមទិសដៅពីលិចទៅកើត បណ្តាលឲ្យជនបរទេសរបួសធ្ងន់២នាក់(ស្រី២)។ លោកបន្តថា មូលហេតុបណ្តាលមកពីអ្នកបើកបររថយន្តមិនប្រកាន់ស្ដាំ ចំណែកអ្នកបើកបររថយន្តកាមរីឆ្លាម បានរត់គេចខ្លួនបាត់។
ក្រោយពេលកើតហេតុ កម្លាំងជំនាញបានធ្វើការវាស់វែងកន្លែងកើតហេតុកសាងសំណុំរឿង និងដកហូតវត្ថុតាងពាក់ព័ន្ធរក្សាទុកនៅអធិការដ្ឋាននគរបាលស្រុក។ ចំណែកជនរងគ្រោះបានជួយសង្គ្រោះយកទៅព្យាបាលជំងឺនៅមន្ទីរពេទ្យអន្តរជាតិរូយ៉ាល់អង្គរ៕
ចែករំលែកព័តមាននេះ