រាជធានីភ្នំពេញ ៖ ជារៀងរាល់ឆ្នាំ មុនឱកាសបុណ្យចូលឆ្នាំថ្មីប្រពៃណីជាតិមកដល់លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ តែងរៀបចំពិធីជួបជុំសំណេះសំណាលជាមួយនាយ-នាយរង និងពលអាវុធហត្ថទូទាំងរាជធានីភ្នំពេញ ដោយភ្ជាប់ជាមួយនូវអំណោយជាចំណងដៃជាការអបអរសាទរបុណ្យចូលឆ្នាំថ្មីសម្រាប់កងកម្លាំងគ្រប់ៗគ្នាផងដែរ ។
មន្ត្រីអាវុធហត្ថរាជធានីភ្នំពេញបានឲ្យដឹងនៅថ្ងៃទី៣ ខែមេសាថា សម្រាប់ឆ្នាំថ្មីនេះក៏មិនខុសពីឆ្នាំមុនៗដែរ កាលពីចុងសប្តាហ៍មុននេះ លោកឧត្តមសេនីយ៍ឯក រ័ត្ន ស្រ៊ាង បានជួបសំណេះសំណាលនិងសួរសុខទុក្ខ នាយ-នាយរង និងពលអាវុធហត្ថរាជធានីភ្នំពេញ រយៈពេល២ថ្ងៃជាប់ៗគ្នា ប្រកបដោយភាពស្និទ្ធ ស្នាល ។
លោកឧត្តមសេនីយ៍ឯក រ័ត្ន ស្រ៊ាង បានមានប្រសាសន៍ពាំនាំនូវការសួរសុខទុក្ខពីសំណាក់លោកនាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ជូនចំពោះនាយ-នាយរង និងពលអាវុធហត្ថរាជធានីភ្នំពេញទាំងអស់ និងក្រុមគ្រួសារ សូមជួបប្រទះតែសេចក្តីសុខ សុភមង្គល សុខភាពល្អបរិបូរណ៍ និងជោគជ័យគ្រប់ភារកិច្ចការងារ។
ក្នុងឱកាសនោះ លោកឧត្តមសេនីយ៍ឯក បានថ្លែងអំណរគុណយ៉ាងជ្រាលជ្រៅដល់កងកម្លាំងអាវុធហត្ថរាជធានីភ្នំពេញទាំងអស់ ចំពោះការលះបង់កម្លាំងកាយចិត្ត បំពេញការងារទាំងយប់ទាំងថ្ងៃប្រកបដោយវិន័យល្អ មានស្មារតីតស៊ូអត់ធ្មត់ និងសាមគ្គីភាពឯកភាពផ្ទៃក្នុងល្អ ។
លោកបានគូសបញ្ជាក់ថា ឆន្ទៈនិងភាពស្មោះត្រង់នៃការបំពេញការងាររបស់បងប្អូន គឺជាការរួមចំណែកយ៉ាងធំធេងក្នុងការរក្សាសន្តិសុខ សណ្តាប់ធ្នាប់សាធារណៈ ព្រមទាំងស្ថិរភាពសង្គម។
ជាការតបស្នងចំពោះការប្រឹងប្រែងទាំងនេះ លោកពុំមានកញ្ចប់ថវិកាអ្វីជូនដល់បងប្អូននោះទេ មានតែដំបូន្មានដែលជាគំនិតក្នុងការត្រិះរិះពិចារណាលើការរៀបចំផែនការសេដ្ឋកិច្ចគ្រួសារឱ្យបានត្រឹមត្រូវ ។ គំនិតនេះប្រៀបដូចជាកញ្ចប់ថវិកាមួយ ជួយឱ្យបងប្អូនជៀសផុតពីហានិភ័យសេដ្ឋកិច្ចក្នុងគ្រួសារ ។ លើសពីនេះ បងប្អូនត្រូវយកចិត្តទុកដាក់ថែរក្សាសុខភាពខ្លួនឯងឱ្យបានគ្រប់គ្នា តាមរយៈការហាត់ប្រាណជាប្រចាំ។
ទន្ទឹមគ្នានេះ លោកបានដាស់តឿនក្រើនរំឭកដល់កងកម្លាំងទាំងអស់ ត្រូវប្រឹងប្រែងយកចិត្តទុកដាក់ចូលរួមការពារដំណើរការបោះឆ្នោតជ្រើសរើសក្រុមប្រឹក្សាឃុំ-សង្កាត់ នាពេលខាងមុខឲ្យបានល្អ និងត្រូវចូលរួមបោះឆ្នោតឱ្យបានគ្រប់ៗគ្នា ។ ជាពិសេស ត្រូវលើកកម្ពស់ស្មារតីស្រឡាញ់ជឿជាក់ ស្មោះត្រង់ដាច់ខាត ប្តេជ្ញាការពាររាជរដ្ឋាភិបាលស្របច្បាប់ដែលដឹកនាំដោយសម្តេចអគ្គមហាសេនាបតីតេជោ ហ៊ុន សែន នៅគ្រប់កាលទេសៈ មិនឱ្យមានការធ្វើបដិវត្តន៍ពណ៌ជាដាច់ខាត។
លោកឧត្ដមេសនីយ៍ឯក រ័ត្ន ស្រា៊ង ថ្លែងទៀតថា ត្រៀមអនុវត្តតាមបទបញ្ជាថ្នាក់លើគ្រប់ពេលវេលា យកចិត្តទុកដាក់អនុវត្តតាមការណែនាំចង្អុលបង្ហាញ តម្រង់ទិសរបស់លោក នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេសឱ្យបានម៉ឹងម៉ាត់ ។ មុនពេលចេញប្រតិបត្តិការ ត្រូវឆ្លុះកញ្ចក់មើលខ្លួនឯងឱ្យមានសណ្តាប់ធ្នាប់ តាំងពីក្បាលដល់ចុងជើង ធ្វើខ្លួនឱ្យមានតម្លៃ ត្រូវបំពេញការងារប្រកបដោយក្រមសីលធម៌ វិជ្ជាជីវៈ គោរពច្បាប់ គោរពសិទ្ធិមនុស្ស ហាមប្រាសចាកពីវិន័យ និងបទបញ្ជាផ្ទៃក្នុងរបស់កងរាជអាវុធហត្ថ តាំងខ្លួនជាអ្នកបម្រើរាស្ត្រជានិច្ច មិនមែនធ្វើជាចៅហ្វាយរាស្ត្រនោះទេ។
នៅក្នុងពិធីជួបសំណេះសំណាលនេះ លោកឧត្តមសេនីយ៍ឯក រ័ត្ន ស្រ៊ាង ក៏បានរៀបចំ ទឹកក្រូចចំនួន២.៥០០កេស អាវយឺតចំនួន២.០០០ ឃីតដែលមានទឹកដោះគោ ទឹកបរិសុទ្ធ និងនំពាចំនួន២.០០០កញ្ចប់ សម្រាប់ចែកជូន ដល់កម្លាំងអាវុធហត្ថទូទាំងរាជធានីភ្នំពេញគ្រប់ៗគ្នា ដើម្បីជាការលើកទឹកចិត្ត និងជាចំណងដៃក្នុងឱកាសបុណ្យចូលឆ្នាំថ្មីផងដែរ ៕
ចែករំលែកព័តមាននេះ