ខេត្តបន្ទាយមានជ័យ ៖ ស្ត្រីចំណាស់ជាជនជាតិវៀតណាមជាប់ចោទពីបទពាក់ព័ន្ធករណីសញ្ចារកម្ម ត្រូវបានសមត្ថកិច្ចជំនាញការិយាល័យប្រឆាំងការជួញដូរមនុស្ស និងការពារអនីតិជន សហការជាមួយអង្គការបេសកកម្មយុត្តិធម៌អន្តរជាតិ (IJM) ដោយមានការចូលរួមពីលោកក្រឡាបញ្ជីអយ្យការអមសាលាដំបូងខេត្តបន្ទាយមានជ័យ ចាប់ឃាត់ខ្លួន កាលពីវេលាម៉ោង៥ល្ងាច ថ្ងៃទី២៨ មីនា ឆ្នាំ២០១១នៅចំណុចភូមិក្បាលស្ពាន សង្កាត់ប៉ោយប៉ែត ក្រុងប៉ោយប៉ែត ។
លោកវរសេនីយ៍ទោ សិទ្ធ ឡោះ នាយការិយាល័យប្រឆាំងការជួញដូរមនុស្ស និងការពារអនីតិជន បានឱ្យដឹងថា ដោយមានបទបញ្ជាពីលោកឧត្តមសេនីយ៍ត្រី ខេង ស៊ុម ស្នងការនគរបាលខេត្ត និងដោយមានការអនុញ្ញាតពីលោកឡុង ជាប ព្រះរាជអាជ្ញារងអមសាលាដំបូងខេត្តឱ្យស៊ើបអង្កេតបឋមលើករណីសង្ស័យប្រកបអាជីវកម្មផ្លូវភេទ (សញ្ចារកម្ម) ចុះថ្ងៃទី២២ មីនា ឆ្នាំ២០១១។ ជាលទ្ធផលនៅថ្ងៃទី២៨ មីនា ឆ្នាំ២០១១ វេលាម៉ោង៥ល្ងាច កម្លាំងជំនាញបានសហការជាមួយអង្គការបេសកកម្មយុត្តិធម៌អន្តរជាតិ (IJM) និងមានការចូលរួមពីលោកក្រឡាបញ្ជីអយ្យការអមសាលាដំបូងខេត្តផងនោះ បានចាប់ឃាត់ខ្លួនស្ត្រីចំណាស់ម្នាក់ជាជនជាតិវៀតណាម ឈ្មោះកែវ នី ហៅយាយអ៊ុក ឬហ្វៀង ធី អ៊ុកយីង អាយុ៦០ឆ្នាំ នៅចំណុចភូមិក្បាលស្ពាន សង្កាត់ប៉ោយប៉ែត ក្រុងប៉ោយប៉ែត។ ក្នុងកិច្ចប្រតិបត្តិការខាងលើនេះ សមត្ថកិច្ចបានរំដោះស្ត្រីរកស៊ីផ្លូវភេទចំនួន២នាក់ ម្នាក់អាយុ១៧ឆ្នាំ និងម្នាក់ទៀតអាយុ១៩ឆ្នាំ ដែលត្រូវជាចៅស្ត្រីជាប់ចោទ ។
លោកនាយការិយាល័យបានបន្តទៀតថា ផ្អែកតាមចម្លើយរបស់ស្ត្រីទាំង២នាក់បានឱ្យសមត្ថកិច្ចដឹងថា រាល់លុយកាក់ដែលពួកខ្លួនបានពីការដេករួមភេទជាមួយភ្ញៀវត្រូវយាយកែវ នី ហៅយាយអ៊ុក ឬហ្វៀង ធីអ៊ុកយីង យកទៅសងថ្លៃជំពាក់បំណុលគេ កាលរកស៊ីលក់ខោអាវខាត។ លោកវរសេនីយ៍ឯក ពូន សានិត ស្នងការរងជាប្រធានការិយាល័យកណ្តាលនគរបាលយុត្តិធម៌បានបន្តឱ្យដឹងដែរថា ឆ្លងតាមការស្រាវជ្រាវយ៉ាងល្អិតល្អន់ និងការបំភ្លឺពីជនរងគ្រោះអាចឱ្យសមត្ថកិច្ចសន្និដ្ឋានបានថា ជនសង្ស័យឈ្មោះកែវ នី ហៅយាយអ៊ុក ឬហ្វៀង ធីអ៊ុកយីង ពិតជាទទួលផលពីការប្រកបអាជីវកម្មផ្លូវភេទ និងមានការគ្រប់គ្រងលើស្ត្រីទាំង២នាក់ប្រាកដមែន ។ បច្ចុប្បន្នជនសង្ស័យរូបនេះត្រូវបានកម្លាំងការិយាល័យជំនាញរៀបចំសំណុំរឿងបញ្ជូនទៅសាលាដំបូងខេត្តចាត់ការតាមផ្លូវច្បាប់ ។ ចំពោះស្ត្រីរងគ្រោះទាំងពីរនាក់ប្រគល់ទៅឱ្យមន្ទីរសង្គមកិច្ចខេត្តបន្ទាយមានជ័យ សហការជាមួយអង្គការបេសកកម្មយុត្តិធម៌អន្តរជាតិ ដើម្បីជួយបណ្តុះបណ្តាលផ្នែកសេវាផ្សេងៗ ៕
ចែករំលែកព័តមាននេះ