ចក្រភពអង់គ្លេស ៖ ផ្លែឈើ បន្លែ ផ្កា និងប្រេងអូលីវនឹងមានតម្លៃថ្លៃ នៅពេលអង់គ្លេសចាកចេញពីសហភាពអឺរ៉ុប (EU) ទោះបីជាកិច្ចព្រមព្រៀងពាណិជ្ជកម្មផ្សេងៗជោគជ័យក្តី។ នេះបើតាមក្រុមអ្នកវិភាគ City ។
ចក្រភពអង់គ្លេស ៖ ផ្លែឈើ បន្លែ ផ្កា និងប្រេងអូលីវនឹងមានតម្លៃថ្លៃ នៅពេលអង់គ្លេសចាកចេញពីសហភាពអឺរ៉ុប (EU) ទោះបីជាកិច្ចព្រមព្រៀងពាណិជ្ជកម្មផ្សេងៗជោគជ័យក្តី។ នេះបើតាមក្រុមអ្នកវិភាគ City ។
តម្លៃម្ហូបអាហារដែលនាំចូលពីសហភាពអឺរ៉ុប ទំនងជានឹងកើនឡើងដល់៨% ខណៈអង់គ្លេសត្រូវបានបង្ខំឲ្យត្រួតពិនិត្យព្រំដែន និងបន្ថែមការលំបាកក្នុងការនាំចូលអាហារដែលពួកគេមិនអាចផលិតដោយខ្លួនឯង ។
កាលពីឆ្នាំមុន ចក្រភពអង់គ្លេសបាននាំចូលផលិតផលម្ហូបអាហារ និងកសិកម្ម ស្មើទឹកប្រាក់៤៧,៥ប៊ីលានផោន ក្នុងនោះទំនិញ៧១%នាំចូលពីសហភាពអឺរ៉ុប ។ ការនាំចូលមានតម្លៃបំផុតរួមមាន ផ្លែឈើរបស់ប្រទេសអេស្ប៉ាញ បន្លែ ផ្កា និងស្រាបារាំងជាដើម ។
លោក Harry Smit អ្នកវិភាគជាន់ខ្ពស់ប្រចាំធនាគារ Rabobank និងជាអ្នកនិពន្ធពីសុវត្ថិភាពស្បៀងអាហារពេលអនាគត ស្តីពីផលប៉ះពាល់នៃការចាកចេញពីសហភាពអឺរ៉ុបរបស់អង់គ្លេស លើវិស័យម្ហូបអាហារ និងកសិអាជីវកម្មនៅអឺរ៉ុប និយាយថា ៖ « អតិថិជនអង់គ្លេសគួរតែត្រៀមខ្លួន ខណៈមានការដំឡើងថ្លៃទំនិញមួយចំនួនប្រហែល៨% ដែលអង់គ្លេសស្ទើរតែពឹងផ្អែកទាំងស្រុងលើសហភាពអឺរ៉ុប » ។
អ្នកប្រឆាំងនឹងការលើកឡើងរបស់លោក Smit និងគាំទ្រការចាកចេញរបស់អង់គ្លេស ឲ្យដឹងថា តម្លៃស្បៀងអាហារនឹងធ្លាក់ចុះ ដោយសារការលុបបំបាត់ពន្ធនាំចូលទំនិញពីប្រទេសមិនមែនសមាជិកសហភាពអឺរ៉ុប ។ ជាក់ស្តែង ក្រុមហ៊ុនផលិតស្ករស Tate & Lyle អះអាងថា វិក្កយបត្រវត្ថុធាតុដើមរបស់ខ្លួនបានកើនឡើងជាង៤០លានអឺរ៉ូឯណោះក្នុង១ឆ្នាំ ដោយសារពន្ធ និងកូតាសហភាពអឺរ៉ុប ។
ប៉ុន្តែលោក Smit អះអាងថា តម្លៃទំនងជានឹងកើនឡើង ទោះបីទំនាក់ទំនងថ្មីរបស់អង់គ្លេសជាមួយ EU មានទម្រង់បែបណាក៏ដោយ មិនថាការនាំចូលម្ហូបអាហារមិនគិតពន្ធ ជាផ្នែកមួយនៃកិច្ចព្រមព្រៀងលើកទឹកចិត្តដៃគូពាណិជ្ជកម្មអន្តរជាតិ ស្វាគមន៍ក្រុមហ៊ុនសេវាកម្មរបស់ចក្រភពអង់គ្លេស ឬការដកពន្ធដើម្បីការពារកសិករ ។
លោក Smit ឲ្យដឹងថា ការចាកចេញរបស់អង់គ្លេសពីសហភាពអឺរ៉ុប អាចជំរុញដល់ក្រុមហ៊ុនផលិតម្ហូបអាហាររបស់អង់គ្លេស ខណៈអ្នកផលិតព្យាយាមទូទាត់ការចំណាយលើការនាំចូលវត្ថុធាតុដើម ជាជាងទិញផលិតផលសម្រេចពីបរទេស ។
វិស័យស្បៀងអាហារ និងកសិកម្មរបស់អង់គ្លេសពឹងផ្អែកយ៉ាងខ្លាំងលើកម្លាំងពលកម្មបរទេស ប្រហែល១ភាគ៣នៃកម្មករ គឺមកពីសហភាពអឺរ៉ុប ។ ដូច្នេះ ទោះបីជាបង្កើតផលិតកម្មក្នុងស្រុក ប៉ុន្តែអាចនឹងលំបាកស្វែងរកកម្លាំងពលកម្ម ដែលនឹងជំរុញប្រាក់ឈ្នួល និងស្បៀងអាហារឲ្យកើនឡើង ។
លោក Ian Wright អគ្គនាយកក្រុមពាណិជ្ជកម្មសហព័ន្ធម្ហូបអាហារ និងភេសជ្ជៈ និយាយថា ការប្រែប្រួលតម្លៃនេះ នឹងអាស្រ័យយ៉ាងខ្លាំងលើកិច្ចព្រមព្រៀងដំបូងរបស់អង់គ្លេសជាមួយ EU ។ លោកថា ៖ « ១ភាគ៤នៃទឹកដោះគោរបស់យើង ត្រូវបានផលិតនៅខាងក្រៅចក្រភពអង់គ្លេស ហើយការរំពឹងទុកតិចតួចនៃការបង្កើនផលិតកម្មដើម្បីបំពេញតម្រូវការ នឹងប៉ះពាល់ដល់តម្លៃ ខណៈពន្ធនាំចូលកើនឡើង៣៦% » ។
លោក Wright យល់ស្របថា ការលុបបំបាត់ពន្ធទាំងអស់ ដូចប្រទេសនូវែលសេឡង់ធ្វើកាលពីប៉ុន្មានឆ្នាំកន្លងមក មិនន័យថា តម្លៃចុះថោកនោះទេ ។ ទង្វើបែបនេះនាំឲ្យមានផលវិបាកនៅតាមសហគមន៍កសិកម្ម ។ លោកថា ៖ « រដ្ឋមន្ត្រីជាច្រើននិយាយថា ចង់លើកកម្ពស់ស្តង់ដានៃសុខុមាលភាពសត្វ ហើយមានបណ្តាប្រទេសជាច្រើនផ្តល់នូវផលិតផលក្នុងតម្លៃថោក ប៉ុន្តែពួកគេមិនអាចបំពេញតាមស្តង់ដាទេ » ៕
ចែករំលែកព័តមាននេះ