ចក្រភពអង់គ្លេស ៖ ខណៈ Brexit ចាប់ផ្តើម ចក្រភពអង់គ្លេសក៏ចាប់ផ្តើមដំណើរការចាកចេញពីសហភាពអឺរ៉ុបជាផ្លូវការដែរ ។ ទោះបីយ៉ាងណា វាមានភាពមិនប្រាកដប្រជាច្រើននៅឡើយពីអនាគតថា នឹងមានអ្វីកើតឡើង ។
លោកស្រីនាយករដ្ឋមន្ត្រី Theresa May បានប្រាប់កាលពីថ្ងៃពុធ កន្លងមកថា អ្នកដែលមិនប្រាកដប្រជា គួរតែមើលទៅមុខដោយសុទិដ្ឋិនិយម ។
ប៉ុន្តែដោយការចរចានេះត្រូវការរយៈពេល២ឆ្នាំឯណោះ ពួកយើងគួរតែងាកមកមើលថាតើតម្លៃផ្ទះ និងអត្រាការប្រាក់បានឆ្លើយតបយ៉ាងដូចម្តេចខ្លះ តាំងពីការបោះឆ្នោតចាកចេញពី EU ក្នុងខែមិថុនាមក ។
អត្រាការប្រាក់នៅអង់គ្លេស ឬអត្រាការ ប្រាក់គោល គឺត្រូវបានកំណត់ដោយធនាគារ ជាតិអង់គ្លេស សម្រាប់ផ្តល់ប្រាក់កម្ចីដល់ធនាគារដទៃ និងប្រើវាកំណត់អត្រាការប្រាក់ទូទៅ ។
គណៈកម្មាធិការគោលនយោបាយរូបិយប័ណ្ណរបស់ធនាគារនេះបានកំណត់អត្រា និងនិយាយថា ពួកគេមិនប្រញាប់បង្កើនវាទេ ប៉ុន្តែសេដ្ឋវិទូជាច្រើននិយាយថា ការកើនឡើងយ៉ាងលឿននៃអត្រាអតិផរណាអាចនឹងដាក់សម្ពាធលើធនាគារឲ្យចេញសកម្មភាព និងបង្កើនអត្រាការប្រាក់ ។
អ្នកនាង Hannah Maundrell និពន្ធនាយករបស់ money.co.uk និយាយថា គណៈកម្មាធិការដឹងថា វាប៉ះពាល់ដល់ហិរញ្ញវត្ថុតាមគ្រួសារប៉ុណ្ណោះ ហើយរាល់ការបង្កើនណាមួយនឹងកើនតែបន្តិច តាមសម្រួល និងតាមពេលដែលត្រូវបានកំណត់ដោយប្រុងប្រយ័ត្ន ។
ជាមួយគ្នានេះ ប៉ុន្មានខែបន្ទាប់ពីចក្រភពអង់គ្លេសបោះឆ្នោតចាកចេញពី EU ការលូតលាស់របស់តម្លៃផ្ទះបានអន់ថយ ប៉ុន្តែវាមិនប៉ះពាល់ធំដុំទេ ។
លោក Simon Collins មកពី John Charcol និយាយថា ៖ « ខ្ញុំមិនគិតថា ពួកយើងនឹងមើលឃើញតម្លៃផ្ទះធ្លាក់ចុះខ្លាំងទេ ។ ទីផ្សារផ្ទះរបស់អង់គ្លេសនៅតែត្រូវបានមើលឃើញថា ជាការវិនិយោគដ៏ល្អ » ។
លោកបន្តថា ៖ « មូលហេតុតែមួយដែលអាចធ្វើឲ្យតម្លៃផ្ទះធ្លាក់ចុះខ្លាំងនោះ គឺប្រជាជនមិនទូទាត់បំណុលធនាគារ ដែលធ្វើឲ្យកើនឡើងចំនួនផ្ទះតម្លៃទាបក្នុងទីផ្សារ » ។
លោក Russell Quirk ស្ថាបនិក និងនាយកប្រតិបត្តិរបស់ eMoov និយាយថា៖ « Brexit គ្មានសមត្ថភាពបង្កផលប៉ះពាល់ដល់ទីផ្សារអចលនទ្រព្យរបស់ចក្រភពអង់គ្លេសទេ» ។
អ្វីគួរឲ្យព្រួយបារម្ភនោះ គឺទីផ្សារអចលនទ្រព្យក្នុងទីក្រុងឡុងដ៍កណ្តាលធ្លាប់ជួបវិបត្តិពីមុនមក និងត្រូវបានប៉ះពាល់ដោយការផ្លាស់ប្តូរការបង់ពន្ធលើឯកសារស្របច្បាប់ ។
យ៉ាងណាក្តី លោក Jeremy Leaf ភ្នាក់ងារអចលនទ្រព្យនៅទីក្រុងឡុងដ៍ខាងជើង និងជាអតីតអគ្គនាយកផ្នែកលំនៅឋានក្នុង RICS និយាយថា ៖ « ទីផ្សារផ្ទះបាននៅរឹងមាំជាងអ្វីដែលអ្នកទាំងអស់គ្នាគិតទុក ប៉ុន្តែភាពមិនប្រាកដប្រជានៅតែមាន ហើយការទិញលក់ ក៏ធ្លាក់ចុះបន្តិចម្តងៗផងដែរតាំងពីការបោះឆ្នោតមក » ។
លោកបន្តថា ៖ « វាប៉ះពាល់ដល់ទីផ្សារចៀសមិនផុតទេ ដោយវាធ្វើឲ្យតម្លៃធ្លាក់ចុះ ជាពិសេសនៅទីក្រុងឡុងដ៍ ដែលត្រូវបានប៉ះពាល់ដោយការកើនឡើងនៃពន្ធឯកសារស្របច្បាប់ និងតម្លៃខ្ពស់ជាយូរមកហើយ » ៕
ចែករំលែកព័តមាននេះ