រាជធានីភ្នំពេញ ៖ ក្នុងចំណោមវិនិយោគិនទាំងអស់ដែលមកស្វែងរកការបណ្ដាក់ទុនវិនិយោគនានានៅកម្ពុជា ភាគច្រើនអាចនិយាយភាសាចិនបានដូចជា ចិន ម៉ាឡេស៊ី សិង្ហបុរី ហុងកុង និងតៃវ៉ាន់ជាដើម ។ ដូចនេះ ដើម្បី
រាជធានីភ្នំពេញ ៖ ក្នុងចំណោមវិនិយោគិនទាំងអស់ដែលមកស្វែងរកការបណ្ដាក់ទុនវិនិយោគនានានៅកម្ពុជា ភាគច្រើនអាចនិយាយភាសាចិនបានដូចជា ចិន ម៉ាឡេស៊ី សិង្ហបុរី ហុងកុង និងតៃវ៉ាន់ជាដើម ។ ដូចនេះ ដើម្បីសម្រួលដល់ការវិនិយោគរបស់អ្នកទាំងនោះ សមាគមខ្មែរ-ចិននៅកម្ពុជាបានសម្រេចសាងសង់ការិយាល័យសមាគមជួយសម្រួលពួកគេស្វែងរកសេវានានាក្នុងការបណ្ដាក់ទុនវិនិយោគ ។
ថ្លែងនៅក្នុងពិធីបុកគ្រឹះសាងសង់ការិយាល័យសមាគមខ្មែរ-ចិន ក្នុងតំបន់អភិវឌ្ឍន៍ទីក្រុងរណបជ្រោយចង្វា កាលពីថ្ងៃទី៣០ មីនា លោកឧកញ៉ា ឃុន សៀ ប្រធានគណៈកម្មការរៀបចំការងារសាងសង់ការិយាល័យសមាគមខ្មែរ-ចិននៅកម្ពុជា ឲ្យដឹងថា ការិយាល័យសមាគមខ្មែរ-ចិននេះ ទទួលបានការបរិច្ចាគដីទំហំ៣ពាន់ម៉ែត្រការ៉េពីលោកឧកញ៉ា ពុង ឃាវសែ ប្រធានក្រុមហ៊ុន OCIC សម្រាប់សាងសង់ ដោយចំណាយទឹកប្រាក់ប្រមាណជាង២លានដុល្លារអាមេរិក ។
លោកបន្តថា ៖ « ការសាងសង់អគារថ្មីនេះ ត្រូវការថវិកាច្រើនពីសមាគមខ្មែរ-ចិន តែថវិកាមានកម្រិត មិនអាចរ៉ាប់រងបានទាំងស្រុងនូវការចំណាយ ។ យើងខ្ញុំសង្ឃឹមថា សប្បុរសជនជិតឆ្ងាយទាំងឡាយនឹងចូលរួមឧបត្ថម្ភសង់អគារនេះទុកជាប្រវត្តិសាស្ត្រឲ្យកូនចៅជំនាន់ក្រោយបានមើលពីស្នាដៃរបស់យើង » ។
លោកឧកញ៉ា ពុង ឃាវសែ ប្រធានសមាគមខ្មែរ-ចិននៅកម្ពុជា ឲ្យដឹងថា រយៈពេលជាង២០ឆ្នាំនៃការបង្កើតសមាគមនេះនៅកម្ពុជា សមាជិកទាំងអស់បានចូលរួមចំណែកជាច្រើនក្នុងការអភិវឌ្ឍសេដ្ឋកិច្ចកម្ពុជា ដូចជា ការដាក់ទុនវិនិយោគលើវិស័យផ្សេងៗជាដើម ។ លោកឧកញ៉ាមានប្រសាសន៍ថា ៖ « នៅថ្ងៃនេះដែរ គឺជាភស្តុតាងបញ្ជាក់មួយទៀតថា សមាគមខ្មែរ-ចិននឹងចូលរួមជំរុញសេដ្ឋកិច្ចកម្ពុជាឲ្យរីកចម្រើនបន្ថែមទៀត តាមរយៈការបង្កើតការិយាល័យសម្រាប់ឲ្យបងប្អូនចិនដែលទើបនឹងមកដល់កម្ពុជា ហើយស្វែងរកការវិនិយោគនានា ក្នុងនោះ សមាគមនឹងបង្កើតឲ្យនាយកដ្ឋានជំរុញសេដ្ឋកិច្ច និងសម្របសម្រួលការវិនិយោគចំពោះវិនិយោគិនដែលនិយាយភាសាចិន ដូចជា មកពីម៉ាឡេស៊ី សិង្ហបុរី ចិន តៃវ៉ាន់ ហុងកុង និងម៉ាកាវជាដើម » ។
លោក Xiong Bo ឯកអគ្គរដ្ឋទូតចិន ប្រចាំកម្ពុជា ដែលចូលរួមក្នុងពិធីនោះដែរឲ្យដឹងថា ជនជាតិចិននៅកម្ពុជា និងបងប្អូនកូនកាត់ចិន-កម្ពុជា បានចូលរួមយ៉ាងសំខាន់ក្នុងការក្លាយជាកម្លាំងស្នូលមួយទ្រទ្រង់សេដ្ឋកិច្ចកម្ពុជាឲ្យអភិវឌ្ឍន៍ទៅមុខ ។ លោកថា ៖ «បច្ចុប្បន្ននេះ ប្រទេសចិន និងកម្ពុជាបាននិងកំពុងពង្រឹងកិច្ចសហប្រតិបត្តិការតភ្ជាប់សេដ្ឋកិច្ចតាមយុទ្ធសាស្ត្ររៀងៗខ្លួន ដើម្បីឲ្យប្រទេសទាំងពីរកាន់តែជិតស្និទ្ធនឹងគ្នា » ។
លោកជំទាវ ម៉ែន សំអន ឧបនាយក រដ្ឋមន្ត្រី និងជារដ្ឋមន្ត្រីក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច មានប្រសាសន៍ថា បងប្អូនខ្មែរ-ចិន រួមទាំងបងប្អូនខ្មែរខ្សែស្រឡាយចិន និងបងប្អូនខ្មែរដើមកំណើតចិន គឺជាអ្នកពូកែធ្វើជំនួញ និងវិនិយោគដ៏ឆ្លាតវៃ បានក្លាយជាធនធានដ៏សំខាន់រួមចំណែកយ៉ាងធំធេងក្នុងការអភិវឌ្ឍសេដ្ឋកិច្ច និងសង្គមកម្ពុជា ។
លោកជំទាវបន្តថា ៖ «ប្រទេសចិន គឺជាដៃគូអភិវឌ្ឍន៍ដ៏សំខាន់របស់កម្ពុជាលើគ្រប់វិស័យ ដែលមិនអាចកាត់ផ្ដាច់បានពីការជួយឧបត្ថម្ភរបស់មហាមិត្តចិនឡើយ ។ តាមរយៈយុទ្ធសាស្ត្រខ្សែក្រវាត់មួយ ផ្លូវមួយរបស់រដ្ឋាភិបាលចិន កម្ពុជានឹងទទួលបានផលប្រយោជន៍កាន់តែធំធេងថែមទៀតពីទំនាក់ទំនងមិត្តភាពជាប្រពៃណីកម្ពុជា-ចិន » ៕
ចែករំលែកព័តមាននេះ