គោលការណ៍នៃការទិញលំនៅឋាន តែងប្រាប់ឲ្យទិញនៅទីតាំងល្អៗ ឬទីតាំងដែលមាននិន្នាការថា តម្លៃនឹងកើនឡើងនៅថ្ងៃអនាគត។ មនុស្សភាគច្រើនតែងប្រៀបធៀបតម្លៃពីអតីតកាលជាមួយបច្ចុប្បន្នថា កន្លងមក តើតម្លៃកើនឡើងច្រើនឬតិចប៉ុនណា ប៉ុន្តែដឹងទេថា បរិស្ថាននៅជុំវិញទីតាំង ក៏ជាកត្តាសំខាន់ផងដែរដើម្បីកំណត់តម្លៃផ្ទះ ។
ខាងក្រោមនេះ ជាសញ្ញាបង្ហាញថា តម្លៃផ្ទះនៅក្នុងទីតាំងណាមួយកំពុងតែធ្លាក់ចុះ ហើយសម្រាប់អ្នកដែលដឹងខ្លួនមុន គួរតែប្រញាប់លក់ចេញផងដែរ ព្រោះវានឹងមានប្រៀបតាម៨ចំណុចដូចខាងក្រោម ៖
១-ហាងលក់ទំនិញខ្នាតតូចទៅមិនរួច ៖
ពិតជាមិនមែនជារឿងល្អនោះទេ បើសិនជាហាងទំនិញនៅម្តុំផ្ទះរបស់យើងបិទលែងដំណើរការ ឬផ្លាស់ទៅកន្លែងផ្សេងទៀត ព្រោះហាងទំនិញទាំងនេះអាចដំណើរការបាន ក៏ត្រូវអាស្រ័យលើការទិញពីមនុស្សនៅសហគមន៍នោះដែរ ។
២-ហាងលក់ទំនិញសព្វមុខគ្មានអ្នកទិញ ៖
គង់ជារឿងប្លែក បើសិនជាមានហាងទំនិញគ្រប់មុខមកបើកលក់ហើយ ប៉ុន្តែបែរជាគ្មានមនុស្សចូលទិញ និងក្លាយជាសភាពហាងដែលគេបោះបង់ចោល មិនអ៊ូអរដូចអ្វីគួរតែមាន វានឹងជាកត្តាសំខាន់ដែលធ្វើឲ្យទីតាំងនេះមិនគួរឲ្យរស់នៅទេ ។
៣-រថយន្តឈ្នួលតិច ៖
ជាធម្មតា ប្រសិនបើទីតាំងណាដែលមានមនុស្សរស់នៅច្រើនឡើង ឬចាប់ផ្តើមមានភាពរីកចម្រើន បណ្តារថយន្តឈ្នួលទាំងឡាយនឹងធ្វើដំណើរឆ្លងកាត់ច្រើនក្នុងទីតាំងនោះ ។
៤-មានតែលំនៅឋានលក់ ៖
បើនៅក្នុងបរិវេណជិតៗនោះចាប់ផ្តើមមានផ្ទះលក់កាន់តែច្រើន គឺបង្ហាញថា ទីតាំងនេះចាប់ផ្តើមមានបញ្ហា ខណៈមនុស្សផ្លាស់ទីលំនៅទៅរស់នៅកន្លែងផ្សេងច្រើនឡើង ។
៥-បន្ទប់ជួលនៅសល់ច្រើន ៖
មិនត្រឹមតែផ្ទះលក់ចេញច្រើនប៉ុណ្ណោះទេដែលគួរឲ្យខ្វល់ចិត្តនោះ ប៉ុន្តែបើសិនជាមានផ្ទះ ឬបន្ទប់ជួលនៅសល់ច្រើនពាសពេញទាំងអស់ ថែមទាំងបញ្ចុះតម្លៃជួលទៀត គឺវាចាប់ផ្តើមបង្ហាញថា តម្លៃផ្ទះនៅម្តុំនេះកំពុងតែធ្លាក់ចុះហើយ ។
៦-ផ្ទះក្បែរខាងត្រូវគេបោះបង់ចោល ៖
បញ្ហាធំជាងផ្ទះលក់ទៅទៀត គឺផ្ទះដែលត្រូវគេទុកចោល ឬន័យម្យ៉ាងទៀតហៅថា ផ្ទះលក់មិនដាច់នោះឯង ។ វាជាកត្តាសំខាន់ដែលធ្វើឲ្យអ្នកលក់ផ្ទះកាន់តែលំបាកឡើង ព្រោះសភាពព័ទ្ធជុំវិញមិនគួរចង់ឲ្យទិញឡើយ ។
៧-បរិស្ថានជុំវិញអន់ថយ ៖
មិនថាជាដើមឈើ សភាពផ្លូវ ឬសួនសាធារណៈ ដែលមិនបានទទួលការថែទាំ ហើយបណ្តោយឲ្យខូចបង់ទ្រុឌទ្រោម បរិយាកាសស្ងាត់ជ្រងំមិនគួរឲ្យរស់នៅ ។
៨-មានចោរលួចច្រើនឡើង ៖
រឿងនេះសំខាន់ណាស់ ព្រោះជាសុវត្ថិភាពនៅក្នុងទីតាំង ហើយបើសិនជាមានចោរលួចឡើងផ្ទះញឹកញាប់ ក៏គួរតែប្រញាប់ចាកចេញពីទីតាំងនោះឲ្យបានលឿនបំផុត ព្រោះនេះសំដៅដល់សន្តិសុខក្នុងជីវិត និងទ្រព្យសម្បត្តិរបស់អ្នក។
យើងសូមណែនាំឲ្យអ្នកសង្កេតលើចំណុចទាំងនេះជាប្រចាំ ព្រោះបើសិនជារកឃើញលើសពី៣ចំណុចនោះ គួរតែប្រញាប់លក់ផ្ទះចេញ ហើយផ្លាស់ប្តូរទីតាំងទៅកន្លែងផ្សេងទៀតដែលគួរឲ្យរស់នៅជាងនេះ ៕
ចែករំលែកព័តមាននេះ