មនុស្ស១.០០០នាក់ បានប្រមូលផ្តុំគ្នាកាលពីថ្ងៃទី៨ មីនា នៅមុខអគាររដ្ឋាភិបាលដ៏សំខាន់មួយក្នុងរាជធានីកូវ៉ែត ដើម្បីទាមទារការកែទម្រង់នយោបាយ និងសេរីភាពថែមទៀត ។
ពុំមានសេចក្តីរាយការណ៍ពីការកើតមានឧប្បត្តិហេតុណាមួយឡើយក្នុងឱកាសនៃបាតុកម្មនេះ ដែលស្ថិតក្រោមការតាមឃ្លាំមើលរបស់កងកម្លាំងសន្តិសុខ ដែលឡោមព័ទ្ធទីលាន SAFAT នៅកណ្តាលក្រុងកូវ៉ែត ។ នៅលើបដាពាក្យស្លោកពួកបាតុករសរសេរទាមទារថា «ប្រទេសថ្មីមួយជាមួយនាយករដ្ឋមន្ត្រីថ្មី» ។
នេះជាបាតុកម្មលើកដំបូងមួយនៅកូវ៉ែតចាប់តាំងពីផ្ទុះការបះបោរក្នុងពិភពអារ៉ាប់មក ។ ក៏ប៉ុន្តែប្រទេសនៅឈូងសមុទ្រពែរ្ស៍នេះដែលសំបូរដោយធនធានប្រេងកាតកាលពីមុន ក៏ធ្លាប់មានបាតុកម្មតវ៉ាដែរ ។ បណ្តាសមាជិកសភាគណបក្សប្រឆាំងកូវ៉ែតបានធ្វើការប្រឆាំងដោយជំហនឹងប្រព័ន្ធអំណាច ។ នាយករដ្ឋមន្ត្រីលោក CHEIKH NASSERAL MOHAMMED AL SABAH បានគេចផុតពីការដាក់ញត្តិមិនទុកចិត្តចំនួន២លើករួចមកហើយ។
ចាប់តាំងពីច្រើនសប្តាហ៍មកហើយ តំបន់ឈូងសមុទ្រពែរ្ស៍ជាទីលាននៃការពុះកញ្ជ្រៀលខាងនយោបាយពុំធ្លាប់មានពីមុនមក ។ នៅបារ៉ែន ជារាជាណាចក្រមួយកើតមានបាតុកម្មតវ៉ានានាចាប់តាំងពី៣សប្តាហ៍មកហើយ ដែលជួនកាលជាមួយនឹងការប៉ះទង្គិចបង្ហូរឈាមគ្នាផង ។ ក៏មានបាតុកម្មនៅអូម៉ង់ និងនៅអារ៉ាប៊ី សាអូឌីត ព្រមទាំងនៅយេម៉ែនទៀត ៕
ចែករំលែកព័តមាននេះ