រាជធានីភ្នំពេញ ៖ក្រសួងធនធានទឹក និងឧតុនិយមបានបញ្ជាក់ថា នៅថ្ងៃទី២២-២៥ កម្ពុជារងឥទ្ធិពលព្យុះទី២០ ឈ្មោះនេសាទ ( NESAT)នឹងធ្វើឲ្យមានភ្លៀងធ្លាក់ និងបាតុភូតផ្គរ រន្ទះ និងខ្យល់កន្ត្រាក់។
យោងតាមសេចក្តីជូនដំណឹងស្តីពីស្ថានភាពធាតុអាកាសចាប់ពីថ្ងៃទី១៩-២៥ ខែតុលា ឆ្នាំ២០២២ បានលើកឡើង នៅថ្ងៃទី១៩-២១ ខែតុលាព្រះរាជណាចក្រកម្ពុជាបន្តទទួលឥទ្ធិពលនូវទ្រនុងសម្ពាធខ្ពស់ពីប្រទេសចិន។ចំណែកព្យុះទី២០ឈ្មោះនេសាទ (NESAT) ដែលបានកើតឡើងនៅភាគខាងជើងហ្វីលីពីន និងថមថយឥទ្ធិពលនៅពេលធ្វើដំណើរដល់ប៉ែកខាងក្រោមនៃភាគខាងជើងវៀតណាមនៅថ្ងៃទី២១ ខែតុលា។ចាប់ពីថ្ងៃទី២២-២៥ ខែតុលាឥទ្ធិពលនៃទ្រនុងសម្ពាធខ្ពស់ពីចិនចុះខ្សោយ ខណៈដែលជ្រលងសម្ពាធទាបពីសមុទ្រចិនខាងត្បូងបង្កើនឥទ្ធិពលមកលើភាគខាងត្បូងកម្ពុជា។
ក្រសួងបានលើកឡើងថា ស្ថានភាពបែបនេះនឹងធ្វើឲ្យតំបន់ទំនាបកណ្តាល ៖ មានសីតុណ្ហភាពអប្បបរមាមានពី២២-២៤ អង្សាសេ និង សីតុណ្ណភាពអតិបរមាមានពី៣០-៣២អង្សាសេ។ចាប់ពីថ្ងៃទី១៩-២១ ខែតុលា ស្ទើរតែគ្មានភ្លៀង បើមានតិចតួចតែប៉ុណ្ណោះ។
ក្រសួងបន្ថែមថា បន្ទាប់ពីនោះបណ្តារាជធានី-ខេត្ត នៅភាគខាងក្រោមនិងខាងជើងជាប់ប្រទេសវៀតណាមនឹងមានភ្លៀងក្នុងកម្រិតពីតិចទៅបង្គួរលាយឡំទៅដោយផ្គរ រន្ទះ និងខ្យល់កន្ត្រាក់។ចំពោះបណ្តាខេត្តដទៃទៀតអាចមានភ្លៀងតិចតួច។
ចំណែកតំបន់ខ្ពង់រាបមាន សីតុណ្ហភាពអប្បបរមា មានពី២០-២២ អង្សាសេសីតុណ្ហភាពអតិបរមាមានពី២៩-៣១ និងចាប់ពីថ្ងៃទី១៩-២១ ខែតុលា បើមានតិចតួចតែប៉ុណ្ណោះ។បន្ទាប់ពីនោះនឹងអាចមានភ្លៀងក្នុងកំរិតពីតិចទៅមធ្យមលាយឡំទៅដោយផ្គរ រន្ទះ និងខ្យល់កន្ត្រាក់។
ដោយឡែកតំបន់មាត់សមុទ្រសីតុណ្ហភាពអប្បបរមាមានពី២២-២៤និងសីតុណ្ណភាពអតិបរមាមានពី២៩-៣១។អាចមានភ្លៀងក្នុងកម្រិតពីតិចទៅបង្គួរលាយឡំទៅដោយផ្គរ រន្ទះ និងខ្យល់កន្ត្រាក់៕
ចែករំលែកព័តមាននេះ