រដ្ឋាភិបាលរបស់ប្រធានាធិបតីចប់អាណត្តិកូតឌីវ័រ តែពុំព្រមចាកចេញពីអំណាច លោកឡូរ៉ង់ ហេ្សបាបូ បានសំរេចកាលពីថ្ងៃទី៩ មីនា ហាមឃាត់សកម្មភាពរបស់យន្តហោះ ឬឧទ្ធម្ភាគចក្រនៃប្រតិបត្តិការអ.ស.ប នៅកូតឌីវ័រ ONUCI និងកងកម្លាំង LICORNE របស់បារាំងហោះហើរ ឬចុះចតក្នុងដែនដីកូតឌីវ័រ។
អនុក្រិត្យអន្តរក្រសួងមួយអានតាមទូរទស្សន៍រដ្ឋគូសបញ្ជាក់ថា យន្តហោះ ឬឧទ្ធម្ភាចក្ររបស់ ONUCI និងរបស់ LICORNE ត្រូវហាមឃាត់មិនឱ្យហោះហើរ និងចុះចតលើដែនដីកូតឌីវ័រ។ យោងតាមក្រសួងដឹកជញ្ជូន ក្រសួងមហាផ្ទៃ និងក្រសួងឧបករណ៍របស់រដ្ឋាភិបាលលោកហ្សេបាបូ ដែលជាអ្នកចុះហត្ថលេខាលើឯកសារនេះថា គោលបំណងនៃការបញ្ឈប់នោះ គឺដើម្បីថែរក្សាបូរណភាពដែនដីជាតិ និងសន្តិសុខ។ រាល់ការហោះហើរ ឬចុះចតត្រូវសុំការអនុញ្ញាតជាមុនពីរដ្ឋមន្ត្រីដឹកជញ្ជូន។
ONUCI និងកងកម្លាំង LICORNE បារាំងជាផ្លូវការទទួលបន្ទុកថែរក្សាសន្តិភាពនៅកូតឌីវ័រ។ ចាប់តាំងពី ផ្ទុះវិបត្តិក្រោយការបោះឆ្នោតមក ONUCI បានរៀបចំការល្បាតតាមជើងគោក និងជើងអាកាសក្នុងប្រទេសនេះដើម្បីការពារប្រជាជនស៊ីវិល។ កងកម្លាំងអ.ស.បនាពេលថ្មីៗនេះបានពង្រឹងសមត្ថភាពនៃការបញ្ចេញប្រតិកម្មជាមួយនឹងការទទួលបានឧទ្ធម្ភាគចក្រប្រយុទ្ធធុន MI-24 ចំនួន៣គ្រឿង។
ក្រុមលោកហ្សេបាបូ បានចោទប្រកាន់កងកម្លាំងអ.ស.ប និងកងកម្លាំង LICORNE ថា បានរួមដៃជាមួយកងកម្លាំងនៃកងទ័ពថ្មី (អតីតពួកឧទ្ទាម) គាំទ្រក្រុមលោកអាឡាសសានអ៊ូអាតារ៉ា ហើយស្នើឱ្យកងកម្លាំងទាំងនេះដកចេញពីកូតឌីវ័រ ៕
ចែករំលែកព័តមាននេះ