អគ្គិភ័យយ៉ាងធំមួយឆាបឆេះឃ្លាំងស្តុកអាវុធ និងគ្រាប់រំសេវសំខាន់មួយនៅជិតភាគខាងកើតអ៊ុយក្រែនជាតំបន់បំបែកខ្លួន បណ្តាលឱ្យមានអណ្តាតភ្លើងយ៉ាងខ្ពស់ និងពពកផ្សែងយ៉ាងក្រាស់នាថ្ងៃទី២៣ មីនា ។
អគ្គិភ័យយ៉ាងធំឆេះឃ្លាំងអាវុធ និងគ្រាប់រំសេវនេះត្រូវការពេលវេលាច្រើនថ្ងៃ ទើបអាចពន្លត់បាន ខណៈក្រុងគៀវបរិហារពីការធ្វើវិច្ឆេទកម្មមួយរួចការស៊ើបអង្កេតរកមូលហេតុកំពុងបន្ត ។
មកដល់រសៀលថ្ងៃទី២៣ មីនា ផ្សែងយ៉ាងក្រាស់នៅតែហុយពីលើឃ្លាំងនេះនៅ BALAKLIIA ។ តាម AFP ថា អណ្តាតភ្លើងនៅបាញ់ឡើងលើកម្ពស់ច្រើនម៉ែត្រ ខណៈស្នូរផ្ទុះគ្រាប់ខ្លាំងៗ កើតមានជាប់មិនដាច់ ព្រោះគ្រាប់ធុនធ្ងន់ផ្ទុះក្រោមកំដៅភ្លើង ។
អគ្គិភ័យនេះដែលកើតជាមួយការផ្ទុះគ្រាប់រំសេវកើតមានពីយប់ថ្ងៃទី២២ មក២៣ មីនា ក្នុងឃ្លាំងស្តុកអាវុធនៅ BALAKLITA ជិតក្រុង KHARKIV ។ នាយករដ្ឋមន្ត្រីអ៊ុយក្រែន លោក VOLODYMYR GROISSMAN បានទៅកាន់ទីនោះ ហើយគូសបញ្ជាក់ថា គេត្រូវការពេលវេលាប៉ុន្មានថ្ងៃរហូតដល់មួយសប្តាហ៍ ទើបអាចពន្លត់ភ្លើងបាន ។ លោកបន្តថា ៥០%នៃមូលដ្ឋានយោធានៅតែមានភ្លើងឆេះ ។
ឃ្លាំងនេះមានស្តុកគ្រាប់ និងគ្រាប់កាំភ្លើងធំដល់ទៅជាង១៣៨.០០០តោន ។ មូលហេតុនៃការឆេះនេះនៅពុំទាន់ច្បាស់ ក៏ប៉ុន្តែអយ្យការយោធាបានបើកការស៊ើបអង្កេតមួយពីការធ្វើវិច្ឆេទកម្ម និងការធ្វេសប្រហែស ។ តាមការសាកសួរសាក្សីនានានិយាយថា ពួកគេបានឃើញការហោះហើររបស់យន្តហោះមួយហាក់ដូចជាយន្តហោះគ្មានមនុស្សបើក ហើយភ្លាមៗបន្ទាប់ពីនេះការផ្ទុះចាប់ផ្តើមនៅកន្លែង២ផ្សេងគ្នា ។ ពួកអ្នកស៊ើបអង្កេតផ្តោតលើលទ្ធភាពនៃគ្រឿងផ្ទុះមួយទម្លាក់ពីយន្តហោះគ្មានមនុស្សបើក ។ មនុស្សសរុប២០.០០០នាក់ ត្រូវបានជម្លៀសចេញក្នុងរង្វង់១០គីឡូម៉ែត្រ ៕
ចែករំលែកព័តមាននេះ