ចៅក្រមតុលាការកំពូលលើកពេលប្រកាសសាលដីកាលោក នី ចរិយា
រាជធានីភ្នំពេញ ៖ ចៅក្រមតុលាការកំពូលនៅព្រឹកថ្ងៃទី24 ខែមីនា ឆ្នាំ2017 បានបើសវនាការជម្រះក្តីបណ្តឹងសុំនៅក្រៅឃុំរបស់លោក នី ចរិយា មន្ត្រី គ.ជ.ប
រាជធានីភ្នំពេញ ៖ ចៅក្រមតុលាការកំពូលនៅព្រឹកថ្ងៃទី24 ខែមីនា ឆ្នាំ2017 បានបើសវនាការជម្រះក្តីបណ្តឹងសុំនៅក្រៅឃុំរបស់លោក នី ចរិយា មន្ត្រី គ.ជ.ប បន្ទាប់ពីលោកត្រូវបានឃាត់ខ្លួនកាលពីថ្ងៃទី28 ខែមេសា ឆ្នាំ2016 ក្រោមបទចោទប្រកាន់ថា សមគំនិតក្នុងបទសូកប៉ាន់សាក្សីកាលពីខែមីនា-មេសាឆ្នាំ2016 ។ តែត្រូវបានលើកពេលប្រកាសសាលដីកាទៅធ្វើនៅថ្ងៃទី31 ខែមីនា ខាងមុខ ។ នៅព្រឹកថ្ងៃទី24ខែមីនា ឆ្នាំ2017 មន្ត្រីពន្ធនាគារភ្នំពេញបាននាំខ្លួនជនជាប់ចោទទៅកាន់បន្ទប់សវនាការនៃតុលាការកំពូល ។ ក្រោយការបដិសេធជាបន្តបន្ទាប់លោក នី ចរិយា អគ្គលេខាធិការរងគណៈកម្មាធិការជាតិរៀបចំការបោះឆ្នោត ឬហៅកាត់ថា គ.ជ.ប នៅតែបន្តសុំឲ្យតុលាការកំពូលដោះលែងរូបលោកឲ្យមានសេរីភាពឡើងវិញ ។
គួរបញ្ជាក់ថា ក្នុងសំណុំរឿងសូកប៉ាន់សាក្សីនិងសមគំនិតមានជនត្រូវចោទ5នាក់ ហើយត្រូវបានតុលាការរកឃើញថា បានបញ្ចុះបញ្ចូល ឬលួងលោម កញ្ញា ខុម ចាន់តារាទី ហៅស្រីមុំ មិនឲ្យនិយាយការពិតដល់សមត្ថកិច្ច ចំពោះរឿងអាស្រូវផ្លូវភេទរបស់លោក កឹម សុខា ប្រធានគណបក្សសង្គ្រោះជាតិ ជនជាប់ចោទលោក នី ចរិយា ត្រូវបានសាលាឧទ្ធរណ៍ដិសេធការសុំនៅក្រៅឃុំរបស់លោកម្តងរួចមកហើយ ។
សូមបញ្ជាក់ថាលោក នី ចរិយា ត្រូវបានឃាត់ខ្លួនកាលពីថ្ងៃទី28 ខែមេសា ឆ្នាំ2016 ដោយអង្គភាពប្រឆាំងអំពើពុករលួយជាមួយនឹងបុគ្គលិកអាហុកចំនួន4នាក់ផ្សេងទៀត ។ នៅថ្ងៃទី2 ខែឧសភា ឆ្នាំ2016 តុលាការបានចោទប្រកាន់លោកពីបទសមគំនិតករណីសូកប៉ាន់សាក្សីតែលោកបានបដិសេធចំពោះការចោទប្រកាន់នេះ ។ លោកក៏ត្រូវបានតុលាការក្រុងភ្នំពេញបានផ្តន្ទាទោសលោកក្នុងសំណុំរឿងមួយផ្សេងទៀតទាក់ពាក្យបណ្តឹងរបស់ចៅក្រម និងព្រះអាជ្ញាខេត្តសៀមរាប ៕
ចែករំលែកព័តមាននេះ