«Daily Star» ផ្សាយថា មានដុំភ្លើងពណ៌ខៀវមួយភ្លឺចិញ្ចាចនៅលើវេហាស៍ ប្រទេសស៊ុយអែត ហើយផ្ទុះធ្វើឱ្យមានការភ្ញាក់ផ្អើលនៅទូទាំងប្រទេស ។ ពីដំបូងពលរដ្ឋបារម្ភខ្លាចរុស្ស៊ីឈ្លានពាន ប៉ុន្ដែអ្នកឯកទេសបញ្ជាក់ថា ជាអាចម៍ផ្កាយធ្លាក់ពីប្រទាប់បរិយាកាស ។
ដុំភ្លើងពណ៌ខៀវនោះហោះលើលំហក្នុងប្រទេសស៊ុយអែត កាលពីថ្ងៃទី២០ ខែមីនា ឆ្នាំ២០១៧ ធ្វើឱ្យពលរដ្ឋភ័យខ្លាចដុំភ្លើងនោះមានភាពចិញ្ចាចចិញ្ចែងខ្លាំង អាចមើលឃើញនៅពាសពេញប្រទេស ។ នាងឡេណា ចូហានសុន បញ្ជាក់តាមហ្វេសប៊ុកថា «ខ្ញុំ និងក្មេងស្រីម្នាក់ពេលដឹកឆ្កែដើរលេង ស្រាប់តែឃើញភ្លើងភ្លឺចិញ្ចាចចិញ្ចែងនៅលើមេឃពណ៌ខៀវគួរឱ្យភ័យខ្លាច» ។
ចំណែកលោកអេរិក ស្ដេមប៊ើល នៅវិទ្យាស្ថានតារាសាស្ដ្រនៃមហាវិទ្យាល័យ «អុបសាឡា» (Uppsala) និយាយថា វាជានិមិត្ដរូបនៃអាចម៍ផ្កាយ ដោយដុំភ្លើងចម្លែកនោះឈ្មោះ Bolide (អាចម៍ផ្កាយប្រភេទគ្រាប់បែក) ភ្លឺចិញ្ចាចចិញ្ចែង ហើយផ្ទុះក្នុងស្រទាប់បរិយាកាស ។ លោកបញ្ជាក់ថា «វាជាវត្ថុដែលកម្រប្រទះឃើញក្នុងមួយឆ្នាំៗ និងអាចកើតឡើងនៅពេលថ្ងៃ ដោយមានពពកគ្របដណ្ដប់ ឬនៅឆ្ងាយពីទីប្រជុំជន ហេតុការណ៍បែបនេះក៏មិនសូវមាននរណាម្នាក់ចាប់អារម្មណ៍ទេ» ។
អាចម៍ផ្កាយប្រភេទគ្រាប់បែកនឹងត្រូវដុតបំផ្លាញក្នុងស្រទាប់បរិកាសនៅកម្រិតខ្ពស់ប្រហែលពី២៩ដល់៤៨គីឡូម៉ែត្រ ប៉ុន្ដែចុងក្រោយនេះវាអាចធ្លាក់មកកៀកផែនដីពេក ក្នុងរយៈចម្ងាយប្រហែល២៤គីឡូម៉ែត្រ ហើយក៏ផ្ទុះតែម្ដង ៕
ចែករំលែកព័តមាននេះ