មឿន សុខហ៊ុច ចាប់ដៃ មាស ច័ន្ទមាន ប៉ះថៃនៅសង្វៀន
រាជធានីភ្នំពេញ ៖ នៅយប់ថ្ងៃអាទិត្យទី២៦ មីនា ខានស្អែកនេះ ប្រដាល់«កំពូលជើងឯកស្រាបៀរប្លេកខេត» នឹងដល់កំណត់ត្រូវប្រកួតអន្តរជាតិទៀតហើយ ដោយប្រកាសបើករេញឲ្យកីឡាករកម្ពុជា២រូប
រាជធានីភ្នំពេញ ៖ នៅយប់ថ្ងៃអាទិត្យទី២៦ មីនា ខានស្អែកនេះ ប្រដាល់«កំពូលជើងឯកស្រាបៀរប្លេកខេត» នឹងដល់កំណត់ត្រូវប្រកួតអន្តរជាតិទៀតហើយ ដោយប្រកាសបើករេញឲ្យកីឡាករកម្ពុជា២រូប និងថៃ២រូបប៉ះគ្នា ។ ការប្រកួតនៅចុងសប្ដាហ៍នេះ កីឡាករ មឿន សុខហ៊ុច ដែលទើបល្បីឈ្មោះក្នុងព្រឹត្តិការណ៍ដណ្ដើមខ្សែក្រវាត់មាសនៅប្រទេសថៃបើទោះមិនបាន និងកីឡាករមាស ច័ន្ទមាន ដែលសុទ្ធតែជាជើងខ្លាំងត្រូវបានសង្វៀនមួយនេះបើកផ្លូវឱ្យស្វាគមន៍កីឡាករថៃមកពីទីក្រុងបាងកក ដោយរំពឹងថា ការប្រកួតនៅយប់ថ្ងៃអាទិត្យនេះនឹងកក្រើកសង្វៀនខ្លាំងមិនខាន ។
ការប្រកួតដែលនឹងធ្វើឡើងចាប់ពីម៉ោង៨យប់ក្រោមការរៀបចំរបស់ស្រាបៀរBlack Cat និងស្ថិតនៅលើសង្វៀនទូរទស្សន៍អាស៊ីអាគ្នេយ៍នេះ ត្រូវគេឃើញមានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ ដោយសារតែភាពជាក់ស្ដែងគឺព្រឹត្តិការណ៍ដំណើរការចំពេលរាត្រីថ្ងៃអាទិត្យ ដែលមានអ្នកទស្សនាយ៉ាងកកកុញស្រាប់ ដោយសូម្បីតែការប្រកួតស្ថិតក្នុងលក្ខណៈជាតិ និងជាតិក្ដី ។ កីឡាករកម្ពុជាទាំង២ខាងលើ នឹងក្លាយជាគូប្រកួតស៊ីសាច់ហុតឈាមជាមួយកីឡាករថៃនៅយប់ថ្ងៃអាទិត្យ ដែលនឹងមកដល់នៅថ្ងៃស្អែក ។ អ្នករៀបចំការប្រកួតបានអះអាងថា កីឡាករទាំង៤មានបំណងប៉ះគ្នាយូរហើយមុនពេលមានការសម្រេចរៀបចំព្រឹត្តិការណ៍អន្តរជាតិរបស់ស្រាបៀរប្លេកខេតឲ្យពួកគេប្រកួតគ្នានេះ ។ ក្នុងនោះភាគីកីឡាករកម្ពុជាបានទាំងសុំខ្លួនឯងក្នុងការចង់សាកកណ្ដាប់ដៃគ្នាតាំងពីឮមានការផ្គូផ្គងនោះផង ។
លោក ញាណ សុធី អ្នករៀបចំការប្រកួតប្រចាំនៅទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជា លោកបានសម្រេចចិត្តដាក់ មឿន សុខហ៊ុច មកពីក្លិបពុទ្ធសិរីវង្សកីឡា ឱ្យឡើងប្រកួតជាមួយកីឡាកថៃឈ្មោះMa Phechhit ក្នុងនាមជាគូឯកអន្តរជាតិសម្រាប់ប្រដាល់អន្តរជាតិនៅយប់ថ្ងៃអាទិត្យនោះ ។ លោកថា ជំនួបរវាងពួកគេមិនមែនជារឿងចៃដន្យនោះទេ ដោយលោកថាភាគីទាំងពីរសុទ្ធតែបានដឹងពីគ្នា និងទទួលយកការផ្គូផ្គងសម្រាប់ការជួបគ្នានោះផង ។ កីឡាករ មឿន សុខហ៊ុច លោកចាត់ទុកថា ជាជើងខ្លាំងម្នាក់នៅលើសង្វៀនប្រដាល់អន្តរជាតិ ទើបសម្រេចឱ្យឡើងប្រកួតនៅលើសង្វៀនBlack Cat ដែលជាព្រឹត្តិការណ៍ចម្រុះតែកីឡាករខ្លាំងៗនៅក្នុងពិភពប្រដាល់ ។ លោកជឿជាក់ថាសមត្ថភាពកីឡាកររូបនេះវាយសន្ធាប់បានល្អ បើទោះជាមុននេះបន្តិចគេត្រូវបរាជ័យក្នុងការដណ្ដើមខ្សែក្រវាត់នៅប្រទេសថៃ ធ្វើឱ្យអ្នកគាំទ្រខកចិត្តក្ដី ។ លោកថា គូនេះជាជំនួបអ្នកខ្លាំងប៉ះអ្នកខ្លាំង ទើបលោករំពឹងយ៉ាងច្រើនថាការប្រកួតដែលនឹងធ្វើឡើងពិតជាល្អត្រូវចិត្ត ។ ក្នុងជំនួបគូនេះ កីឡាករថៃMa Phechhit ធ្លាប់ប្រកួត១២០លើក ឈ្នះ៩៦លើក ចាញ់១០លើក និងស្មើ១លើក ក្នុងពេលដែលកីឡាករកម្ពុជា ធ្លាប់ប្រកួត៨២លើក ឈ្នះ៦៥លើក ចាញ់២១លើក និងស្មើ៣លើក ។
សម្រាប់កីឡាករមាស ច័ន្ទមាន លោក ញាណ សុធី បញ្ជាក់ថា គេត្រូវប៉ះប្រកួតជាមួយកីឡាករជើងខ្លាំងរបស់ថៃឈ្មោះPhat Chhayakphum នៅក្នុងព្រឹត្តិការណ៍ប្រដាល់អន្តរជាតិរបស់ស្រាបៀរBlack Cat នៅយប់ថ្ងៃអាទិត្យនោះដែរ ។
លោកថា ការប្រកួតរបស់គូនេះនៅមិនទាន់ដឹងថាអ្នកណាល្អជាងអ្នកណានោះទេក្នុងពេលដែល មាស ច័ន្ទមាន ឡើងកូដតែពេលខ្លះម្ដងគេល្អម្ដងធ្លាក់ដៃពិបាកប៉ាន់ស្មានពីកម្រិតប្រកួត១០០ភាគរយ ហើយកីឡាករថៃក៏មិនណយ ។ លោកថា កីឡាករថៃធ្លាប់ប្រកួត៨១លើក ឈ្នះ៦៥លើក ចាញ់១៦លើក រីឯកីឡាករកម្ពុជាធ្លាប់ប្រកួត១១៩លើក ឈ្នះ៩១លើក ចាញ់២៥លើក និងស្មើ៣លើក ។ នៅក្នុងព្រឹត្តិការណ៍ប្រដាល់ពេលព្រឹកនៅលើសង្វៀនអាស៊ីអាគ្នេយ៍ថ្ងៃអាទិត្យនោះដែរ ក៏មានការប្រកួតអន្តរជាតិផងដែរ ខណៈនាល្ងាចថ្ងៃសៅរ៍នេះក៏មានការប្រកួតមិត្តភាពរវាងកីឡាករខ្លាំងៗនៅប៉ុស្ដិ៍លេខ៥ផងដែរ ៕
ចែករំលែកព័តមាននេះ