រាជធានីភ្នំពេញ ៖ ការប្រកួតប្រដាល់នៅលើសង្វៀនទូរទស្សន៍ស៊ីអិនស៊ីថ្ងៃអាទិត្យទី២៦ មីនា ខានស្អែកនេះ ប្រជុំដោយអ្នកប្រដាល់ជើងចាស់និងជើងថ្មីចំនួន៦គូ ក្នុងនោះគូដែលគេចាប់អារម្មណ៍ជាងគេមានចំនួន២គូ ។
ជឹម សារ៉ាត់ មកពីក្លិបតាព្រហ្មមានជ័យត្រូវជួបប្រកួតជាមួយប្រាក់ ស៊ីណាត មកពីក្លិបតាឯកដំបងដែកមានរិទ្ធ ។ គូនេះម្ខាងជាអ្នកប្រដាល់ចាស់វស្សានិងម្ខាងទៀតជាអ្នកប្រដាល់
ជើងថ្មីទើបតែឡើងកូដទើបអ្នកធ្លាប់តាមដានការប្រកួតភាគច្រើនមានការចាប់អារម្មណ៍យ៉ាងខ្លាំង ។ ជឹម សារ៉ាត់ ជាអ្នប្រដាល់ជើងចាស់មួយរូបដែលធ្លាប់សាងកេរ្តិ៍ឈ្មោះនៅលើសង្វៀនយ៉ាងល្បីល្បាញ ប៉ុន្តែមួយរយៈមកនេះមិនសូវឃើញលេចមុខនៅលើសង្វៀនញឹកញាប់ដូចមុនទៀតឡើយ ។ ទើបតែលើកនេះប៉ុណ្ណោះដែលគណៈកម្មការរៀបចំការប្រកួតផ្ដល់ឱកាសឱ្យគេឡើងសង្វៀនជួបប្រកួតសាកកម្លាំងជាមួយអ្នកប្រដាល់ជំនាន់ក្រោយ។
សម្រាប់ការប្រកួតនេះទៀត គេមិនទាន់ដឹងថា ជឹម សារ៉ាត់ អាចបំបាក់ធ្មុងអ្នកប្រដាល់ជំនាន់ក្រោយម្នាក់នេះបានឬអត់នោះទេ ។ ទោះជាយ៉ាងណា ជឹម សារ៉ាត់ ទាំងកម្លាំងនិងល្បិចប្រយុទ្ធមិនទាន់ចុះខ្សោយ ក្នុងពេលប្រាក់ ស៊ីណាត អាងតែកម្លាំងមួយមុខគត់ និងចេះប្រើតែស្នៀតកណ្ដាប់ដៃនិងស្នៀតជើងប៉ុណ្ណោះ ។
មួយគូទៀត សួង សុវណ្ណថា មកពីសមាគមកីឡាប្រដាល់ក្រសួងការពារជាតិ ប្រកួតជាមួយចាន់ សច្ចា មកពីក្លិបតាព្រហ្មមានជ័យ។
សួង សុវណ្ណថា មានបទពិសោធន៍ប្រកួតនៅលើសង្វៀនយូរឆ្នាំជាងចាន់ សច្ចា ប៉ុន្តែសម្រាប់ការប្រកួតលើកនេះ មិនប្រាកដថាអាចផ្ដួលចាន់ សច្ចា បានទេ ។ សួង សុវណ្ណថា ទាំងស្នៀតកែងនិងជង្គង់របស់គេពេលវាយចេញម្តងៗបង្កគ្រោះថ្នាក់បំផុតដល់គូប្រកួត ។ តែគេមិនហ៊ានសន្យាទុកមុនថា អាចផ្ដួលអ្នកប្រដាល់ជំនាន់ក្រោយរូបនេះបានឬអត់នោះទេ ។ ចំណែកចាន់ សច្ចា មួយរយៈមកនេះដូចជាឡើងកូដជាងមុនបន្តិច ។ ដូច្នេះបើទោះជាគេមិនសូវពូកែខាងប្រើល្បិចប្រកួតមែន តែសម្រាប់កម្លាំងវិញនោះគឺមានគ្រប់គ្រាន់មិនចាញ់សួង សុវណ្ណថា ឡើយ។
ចំណែកគូប្រកួតមិត្តភាពផ្សេងទៀតមាន សៅ សេងហុង មកពីក្លិបឃ្លាំងមឿងកីឡាប្រកួតជាមួយសិទ្ធ បូណា មកពីក្លិបសាមគ្គីកូនខ្មែរ។
ឡុង បញ្ញា មកពីក្លិបខ្លារខិនមានរិទ្ធ ប្រកួតជាមួយកេត ចាន់ឌី មកពីសមាគមកីឡាប្រដាល់ក្រសួងការពារជាតិ ។ ចាត ស៊ីចាន់ មកពីក្លិបអប់រំកាយស្រុកអន្លង់វែង ប្រកួតជាមួយ ជ័យ ប៊ុនសុង មកពីក្លិបគីសែមានរិទ្ធ និងគូចុងក្រោយ ពុទ្ធ ធារិទ្ធ មកពីក្លិបពុទ្ធសេរីវង្សកីឡា ប្រកួតជាមួយផល រស្មី មកពីក្លិបកងពលតូចលេខ៧០ ៕
ចែករំលែកព័តមាននេះ