រាជធានីភ្នំពេញ ៖ បុរសម្នាក់ដែលមានមុខរបរជាអ្នករកស៊ីម៉ៅការសាងសង់ផ្ទះម្នាក់ កាលពីព្រឹកថ្ងៃទី២៤ មីនា នេះ ត្រូវបានសមត្ថកិច្ចការិយាល័យស៊ើបការនៃនាយកដ្ឋាននគរបាលព្រហ្មទណ្ឌក្រសួងមហាផ្ទៃឃាត់ខ្លួន ខណៈកំពុងធ្វើដំណើរតាមរថយន្តម្តុំបឹងត្របែក ។
ការចាប់ខ្លួននេះ ត្រូវសមត្ថកិច្ចអះអាងថា ជាការធ្វើឡើងតាមដីកាបញ្ជាឲ្យចូលខ្លួនរបស់ស្ថាប័នអយ្យការ អមសាលាដំបូងរាជធានីភ្នំពេញ ។ បុរសម្នាក់នោះឈ្មោះថាច់ មនោរក្ស ជាអ្នកម៉ៅការសំណង់ ស្នាក់នៅផ្ទះលេខ២០៣បេអឺ០ ផ្លូវ២០៨ សង្កាត់បឹងរាំង ខណ្ឌដូនពេញ ។
ទាក់ទិនការចាប់ឃាត់ខ្លួនអ្នកម៉ៅការសំណង់រូបនេះ គឺជាការអនុវត្តតាមដីការបស់ស្ថាប័នអយ្យការ យោងតាមពាក្យបណ្តឹងរបស់ឈ្មោះអ៊ិត ដាលី ភេទស្រី អាយុ៦២ឆ្នាំ ស្នាក់នៅផ្ទះលេខ៥៨៣ ផ្លូវលេខ១០១៩ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។ ក្នុងពាក្យបណ្តឹងអ្នកស្រីអ៊ិត ដាលី បានប្តឹងឈ្មោះថាច់ មនោរក្ស ពីបទ.ឆបោកប្រាក់ចំនួន១ម៉ឺន៤ពាន់៤រយដុល្លារអាមេ
រិក ។
ពាក្យបណ្តឹងបញ្ជាក់ទៀតថា កាលពីថ្ងៃទី១០ កញ្ញា ២០១៥ អ្នកស្រីអ៊ិត ដាលី និងឈ្មោះថាច់ មនោរក្ស បានធ្វើកិច្ចសន្យាសាងសង់ផ្ទះ ដែលស្ថិតនៅលើក្បាលដីលេខ៩០៣ ផ្លូវលំ ភូមិរោងចក្រ សង្កាត់ភ្នំពេញថ្មី ខណ្ឌសែនសុខ និងត្រូវសង់ផ្ទះកំពស់២ជាន់ ដោយក្នុងតម្លៃនៃការសាងសង់ផ្ទះនោះ សរុប១០.១០០០ដុល្លារអាមេរិក និងបានកំណត់រយៈពេលនៃការសាងសង់ឱ្យរួចរាល់ជាស្ថាពរ៨ខែ គិតចាប់ពីថ្ងៃបុកគ្រឹះ និងត្រូវទូទាត់ប្រាក់៦ដំណាក់កាល ។
ក្រោយពីធ្វើកិច្ចសន្យាឈ្មោះថាច់ មនោរក្ស បានធ្វើការសាងសង់ និងបើកប្រាក់រហូតដល់ដំណាក់កាលទី៥ លុះក្រោយមក ឈ្មោះ ថាច់ មនោរក្ស ទៅយកប្រាក់បន្តិចម្តងៗ រហូតដល់ទៅ១៤.៤០០ដុល្លារថា យកទៅទិញសម្ភារទុក សម្រាប់តម្រូវការសាងសង់ និងគ្រឿងតុបតែងផ្ទះ ឲ្យបានរួចរាលតាមកិច្ចសន្យាដែលភាគីទាំងពីរបានធ្វើជាមួយគ្នា ។
តែនៅពេលឈ្មោះ ថាច់ មនោរក្ស បានទទួលប្រាក់ដូចចំនួនខាងលើនេះហើយ មិនបានធ្វើការសាងសង់តាមកិច្ចសន្យានោះទេ បែជាគេចខ្លួន ដែលទង្វើខាងលើនេះសបញ្ជាក់ឲ្យឃើញថា ពិតជាមានចេតនាទុច្ចរិតក្នុងការប្រព្រឹត្តអំពើឆបោកលើទឹកប្រាក់ចំនួន១៤៤០០ដុល្លារអាមេរិកទៅលើដើមបណ្តឹងមែន ។
ចែករំលែកព័តមាននេះ