ប្រទេសរុស្ស៊ីកាលពីថ្ងៃទី២៣ មីនា បានព្រមានសហរដ្ឋអាមេរិកប្រឆាំងរាល់ការប៉ុនប៉ងប្រើប្រាស់ការបាញ់បណ្តាមីស៊ីលរបស់កូរ៉េខាងជើងធ្វើជាហេតុផលសម្រាប់ពង្រឹងវត្តមានយោធារបស់ខ្លួននៅឧបទ្វីបកូរ៉េ ។
ក្នុងសន្និសីទសារព័ត៌មានមួយអ្នកនាំពាក្យក្រសួងការបរទេសរុស្ស៊ី លោកស្រី MARIA ZKHAROVA ថ្លែងថា យើងយល់ថា វាជាការមិនអាចទទួលយកបាន ដែលគេប្រើប្រាស់សភាពការណ៍បច្ចុប្បន្ន ដើម្បីប៉ុនប៉ងដណ្តើមយកប្រៀបខាងយោធាជាឯកតោភាគី ដោយបញ្ជូនយ៉ាងច្រើនគ្រឿងសព្វាវុធថ្មីៗមកកាន់តំបន់នេះ ។ លោកស្រីបន្តថា ក្រុងមូស្គូចាត់ទុកការដាក់ពង្រាយប្រព័ន្ធការពារប្រឆាំងមីស៊ីលអាមេរិក THAAD នៅកូរ៉េខាងត្បូងថា ជាកត្តាសំខាន់មួយនៃការបង្កអស្ថេរភាព ។ ដោយពុំមានដំណោះស្រាយទាំងស្រុង បណ្តាបញ្ហាបច្ចុប្បន្នតាមមធ្យោបាយ នយោបាយ និងការទូត និងដោយមិនគិតដល់ការព្រួយបារម្ភរបស់គ្រប់ភាគីដែលទាក់ទិននោះ គេពុំអាចឈានទៅរកសន្តិភាព និងស្ថិរភាពនៅអាស៊ីភាគឦសានបានឡើយ ។
ស្ត្រីអ្នកនាំពាក្យក្រសួងការបរទេសរុស្ស៊ីបន្តថា ដើម្បីអាចចាកចេញពីភាពទល់ច្រកបច្ចុប្បន្ន បើតាមយើងយល់គឺគ្មានដំណោះស្រាយណាផ្សេងក្រៅពីការស្វែងរករួមគ្នានូវយុទ្ធសាស្ត្រ ថ្មីមួយកាន់តែស្ថាបនានូវភាពធូរស្រាលខាងយោធា និងខាងនយោបាយទូទៅ ព្រមទាំងការលុបបំបាត់ចោលការប្រឈមមុខដាក់គ្នាក្នុងតំបន់ឡើយ ។
ក្រសួងការពារប្រទេសកូរ៉េខាងត្បូងថ្លែងកាលពីថ្ងៃទី២២ មីនា ថា កូរ៉េខាងជើងបានធ្វើការសាកល្បងមីស៊ីលថ្មី ប្រាកដណាស់ជាការឆ្លើយតបចំពោះសមយុទ្ធយោធារួម FOAL EAGLE និង KEY RESOLVE ដែលរៀបចំធ្វើដោយសហរដ្ឋអាមេរិក និងកូរ៉េខាងត្បូង ។ ការបាញ់សាកល្បងមីស៊ីលនេះត្រូវបរាជ័យ ព្រោះវាផ្ទុះពេលកំពុងហោះហើរ ។
កូរ៉េខាងត្បូងបានផ្តួចផ្តើមគំនិតជាបន្ទាន់ឱ្យមានដំណើរការនៃការដាក់ពង្រាយប្រព័ន្ធការពារមីស៊ីល THAAD របស់អាមេរិក ទោះបីមានការប្រឆាំងកំពុងបន្តរបស់ពលរដ្ឋខ្លួន និងរបស់បណ្តាប្រទេសជិតខាងក្តី ។ ប្រព័ន្ធការពារនោះចំនួន២ ព្រមទាំងឧបករណ៍ទាក់ទិនឯទៀតៗ ត្រូវបានបញ្ជូនមកដល់ទីតាំងដាក់ពង្រាយនៅកូរ៉េខាងត្បូង រួចហើយកាលពីដើមខែមីនានេះ ។
ក្នុងសន្និសីទសារព័ត៌មានរួមមួយជាមួយរដ្ឋមន្ត្រីការបរទេសកូរ៉េខាងត្បូង លោក YUN BYUNG រដ្ឋមន្ត្រីការបរទេសអាេមរិកលោក REX TILLERSON ថ្លែងនៅក្រុងសេអ៊ូលថា វិធានការមួយចំនួនចំពោះកូរ៉េខាងជើង កំពុងតែរៀបចំ ហើយលោកនិយាយពីបរាជ័យនៃការខិតខំប្រឹងប្រែងខាងការទូត និងភាពចាំបាច់នៃការចាត់ការថ្មី ។ លោករហូតដល់ប្រកាសថា ការប្រើប្រាស់កម្លាំងយោធាប្រឆាំងកូរ៉េខាងជើងជាលទ្ធភាពមួយ ។ ច្បាស់ណាស់ លោកបានគំរាមក្រុងព្យុងយ៉ាងពីសង្គ្រាមមួយ ៕
ចែករំលែកព័តមាននេះ