នារីម្នាក់លាតត្រដាងជីវិត ពេលរត់ចេញពីផ្ទះ8ឆ្នាំ ទីបំផុតរត់ឱ្យប៉ូលិសជួយ
រាជធានីភ្នំពេញ ៖ នារីវ័យក្មេងម្នាក់បានបង្ហាញនូវការស្តាយក្រោយ ចំពោះទង្វើរបស់ខ្លួនដោយសារតែខឹងម្តាយអត់ឱ្យលុយចាយ ក៏បានរត់ចេញពីផ្ទះ
រាជធានីភ្នំពេញ ៖ នារីវ័យក្មេងម្នាក់បានបង្ហាញនូវការស្តាយក្រោយ ចំពោះទង្វើរបស់ខ្លួនដោយសារតែខឹងម្តាយអត់ឱ្យលុយចាយ ក៏បានរត់ចេញពីផ្ទះ ដែលរហូតមកដល់ពេលនេះមានមានរយៈពេល៨ឆ្នាំហើយ រស់នៅដោយផ្ញើខ្លួនប្រាណជាមួយមិត្តភក្កិ និងចុងក្រោយចាញ់បោកបុរសម្នាក់តាមទូរសព្ទ័ យកនាងទៅបង្ខាំងទុកក្នុងផ្ទះសំណាក់ ។
ដោយសារតែដឹងខ្លួនទាន់ពេលនាងនៅជាមួយបុរសនោះបាន២យប់ ក៏បានប្រើល្បិចចេញពីក្នុងបន្ទប់ផ្ទះសំណាក់ដោយនាងធ្វើជាបបួលបុរសនោះឱ្យជូននាងទៅច្រៀងខារ៉ាអូខេលេង ។ បានដូចចិត្ត បុរសនោះក៏ឌុបនាងតាមម៉ូតូក្នុងបំណងទៅច្រៀងខារ៉ាអូខេ តែពេលធ្វើដំណើរដល់គល់ស្ពានអាកាសស្ទឹងមានជ័យឃើញប៉លិសនៅជុំៗ ក៏បានលោតចុះពីលើម៉ូតូរត់ឱ្យសមត្ថកិច្ចជួយអន្តរាគមន៍ និងបង្កឱ្យមានការភ្ញាក់ផ្អើលនៅវេលាម៉ោង២រំលងអធ្រាត្រឈានចូលថ្ងៃទី២៣ មីនា នៅចំណុចក្រោមស្ពានអាកាសស្ទឹងមានជ័យ សង្កាត់បឹងសាឡាង ខណ្ឌទួលគោក ។
នារីរូបនេះប្រាប់ថានាងឈ្មោះ កង ទី ហៅនីតា អាយុ២៣ឆ្នាំ ស្នាក់នៅមិនពិតប្រាកដ និង មានស្រុកកំណើត នៅភូមិក្ដីតាកុយ ឃុំវាលស្បូវ ស្រុកកៀនស្វាយ ខេត្តកណ្ដាល តែពេលនេះបានកាត់ចូលខណ្ឌច្បារអំពៅ រាជធានីភ្នំពេញហើយ ។
នាងបានរៀបរាប់ទាំងទឹកភ្នែកឱ្យសមត្ថកិច្ចដឹងថា រូបនាងបានចាកចេញពីផ្ទះតាំងតែពីឆ្នាំ២០០៩មកម្ល៉េះ គិតរហូតមកដល់បច្ចុប្បន្នមានរយៈពេល៨ឆ្នាំហើយ ដោយសារតែខឹងម្ដាយធ្វើបាបមិនឱ្យប្រាក់ចាយ ។ បន្ទាប់ពីចាកចេញពីផ្ទះមក នាងបានទៅជួលផ្ទះស្នាក់នៅម្ដុំផ្សារសូរិយា ។ ការរស់នៅរបស់នាងមិនបានទៅធ្វើការងារអ្វីនោះទេ គឺរស់នៅពឹងផ្អែកទៅលើការសុំប្រាក់ចាយពីមិត្តភក្ដិរបស់នាងយកមកចាយ ព្រោះពីមុននាងធ្លាប់ឱ្យលុយមិត្តភក្កិចាយដែរ ។
នាងរៀបរាប់ទៀតថា លុះក្រោយមក នាងបានស្គាល់បុរសម្នាក់នៅក្រៅប្រទេស តាមរយៈបណ្ដាញសង្គម និងបានទាក់ទងគ្នា ហើយបុរសនោះតែងបានផ្ញើលុយឱ្យនាងសម្រាប់ដោះស្រាយជីវភាពប្រចាំថ្ងៃហូរហែរដែរ ។
នារីរូបនេះបានបន្តទៀតថា បន្ទាប់ពីទាក់ទងគ្នាបានមួយរយៈកន្លងទើបនាងដឹងថា បុរសនោះ មានប្រពន្ធកូនហើយ មិនអាចជាល្បែងស្នេហាតាមចិត្តចង់បានទេ នាងក៏ផ្ដាច់ទំនាក់ទំនងជាមួយបុរសម្នាក់នោះទៅ ។ ចាប់តាំងពីពេលនោះមកមិត្តភក្តិដែលធ្លាប់ជួយផ្ដល់ លុយកាក់ឱ្យនាងចាយ ក៏ឈប់ទាក់ទងជាមួយនាងដែរ ដែលជាហេតុធ្វើឱ្យនាងមិនដឹងទៅពឹងពាក់អ្នកណា ។
មុនថ្ងៃកើតហេតុពីរថ្ងៃ នាងបានស្គាល់បុរសម្នាក់ឈ្មោះម៉ាប់តាមរយៈទូរសព្ទ័ ហើយឈ្មោះម៉ាប់នោះ បាននិយាយលួងលោមនាងឱ្យនាងមកស្នាក់នៅជាមួយគេ ដោយគេជាអ្នករ៉ាប់រងចិញ្ចឹមនាង ។ ដោយសារខ្លួនឯងទ័លច្រកមិនដឹងទៅពឹងពាក់អ្នកណាផងនោះ នាងក៏សម្រេចចិត្តទៅស្នាក់នៅជាមួយឈ្មោះម៉ាប់ នៅក្នុងផ្ទះសំណាក់
យីហោសម្បត្តិផល ស្ថិតនៅសង្កាត់ទឹកល្អក់ទី២ ខណ្ឌទួលគោក ។
ពេលដែលទៅស្នាក់នៅជាមួយបុរសនោះនាងតែងឃើញមានមនុស្សស្រីប្រុសចេញចូលគួរឱ្យសង្ស័យ ម្យ៉ាងឈ្មោះម៉ាប់ក៏អាចមានគំនិតអាក្រក់លើនាង និងមិនមែនជាស្នេហាពិតរវាងគេ និងនាងនោះឡើយ ទើបនាងមានគំនិតព្យាយាមចង់រត់ចេញពីផ្ទះសំណាក់នោះ តែគ្មានឱកាស ។
ប្រភពដដែលបានបន្តទៀតថា នៅយប់ថ្ងៃទីពីរដែលជាយប់កើតហេតុ រូបនាងបានប្រាប់ឈ្មោះម៉ាប់ថា ចង់ទៅច្រៀងខារ៉ាអូខេលេង ក៏ត្រូវឈ្មោះម៉ាប់ និងមិត្តភក្កិរបស់គេជាច្រើននាក់ទៀតបាននាំគ្នាជិះម៉ូតូ៣ទៅ៤គ្រឿងទៅច្រៀងខារ៉ាអូខេ តែមិនដឹងជាគេនាំទៅច្រៀងនៅកន្លែងណានោះទេ ។ លុះមកដល់ក្រោមស្ពានអាកាសស្ទឹងមានជ័យ ដែលជាកន្លែងប៉ូលិសឈរជើងនាងក៏បានលោតចុះពីលើម៉ូតូ រួចរត់ទៅរកនគរបាលនៅគោលដៅក្រោមស្ពានអាកាសស្ទឹងមានជ័យ ឱ្យជួយអន្តរាគមន៍ ។ ចំណែកឈ្មោះម៉ាប់និងបក្សពួកឃើញមិនស្រួលបែបនេះបានគេចខ្លួនបាត់អស់ដែរ ។
ក្រោយកើតហេតុសមត្ថកិច្ចបានទាក់ទងទៅខាងប៉ុស្តិ៍វិទ្យុABCឱ្យមកទទួលរូបនាងយកទៅសំរាកនៅកន្លែងរបស់ខ្លួន ព្រោះវិទ្យុនេះធ្លាប់ជួយមនុស្សដាច់សង្វែងបែបនេះច្រើននាក់មកហើយ ។ មកដល់ថ្ងៃ២៣ មីនា មិនទាន់ដឹងថា នារីដែលបានព្យាយាមរត់គេចពីហ្វូងខ្លានេះជ្រើសរើសផ្លូវដើរបែបណាតទៅទៀតទេ ថាតើនាងវិលត្រឡប់ទៅផ្ទះវិញ ឬបណ្តែតខ្សែជីវិតឱ្យរសាត់ដូចចកនេះតទៅទៀត ឬយ៉ាងណានោះនៅមិនទាន់បានដឹងទេ ៕
ចែករំលែកព័តមាននេះ