ប្រធានាធិបតីតួកគី លោករីស៊ីប តៃយីប អ័រដូហ្គាន កាលពីថ្ងៃទី២៣ មីនា អំពាវនាវដល់ក្រុងវ៉ាស៊ីនតោន និងក្រុងឡុងដ៍ ឱ្យលុបចោលដោយឆាប់រហ័សការហាមឃាត់មិនឱ្យបណ្តាអ្នកប្រើប្រាស់យកកុំព្យូទ័រយួរដៃ ឬទូរស័ព្ទដៃចូលក្នុងកាប៊ីនយន្តហោះសម្រាប់ការហោះហើររបស់ក្រុមហ៊ុនអាកាសចរណ៍៩ មកពីព្រលានយន្តហោះអន្តរជាតិ១០របស់បណ្តាប្រទេសអារ៉ាប់ និងតួកគី ។
ក្នុងបទសម្ភាសន៍មួយតាមទូរទស្សន៍ប្រធានាធិបតីតួកគីថ្លែងថា ខ្ញុំសង្ឃឹមថា ប្រទេសទាំងនេះគឺសហរដ្ឋអាេមរិក និងចក្រភពអង់គ្លេសនឹងពិនិត្យឡើងវិញ លើរឿងនេះ ហើយបោះបង់ចោលការហាមឃាត់ដោយឆាប់រហ័សតាមដែលអាចធ្វើទៅបាន ។ លោកបន្តថា វិធានការនេះបំផ្លាញទំនុកចិត្តគ្នាទៅវិញទៅមកលើវិស័យសេដ្ឋកិច្ច និងសន្តិសុខ ។
លោកអ័រដូហ្គាន អះអាងផងដែរថា បានលើកឡើងពីរឿងនេះ ពេលទាក់ទងគ្នាតាមទូរស័ព្ទជាមួយនាយករដ្ឋមន្ត្រីអង់គ្លេសលោកស្រី THERESA MAY និងថា បណ្តាអ្នកទទួលខុសត្រូវតួកគីបានទាក់ទងពីរឿងនេះជាមួយបណ្តាសមភាគីអាមេរិក និងអង់គ្លេស ។
រដ្ឋមន្ត្រីការបរទេសតួកគី លោក MEVLUT CAVUSOGLU កាលពីថ្ងៃទី២២ មីនា ក៏អះអាងដែរពីការគ្មានប្រសិទ្ធភាពនៃការសម្រេចចិត្តនេះ ដោយលោកពោលថា វាគ្រាន់តែជាការដាក់ទោសដល់អ្នកដំណើរទាំងមូលប៉ុណ្ណោះ ។ ក្រុងអង់ការ៉ាក៏បានស្នើរួចហើយកាលពីថ្ងៃទី២១ មីនា ដល់ក្រុងវ៉ាស៊ីនតោនតាមរយៈរដ្ឋមន្ត្រីដឹកជញ្ជូនរបស់ខ្លួនឱ្យពិនិត្យឡើងវិញវិធានការនេះ ៕
ចែករំលែកព័តមាននេះ