«សូមបងប្អូនកុំយកតម្រាប់តាមខ្ញុំ» នេះគឺសម្ដីយុវជនម្នាក់
រាជធានីភ្នំពេញ ៖ យុវជនម្នាក់បានផឹកស្រាស្រវឹងធ្លាក់ភ្នែក ហើយបានជិះម៉ូតូ១គ្រឿងក្នុងល្បឿនលឿន ដោយអត់គោរពភ្លើងស្តុប និងច្បាប់ចរាចរណ៍នោះទេ
រាជធានីភ្នំពេញ ៖ យុវជនម្នាក់បានផឹកស្រាស្រវឹងធ្លាក់ភ្នែក ហើយបានជិះម៉ូតូ១គ្រឿងក្នុងល្បឿនលឿន ដោយអត់គោរពភ្លើងស្តុប និងច្បាប់ចរាចរណ៍នោះទេ ។ ពេលភ្លើងស្តុបលោតក្រហមហើយ នៅតែបន្តដំណើរទៅមុខទៀត ពេលនោះក៏ជ្រុលទៅប៉ះជាមួយនឹងបុរសម្នាក់ទៀត ដែលកំពុជិះម៉ូតូក្នុងអាទិ៍ភាពភ្លើងខៀវ ប៉ុន្តែមិនបានបណ្ដាលឲ្យភាគីទាំងសងខាងនោះរងរបួសឡើយ។ ប៉ុន្តែខណៈនោះទំនាស់ពាក្យសម្ដីបានកើតឡើងមួយប្រាវ ហើយយុវជនស្រវឹងស្រានោះបានទាញកូនសោម៉ូតូកាន់នៅក្នុងដៃ ហើយវាយទៅលើបុរសរងគ្រោះ បណ្ដាលឲ្យរងរបួសបែកក្បាលយ៉ាងដំណំ ហើយក៏ត្រូវនគរបាលចាប់ខ្លួនតែម្ដង។
ក្រោយពេលនាំទៅដល់ប៉ុស្ដិ៍កាកា ជនបង្កបានដឹងខ្លួនឯងខុស ហើយក៏បានចេញសំណងទៅឲ្យបុរសរងគ្រោះចំនួន១៥០ដុល្លារ ដើម្បីបញ្ចប់រឿង និងបាននិយាយថា «សូមបងប្អូនកុំយកតម្រាប់តាមខ្ញុំ» ។
ហេតុការណ៍នេះបានកើតឡើងកាលពីវេលាម៉ោង៥និង៣០នាទីល្ងាច ថ្ងៃទី២៣ ខែមីនា ឆ្នាំ២០១៧ នៅចំណុចភ្លើងស្ដុបមហាវិថីសហព័ន្ធរុស្ស៊ី កែងផ្លូវលេខ២០០៤ ស្ថិតនៅក្នុងភូមិតាងួន សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។
បុរសរងគ្រោះដោយយុវជនស្រវឹងស្រាវាយក្បាលនោះ ឈ្មោះ អ៊ុន យូហាន អាយុ៣៧ឆ្នាំ មុខរបរបើកបររថយន្ត ស្នាក់នៅផ្ទះជួលម្តុំជិតវត្តសំរោងអណ្តែត ភូមិច្រេស សង្កាត់ភ្នំពេញថ្មី ខណ្ឌសែនសុខ និងមានម៉ូតូម៉ាកហុងដាស្កូបពី ពណ៌សលាយក្រហម ពាក់ស្លាកលេខ ភ្នំពេញ1FA-5897។ ដោយឡែកជនដៃដល់វាយបុរសខាងលើនោះ ឈ្មោះ ថោង វុទ្ធី អាយុ២៣ឆ្នាំ មុខរបរសន្តិសុខ យាមនៅផ្សារអណ្តូង ស្នាក់នៅក្នុងភូមិចំការឪឡឹក សង្កាត់កាកាប ខណ្ឌពោធិ៍សែនជ័យ និងមានស្រុកកំណើតនៅក្នុងភូមិក្របៅ ឃុំក្របៅ ក្រុងតាខ្មៅ ខេត្តកណ្តាល។
បុរសរងគ្រោះបាននិយាយថា នៅមុនពេលកើតហេតុ គាត់បានជិះម៉ូតូធ្វើដំណើរតាមផ្លូវលេខ២០០៤ ក្នុងទិសដៅត្បូងទៅជើង បំណងទៅកាន់ផ្ទះជួលនៅក្បែរវត្តសំរោងអណ្តែត ស្ថិតក្នុងភូមិច្រេស សង្កាត់ភ្នំពេញថ្មី ដោយជិះតែម្នាក់ឯងទេ លុះពេលទៅដល់ត្រង់ចំណុចភ្លើងស្តុបមហាវិថីសហព័ន្ធរុស្ស៊ី កែងនឹងផ្លូវលេខ២០០៤ នោះ ភ្លើងស្តុបបានលោតខៀវដែលផ្ដល់ឲ្យរូបគាត់ និងអ្នកដំណើរផ្សេងទៀតធ្វើដំណើរទៅមុខត្រង់បន្តទៀត។ ខណៈនោះគាត់ក៏បានបន្តដំណើរទៅមុខទៀត ដោយឆ្លងកាត់ទទឹងមហាវិថីសហព័ន្ធរុស្ស៊ី ពេលនោះស្រាប់តែយុវជនឈ្មោះ ថោង វុទ្ធី បានជិះម៉ូតូ១គ្រឿង ម៉ាកហុងដាឌ្រីម សេ១២៥ ស៊េរីឆ្នាំ២០១៦ មួយគ្រឿង ពណ៌ខ្មៅ ពាក់ស្លាកលេខ ភ្នំពេញ 1FL-4078 ក្នុងទិសដៅពីកើតទៅលិច ដោយមិនគោរពភ្លើងស្តុបក្រហម បណ្ដាលឲ្យប៉ះគ្នា ហើយក៏មានទំនាស់នឹងគ្នា ស្រាប់តែជននោះវាយគាត់និងកូនសោម៉ូតូ បណ្ដាលឲ្យរងរបួសបែកក្បាលតែម្ដង។
នគរបាលបានឲ្យដឹងថា ខណៈនោះបានបង្កឲ្យមានការភ្ញាក់ផ្អើល ហើយជនដៃដល់ត្រូវបានកម្លាំងឃាត់ ខ្លួន និងបាននាំទៅសួរនាំនៅប៉ុស្ដិ៍កាកាប បន្ទាប់មកជនដៃដល់បានដឹងពីស្រវឹងវិញ ហើយដោយដឹងថា ខ្លួនមានកំហុសមិនគោរពច្បាប់ចរាចរណ៍ ថែមទាំងបង្ករបួសស្នាមដល់អ្នកដទៃផងនោះ ក៏បានសុំទោសជនរងគ្រោះ និងចេញសំណងចំនួន១៥០ដុល្លារទៅជនរងគ្រោះដើម្បីបញ្ចប់រឿង។ ក្រោយមកត្រូវបាន ដោះលែងឲ្យរួចខ្លួនវិញ ហើយមុនពេលចាកចេញពីប៉ុស្តិ៍កាកាប ជនបង្កនោះបានសម្ដែងការសោកស្ដាយ ចំពោះកំហុសឆ្គងដែលខ្លួនបានប្រព្រឹត្ត និងបាននិយាយថា «សូមបងប្អូនកុំយកតម្រាប់តាមខ្ញុំ»៕
ចែករំលែកព័តមាននេះ