អាជ្ញាធរវៀតណាមបានប្រទះឃើញសត្វខ្លា៥ក្បាល ដោយត្រូវបានគេយកគ្រឿងក្នុងចេញអស់ ហើយយកខ្លួនក្លាស្សេទុកក្នុងទូទឹកកកមួយ ។ អាជ្ញាធរបានរាយការណ៍មកថា ហេតុការណ៍នេះបានកើតមានឡើង នៅកណ្តាលខេត្ត Nghe An ប្រទេសវៀតណាម។ ពួកគេគិតថា គ្រឿងក្នុងដែលបានបាត់នោះ អាចត្រូវបានចម្អិនធ្វើជាថ្នាំ ដែលអាចជួយដល់ការព្យាបាលជំងឺរលាកសន្លាក់ ។
គួរបញ្ជាក់ថា ប្រទេសវៀតណាម គឺជាច្រកចេញ-ចូលនៃគ្រឿងក្នុងសត្វព្រៃ ដែលដឹកជញ្ជូនទៅកាន់កន្លែងដទៃៗក្នុងអាស៊ី ដែលរួមមានប្រទេសចិន ដែលនៅជិតខាងផងដែរ ។ យោងទៅតាមភ្នាក់ងារព័ត៌មានខាងលើឱ្យដឹងទៀតថា សត្វខ្លាទាំងនោះ ជាពូជសត្វខ្លាក្នុងឥណ្ឌូចិន ប៉ុន្តែមន្ត្រីបាននិយាយថា ប៉ូលិសនឹងស៊ើបអង្កេតបន្ថែមទៀត ។
ឆ្អឹងរបស់សត្វខ្លាតែងតែត្រូវបានយកមកស្ងោររម្ងាស់ និងលាយជាមួយនឹងស្រាសក្នុងប្រទេសវៀតណាម ដើម្បីយកមកព្យាបាលជំងឺសន្លាក់ និងបង្កើនកម្លាំង ។ អ្នកអភិរក្សនិយមបាននិយាយថា ប្រទេសវៀតណាម គឺនៅក្នុងចំណោមប្រទេសដែលធ្វើពាណិជ្ជកម្មលើពូជសត្វ ដែលកំពុងជិតផុតពូជ ប៉ុន្តែប្រទេសនេះ បានបដិសេធនឹងការចោទប្រកាន់។
ប៉ូលិសតែងតែរឹបអូសភ្លុកដំរី រមាស និងសត្វជិតផុតពូជផ្សេងៗដូចជាសត្វពង្រូលជារឿយៗ ប៉ុន្តែក្រុមអភិរក្សនិយមនិយាយថា វាគ្រាន់តែជាផ្នែកតូចមួយប៉ុណ្ណោះនៃការធ្វើពាណិជ្ជកម្មបែបនេះតាមរយៈប្រទេសកុម្មុយនីស្តមួយនេះ។
ប្រទេសអង់គ្លេសធ្លាប់បានផ្ញើជាសំណើរដល់ប្រទេសវៀតណាមផងដែរ កាលពីខែវិច្ឆិកា ឲ្យធ្វើការបញ្ឈប់ការលក់សត្វព្រៃខុសច្បាប់ ដើម្បីជួយសង្គ្រោះដល់សត្វដែលជិតនឹងផុតពូជ ។
ចែករំលែកព័តមាននេះ