គោព្រៃកម្ពុជាចាញ់ខ្លាខៀវឥណ្ឌា 2-3 ក្នុងជំនួបមិត្តភាព
រាជធានីភ្នំពេញ ៖ ក្រុមបាល់ទាត់ជម្រើសជាតិកម្ពុជាដែលមានរហស្សនាមថា«គោព្រៃកម្ពុជា»បានទទួលបរាជ័យ២-៣ ក្នុងជំនួបមិត្តភាពអន្តរជាតិជាមួយក្រុមជម្រើសជាតិឥណ្ឌាដែលមានរហស្សនាមថា
រាជធានីភ្នំពេញ ៖ ក្រុមបាល់ទាត់ជម្រើសជាតិកម្ពុជាដែលមានរហស្សនាមថា«គោព្រៃកម្ពុជា»បានទទួលបរាជ័យ២-៣ ក្នុងជំនួបមិត្តភាពអន្តរជាតិជាមួយក្រុមជម្រើសជាតិឥណ្ឌាដែលមានរហស្សនាមថា «ខ្លាខៀវឥណ្ឌា»នៅពហុកីឡដ្ឋានជាតិអូឡាំពិក នាល្ងាចថ្ងៃទី២២ មីនា ។ ទោះបីយ៉ាងណាទម្រង់លេងក្រោមការដឹកនាំលើកដំបូងរបស់គ្រូបង្វឹកថ្មីសញ្ជាតិប្រេស៊ីល Leonardo Vitorinoរបស់ក្រុមគោព្រៃកម្ពុជាទទួលការចាប់អារម្មណ៍យ៉ាងខ្លាំងពីអ្នកគាំទ្រកម្ពុជាជាពិសេសអ្នកទស្សនាផ្ទាល់ដែលមានប្រមាណជាង៤ម៉ឺននាក់ ។
ទម្រង់លេងរបស់ក្រុមគោព្រៃកម្ពុជា លើកនេះមានការខុសប្លែកយ៉ាងខ្លាំងនៅក្នុងតង់ទី១ តាមរយៈការបញ្ជូនបាល់ខ្លីៗ និងការព្យាយាមទាញកម្លាំងក្រុមខ្លាខៀវឥណ្ឌាដែលមានប្រៀបទាំងមាឌ និងកម្ពស់ដាច់ឆ្ងាយជាង ។ ទោះបីយ៉ាងណា នៅនាទីទី៣៦ ខ្សែបម្រើរបស់ក្រុមខ្លាខៀវឥណ្ឌាEugeneson Lyngdoh ទាត់បាល់ចេញពីជ្រុង ហើយអ្នកចាំទីអ៊ុំ សេរីរ័ត្ន របស់ក្រុមគោព្រៃកម្ពុជាចាប់បាល់ក្រឡកបានផ្ដល់ឱកាសដល់ខ្សែប្រយុទ្ធក្រុមខ្លាខៀវឥណ្ឌា Sunil Chhetri ស៊ុតបាល់បញ្ចូលទីនាំមុខ១គ្រាប់ ។ ប៉ុន្តែ
១នាទីក្រោយមកគឺនៅនាទីទី៣៧ កីឡាករប្រាក់ មុន្នីឧត្តម និងសឿត បារាំង របស់ក្រុមគោព្រៃកម្ពុជា សហការគ្នាបានយ៉ាងល្អដោយបានអូសបាល់ចូលទៅកាន់តំបន់គ្រោះថ្នាក់រួចបញ្ជូនឲ្យខ្សែប្រយុទ្ធ ឃួន ឡាបូរ៉ាវី ស៊ុតបាល់បញ្ចូលទីក្រុមភ្ញៀវតាមស្មើ១-១ ដែលលទ្ធផលនេះនៅរក្សារហូតដល់ចប់តង់ទី១។
ឈានចូលដល់តង់ទី២ ក្រុមខ្លាខៀវឥណ្ឌាដែលស្រែកឃ្លានជ័យជម្នះខ្លាំងបានចាប់ផ្តើមលេងសម្រុករហូតរកគ្រាប់បាល់បាន២គ្រាប់បន្តបន្ទាប់ពោលគឺនៅនាទីទី៥០ ដែលរកបានដោយកីឡាករEje.Lalpekhlua និងនៅនាទីទី៥៤រកបានដោយកីឡាករ Sandesh Jhingan ។ ប៉ុន្តែនៅនាទីទី៦២ ក្រុមគោព្រៃកម្ពុជា បានកាត់បន្ថយគម្លាតនាំមុខរបស់ក្រុមខ្លាខៀវឥណ្ឌា ដោយកីឡាករទិត្យ ឌីណា បានបញ្ជូនបាល់ទៅឲ្យកីឡាករចាន់ វឌ្ឍនាកា ស៊ុតបញ្ចូលទីគូប្រកួតក្នុងចម្ងាយប្រមាណ២០ម៉ែត្រធ្វើឱ្យមានសំឡេងអបអរពីអ្នកគាំទ្រយ៉ាងកងរំពង។
បន្ទាប់ពីនោះមកក្រុមគោព្រៃកម្ពុជាមានឱកាសវាយបកតាមស្មើដែរប៉ុន្តែធ្វើមិនបានសម្រេចដែលនាំឲ្យចប់ការប្រកួតត្រូវចាញ់ក្រុមខ្លាខៀវឥណ្ឌា២-៣ទាំងសោកស្ដាយ ។
នៅក្នុងសន្និសីទសារព័ត៌មានក្រោយចប់ការប្រកួត លោក Leonardo Vitorinoគ្រូបង្វឹកថ្មីរបស់ក្រុមគោព្រៃកម្ពុជា បានសម្ដែងនូវការសោកស្ដាយយ៉ាងខ្លាំងចំពោះការបរាជ័យរបស់ក្រុមគោព្រៃកម្ពុជាលើកនេះ ជាពិសេសមិនបានបំពេញចិត្តអ្នកគាំទ្រកម្ពុជាដែលមានចំនួនរាប់ម៉ឺននាក់ដែលប្រាថ្នាចង់ឃើញជ័យជម្នះលើក្រុមជម្រើសជាតិឥណ្ឌា ក្រោមការដឹកនាំរបស់គ្រូបង្វឹកថ្មី ។ ទោះបីយ៉ាងណា អ្នកគាំទ្រភាគច្រើនបានសម្ដែងការពេញចិត្តចំពោះទម្រង់លេងដ៏ល្អរបស់ក្រុមជម្រើសជាតិកម្ពុជា ដែលមានឱកាសស៊ុតបាល់បញ្ចូលទីក្រុមភ្ញៀវច្រើន ដែរគ្រាន់តែគ្មានសំណាងប៉ុណ្ណោះ ។
ចំណែកលោក Stephen Constantine គ្រូបង្វឹកក្រុមជម្រើសជាតិឥណ្ឌាបានថ្លែងថា លោកភ្ញាក់ផ្អើលយ៉ាងខ្លាំងនឹងទម្រង់លេងដ៏ល្អរបស់ក្រុមជម្រើសជាតិកម្ពុជាក្រោម
ការដឹកនាំរបស់គ្រូបង្វឹកថ្មីធ្វើឱ្យក្រុមលោកយកឈ្នះដោយតឹងតែងបំផុត ។ តាមរយៈការប្រកួតលើកនេះលោកហ៊ានវាយតម្លៃថា ក្រុមជម្រើសជាតិកម្ពុជាមិនយូរមិនឆាប់
នឹងក្លាយជាក្រុមខ្លាំងមួយមិនខាន ៕
ចែករំលែកព័តមាននេះ