មួយឆ្នាំក្រោយការវាយប្រហារភេរវកម្មនៅទីក្រុងព្រុចសែល ទីក្រុងឡុងដ៍ កាលពីថ្ងៃទី២២ មីនា រងការវាយប្រហារភេរវកម្មមួយដែលបណ្តាលឱ្យមនុស្សស្លាប់យ៉ាងតិច៤នាក់ និងរបួស៤០នាក់នៅក្បែរសភា WESTMINSTER ជានិមិត្តរូបនៃលទ្ធិប្រជាធិបតេយ្យអង់គ្លេស ។
ក្នុងសេចក្តីថ្លែងការណ៍មួយ លោក MARK ROWLEY មេបញ្ជាការកងឯកភាពប្រឆាំងភេរវកម្មអង់គ្លេសអះអាងថា ខ្ញុំនឹងពុំទាន់ធ្វើអត្ថាធិប្បាយនានាឡើយ លើអត្តសញ្ញាណអ្នកវាយប្រហារ ក៏ប៉ុន្តែយើងផ្តោតលើការវាយប្រហារភេរវកម្មអ៊ិស្លាមនិយម ។
ក្រៅពីអ្នកស្លាប់៤នាក់ មនុស្សប្រមាណជា៤០នាក់ទៀតក៏រងរបួសដែរ ពេលបុរសស្លៀកពាក់ខ្មៅម្នាក់ពាក់ពុកចង្ការនាដើមរសៀល បានបើករថយន្តរបស់គេបំបុកមនុស្សម្នាលើស្ពាន WESTMINSTER ទល់មុខ BIG BEN មុនពេលចុះចាក់សម្លាប់ប៉ូលិសម្នាក់ពេលប៉ុនប៉ងលុកចូលក្នុងសភា ។
យោងតាមលទ្ធផលដំបូងៗនៃការស៊ើបអង្កេតថា បុរសនោះហាក់ធ្វើសកម្មភាពតែម្នាក់ឯង ហើយអំពើនេះនៅពុំទាន់មានក្រុមណាប្រកាសទទួលខុសត្រូវនៅឡើយ ។
លោក ROWLEY អះអាងថា ជនវាយប្រហារក្រោយមកត្រូវប៉ូលិសម្នាក់បាញ់សម្លាប់ ។ ការវាយប្រហារនេះនាំឱ្យមានចលាចលនាកណ្តាលទីក្រុងឡុងដ៍ ដោយបណ្តា អ្នកដំណើររត់ប្រសេកប្រសាច ហើយមួយចំនួនរត់ចូលមេត្រូដែលនៅក្បែរ ។ ប៉ូលិសត្រូវបានដាក់ពង្រាយយ៉ាងច្រើនភ្លាម រួចទីតាំងសភាត្រូវហ៊ុមព័ទ្ធចំណែកលោកស្រីនាយករដ្ឋមន្ត្រី THERESA MAY ត្រូវបានជម្លៀសចេញយ៉ាងលឿន ។
ក្នុងចំណោមអ្នករបួសមានសិស្សសាលាជនជាតិបារាំង៣នាក់ ដែលកំពុងធ្វើដំណើរទៅសាលា ក្នុងនោះ២នាក់របួសធ្ងន់ ។ ជនជាតិរូម៉ានី២នាក់ក៏រងរបួសដែរ ព្រមទាំងអ្នកទេសចរជនជាតិកូរ៉េខាងត្បូង៥នាក់ ។
នៅមុខនិវេសនដ្ឋានរបស់លោកស្រី នាយករដ្ឋមន្ត្រីអង់គ្លេស ដែលស្លៀកពាក់កាន់ទុក្ខពណ៌ខ្មៅ បានបរិហារថា នេះជាការវាយប្រហារភេរវកម្មយ៉ាងកំសាកមួយ ។ ក្រោយចេញពីកិច្ចប្រជុំអន្តរក្រសួងមួយ លោកស្រីនាយករដ្ឋមន្ត្រីមានប្រសាសន៍ថា ភេរវករបានជ្រើសរើសកន្លែងវាយប្រហារនៅចំកណ្តាលរាជធានីរបស់យើង ដែលមានមនុស្សម្នាគ្រប់ជាតិសាសន៍ គ្រប់សាសនា និងវប្បធម៌ដែលលើកគ្នាដើម្បីរំលឹកពីបណ្តាតម្លៃនៃសេរីភាពលទ្ធិប្រជាធិបតេយ្យ និងសេរីភាពនៃការបញ្ចេញមតិ ។ ទោះបីយ៉ាងនេះក្តី កម្លាំងរបស់ពួកមារនឹងពុំអាចបំបែកបំបាក់យើងបានឡើយ ។
ពេលមានការវាយប្រហារបណ្តាសមាជិកសភាស្ថិតនៅខាងក្នុងសភា និងនៅ WESTMINSTER ABBEY ដែលនៅក្បែរមុនពេលអាចជម្លៀសចេញនាវេលាល្ងាច ។ ចំណែកលោកស្រី THERESA MAY បានចាកចេញយ៉ាងលឿនចេញពីសភាជាកន្លែងលោកស្រីថ្លែងនៅមុខបណ្តាសមាជិកសភាតាមរថយន្តផ្លូវការ ។
ទីក្រុងឡុងដ៍រយៈពេលប៉ុន្មានឆ្នាំចុងក្រោយនេះ គេចផុតពីការវាយប្រហារភេរវកម្មទ្រង់ទ្រាយធំ ។ ប៉ុន្តែប៉ូលិសអង់គ្លេសប្រកាសកាលពីដើមខែមីនាថា ភ្នាក់ងារសន្តិសុខបានកម្ទេចការប៉ុនប៉ងវាយប្រហារភេរវកម្មចំនួន១៣ ចាប់តាំងពីខែមិថុនា ឆ្នាំ២០១៣មក ។
សង្កាត់ WESTMINSTER នាពាក់កណ្តាលថ្ងៃជាកន្លែងមួយមានមនុស្សច្រើនកុះករបំផុតនៃទីក្រុងឡុងដ៍ បណ្តាអ្នកទេសចរមកពីពិភពលោកទាំងមូលមកទស្សនា BIG BEN។ ពិសេសបំផុតនាថ្ងៃទី២២ មីនា នេះជាថ្ងៃដែលលោកស្រីនាយករដ្ឋមន្ត្រីមកថ្លែងនៅមុខសភា ។ គឺនាឱកាសនោះ ហើយកើតមានការវាយប្រហារភេរវកម្មមួយលើស្ពាន WESTMINSTER និងក្នុងបរិវេណសភាអង់គ្លេស ។
នាដើមរសៀលរថយន្ត 4X4 ពណ៌ប្រផេះមួយធុន HYUNDAI បានបើកកាត់ស្ពាន WESTMINSTER ហើយបើកឆាបមកផ្លូវសម្រាប់អ្នកដើរបុករះមនុស្សម្នា ។ រថយន្តនេះបន្ទាប់មកបើកឆ្ពោះមកកាន់សភាបុករបងសំណាញ់ដែករបស់សភានៅ WESTMINSTER បណ្តាលឱ្យមនុស្សច្រើននាក់ទៀតរងរបួស ក្នុងនោះមានប៉ូលិសកំពុងយាមផង ។ កាន់កាំបិត២ អ្នកបើករថយន្តនេះអាចចូលក្នុងបរិវេណសភា ហើយចាក់សម្លាប់ប៉ូលិសម្នាក់ ។ ពេលរូបគេស្ទុះទៅវាយប្រហារប៉ូលិសម្នាក់ទៀត ក៏ត្រូវប៉ូលិសស្លៀកពាក់ស៊ីវិលម្នាក់បាញ់ស្លាប់ ៕
ចែករំលែកព័តមាននេះ