ខេត្តកំពង់ឆ្នាំង ៖ ពិធីមង្គលការក្នុងឆ្នាំ២០១៧នេះនៅខេត្តកំពង់ឆ្នាំង ម្ចាស់ដើមការមួយចំនួនជាអ្នកមានបានរៀបចំរបាំប្រពៃណីសម្តែងជូនភ្ញៀវកិត្តិយសទស្សនាកម្សាន្ត ។
លោកសុខ ធួក ប្រធានមន្ទីរវប្បធម៌ និងវិចិត្រសិល្បៈខេត្តកំពង់ឆ្នាំងលើកឡើងកាលពីពេលថ្មីៗកន្លងមកថា«ការយកសិល្បៈរបាំប្រពៃណីសម្តែងជូនភ្ញៀវកិត្តិយសទស្សនាក្នុងពិធី ផ្សេងៗមិនខុសទេ ផ្ទុយទៅវិញគឺចូលរួមផ្សព្វផ្សាយវប្បធម៌ អរិយធម៌របស់ជាតិយើងផងដែរ ។
ចំពោះរបាំដែលត្រូវហាមឃាត់ គឺរបាំដែលចុះបញ្ជីបេតិកភណ្ឌមនុស្សជាតិ មានរបាំព្រះរាជទ្រព្យ របាំអប្សរា និងរបាំជូនពរជាដើម មិនអាចយកទៅសម្តែងផ្តេសផ្តាសបានទ ព្រោះបានចូលទៅក្នុងបញ្ជីបេតិកភណ្ឌវប្បធម៌អរូបិយ របស់ពិភពលោក ថ្វីដ្បិតថារបាំទាំងនោះជារបស់ខ្មែរក៏ពិតមែន ។ ក្រៅពីរបាំទាំងនោះគឺយើងអាចយកទៅសម្តែងបាន ប៉ុន្តែត្រង់ថា ពីមុនមកមិនដែលឃើញគេយកទៅសម្តែងតាមពិធីមង្គលការបែបហ្នឹងទេ ។ នៅតាមសណ្ឋាគារ ភោជនីយដ្ឋាន ទំនើបៗមួយចំនួននៅភ្នំពេញ ខេត្តសៀមរាបជាដើម ឃើញមានដាក់សម្តែងវង់ភ្លេងមហោរី ឈុតរបាំ ខ្លីៗ» ។
លោកប្រធានមន្ទីរវប្បធម៌បញ្ជាក់ថា នៅតាមសណ្ឋាគារ ភោជនីយដ្ឋាន ទំនើបៗ ដែលដាក់ឱ្យសម្តែងរបាំទាំងនោះសម្រាប់ភ្ញៀវទេសចរជាអាជីវកម្ម ដាច់ខាតត្រូវសុំអាជ្ញាប័ណ្ណពីមន្ទីរពាក់ពន្ឋ័ ប៉ុន្តែបើសម្តែងម្តងម្កាលកំដរភ្ញៀវក្នុងមង្គលការមិនអីទេ ។ «បើទោះថា នេះជាការជួយផ្សព្វផ្សាយវប្បធម៌ខ្មែរក៏ពិតមែន ប៉ុន្តែមិនមែនចេះតែផ្សព្វផ្សាយពេកទេ វាអាចក្លាយបាត់បង់ទម្រង់ដើមពិតប្រកដរបស់របាំ ត្រូវសហការជាមួយជំនាញ ពិសេស គ្រូៗនៅតាមមន្ទីរវប្បធម៌ឱ្យជួយមើលផង កុំចេះតែនឹក ឃើញលេងៗវាខុសក្បួនខ្នាតខ្មែរ» ។
ពិធីមង្គលការដែលដាក់បញ្ចូលការសម្តែងរបាំប្រពៃណី នៅចន្លោះការប្រគំតន្ត្រីសម័យធ្វើឱ្យអ្នកទស្សនាពេញចិត្ត តែមានការលើកឡើងថា មិនមែនអាចយករបាំប្រពៃណីសម្តែងបាន ងាយៗទេ ព្រោះត្រូវចំណាយច្រើនណាស់អ្នកមានធនធាន ល្មមៗមិនអាចជួលក្រុមរបាំប្រពៃណីសម្តែងបានទេ ៕
ចែករំលែកព័តមាននេះ