ខេត្តបាត់ដំបង ៖ សេចក្តីរាយការណ៍បានបន្តឱ្យដឹង នាព្រឹកថ្ងៃទី២៣ មីនា នេះថា ទាក់ទិនករណីគ្រោះថ្នាក់ចរាចរណ៍ដែលរថយន្តក្រុងរបស់ក្រុមហ៊ុន «រិទ្ធិមុន្នី» បានបើកចូលទៅខ្យូស (កន្លែងលក់សត្វកណ្តុរអាំង) ស្ថិតតាមបណ្តោយផ្លូវជាតិលេខ០៥ ត្រង់
ខេត្តបាត់ដំបង ៖ សេចក្តីរាយការណ៍បានបន្តឱ្យដឹង នាព្រឹកថ្ងៃទី២៣ មីនា នេះថា ទាក់ទិនករណីគ្រោះថ្នាក់ចរាចរណ៍ដែលរថយន្តក្រុងរបស់ក្រុមហ៊ុន «រិទ្ធិមុន្នី» បានបើកចូលទៅខ្យូស (កន្លែងលក់សត្វកណ្តុរអាំង) ស្ថិតតាមបណ្តោយផ្លូវជាតិលេខ០៥ ត្រង់ចំណុចក្បែរស្ពានអូរតាគី ក្នុងភូមិអូរតាគី ឃុំអូរតាគី ក្រុងបាត់ដំបង កាលពីល្ងាចថ្ងៃទី២២ មីនា នោះ ត្រូវបានដឹងថា គឺមិនមានមនុស្សស្លាប់នោះទេ តែមានអ្នករងរបួសធ្ងន់-ស្រាលជាច្រើននាក់ ក្នុងនោះ មានទាំងអ្នកជិះក្នុងរថយន្តក្រុង និងអ្នកអង្គុយក្នុងខ្យូសផងដែរ ។
ប្រភពឱ្យដឹងថា រថយន្តបង្កមានពាក់ស្លាកលេខភ្នំពេញ 3B-4085 ជារថយន្តដឹកអ្នកដំណើរបស់ក្រុមហ៊ុន«រិទ្ធិមុនី» ធ្វើដំណើរពីភ្នំពេញ ឆ្ពោះទៅកាន់ខេត្តបន្ទាយមានជ័យ ។ អ្នកបើកបររត់គេចខ្លួនបាត់ បន្ទាប់ពីបង្កហេតុរួច ហើយត្រូវសង្ស័យថា អ្នកបើកបររូបនោះ ទំនងជាងងុយដេកមួយភាំង ។
ពីដំបូង រថយន្តក្រុងបើកចូលបុកខ្យូសមួយដែលនៅកណ្តាល តែអត់មានមនុស្សអង្គុយទេ ទើបទៅប៉ះខ្យូសផ្សេងៗទៀត និងបុករថយន្តកាមរី និងម៉ូតូដែលកំពុងចតចោលនោះតែម្តង ។
នៅព្រឹកថ្ងៃទី២៣ មីនា នេះ គេឃើញខាងជនរងគ្រោះ ធ្វើដំណើរមកការិយាល័យចរាចរណ៍នៃស្នងការខេត្ត ដើម្បីរង់ចាំម្ចាស់រថយន្តក្រុង ចេញមកដោះស្រាយ ។ ទោះបីជាយ៉ាងណា គេមិនទាន់ដឹងថា មានចំណាត់ការបែបណាលើករណីគ្រោះថ្នាក់ចរាចរណ៍ដ៏រន្ធត់នេះទេ ។
ចែករំលែកព័តមាននេះ