ពាក្យចាស់ពោលថា «ឈាមក្រាស់ជាងទឹក» ពិតជាមានអត្ថន័យ ព្រោះគ្មានអ្វីប្រសើរជាងការចេះស្រលាញ់ និងយកចិត្តទុកដាក់ចំពោះបងប្អូនសាច់ញាតិពេលមានទុក្ខធុរៈនោះទេ
រាជធានីភ្នំពេញ ៖ ពាក្យចាស់ពោលថា «ឈាមក្រាស់ជាងទឹក» ពិតជាមានអត្ថន័យ ព្រោះគ្មានអ្វីប្រសើរជាងការចេះស្រលាញ់ និងយកចិត្តទុកដាក់ចំពោះបងប្អូនសាច់ញាតិពេលមានទុក្ខធុរៈនោះទេ។
តួយ៉ាង អ្នកនាង កាឆយ តារាកំប្លែងល្បីឈ្មោះមួយដួង បានធ្វើឱ្យមហាជនសរសើរនូវទឹកចិត្តប្រពៃរបស់អ្នកនាង ដែលបានធ្វើដំណើរផ្លូវឆ្ងាយត្រឡប់មកមើលបងប្អូនដែលកំពុងតែសង្គ្រោះបន្ទាន់នៅមន្ទីរពេទ្យ។
តែអ្វីដែលគួរឱ្យសោកស្តាយបំផុតនោះ គឺអ្នកនាង កាឆយ បានជួបមុខបងប្រុសមិនបានប៉ុន្មានផង លោកក៏ទទួលមរណភាពដោយសារតែជំងឺក្រិនថ្លើម ធ្វើឱ្យមហាជនអ្នកគាំទ្រចូលរួមសម្តែងមរណទុក្ខជាច្រើន។
ប្រាកដណាស់ ជាមួយនឹងសំណេររបស់អ្នកនាង កាឆយ ធ្វើឱ្យអ្នកគាំទ្រមានការស្លុតចិត្តជាខ្លាំង ហើយក៏ចូលរួមលើកទឹកចិត្តអ្នកនាងផងដែរ ដោយសារតែមនុស្សជាទីគោរពស្រលាញ់កំពុងតែមានជំងឹធ្ងន់ធ្ងរនោះ ។
ដំបូងឡើយ អ្នកនាង កាឆយ បានសរសេរសំណេរនៅលើបណ្តាញសង្គមហ្វេកប៊ុករបស់អ្នកនាង រៀបរាប់ថា «បងប្រុសបង្កើតរបស់ខ្ញុំ គ្រាន់តែប្អូនស្រីមកដល់ និយាយបានតែបួនដប់មាត់ជាមួយប្អូនស្រី បងទៅចោលប្អូនហើយ សូមទៅអោយបានសុខចុះ»។
នេះហើយដែលគេហៅថា ពិតជាប្រពៃណីណាស់ ទឹកចិត្តប្អូនស្រីចំពោះបងប្រុស ដោយគ្រាន់បានដំណឹងភ្លាមៗ អ្នកនាង កាឆយ រូតរះត្រឡប់មកពីប្រទេសបារាំង សំដៅទៅរកបងប្រុសដែលកំពុងតែសម្រាកព្យាបាលនៅមន្ទីរពេទ្យ ។
បើតាមការឱ្យដឹងបស់អ្នកនាង កាឆយ ដែលបានបង្ហោះវីដេអូខ្លីមួយមានរយៈពេលប្រមាណជិត១នាទី បង្ហាញឱ្យឃើញថា ស្ថានភាពរបស់បងប្រុសអ្នកនាង គឺសភាពជើងរបស់បងប្រុសអ្នកនាង គឺហើមខ្លាំង ហើយជាំក្រហមខ្មៅ មើលហើយពិតជាខ្លោចចិត្តអាណិតណាស់។ តែគ្រប់យ៉ាង គឺមិនទៀងទាត់នោះទេ ក្រោយពីបានជួបមុខប្អូនស្រីតែបន្តិច បងប្រុសរបស់អ្នកនាង កាឆយ ក៏ទទួលមរណភាព។
ទន្ទឹមនឹងនោះ ក៏មានអ្នកគាំទ្រជាច្រើនបានចូលទៅ បញ្ចេញមតិសម្តែងការក្តីអាណិតអាសូរ សោកស្តាយ និងចូលរួមរំលែកទុក្ខដល់រូបអ្នកនាងដែល បងប្រុសជាទីគោរពស្រលាញ់បានលាចាកលោកទៅកាលពីថ្ងៃទី១៣ ខែតុលា ឆ្នាំ២០២២នេះ។
បើតាមតារាកំប្លែង លោក សង់សេដ្ឋ ដែលជាប្អូនប្រុសរបស់អ្នកនាងកាឆយ ក៏អោយបានដឹងថា បងប្រុសរបស់គាត់ មានឈ្មោះថា ស្រស់ មានអាយុ៥៧ឆ្នាំ គាត់មានជំងឺក្រិនថ្លើមនេះជាយូរមកហើយ រហូតមកដល់ពេលគាត់បានសម្រាកព្យាបាលនៅមន្ទីរពេទ្យមួយកន្លែង។ លុះមកដល់ថ្ងៃទី១៣ ខែតុលា គាត់បានទទួលមរណភាពដោយជំងឺក្រិនថ្លើម ដោយហើមជើងទាំងសងខាង ដោយមានលក្ខណៈក្រហមជាំខ្មៅ នៅពេលដែលអ្នកនាង កាឆយ ទើបមកពីបារាំងនិយាយគ្នាមិនបានប៉ុន្មានមាត់ផង ស្រាប់តែបងប្រុសរបស់ទទួលមរណកាលបាត់ទៅហើយ៕
ចែករំលែកព័តមាននេះ