រាជធានីភ្នំពេញ ៖ ចាប់ពីថ្ងៃទី១ មេសា ខាងមុខនេះ តម្លៃអគ្គិសនីសម្រាប់អ្នកប្រើប្រាស់ក្រោម៥០គីឡូវ៉ាត់ម៉ោងក្នុង១ខែ ដែលពេលនេះតម្លៃ៧០០ឬ៨០០ក្នុង១គីឡូវ៉ាត់ម៉ោង នឹងត្រូវចុះមកត្រឹម៦១០រៀលសម្រាប់អ្នកតភ្ជាប់
រាជធានីភ្នំពេញ ៖ ចាប់ពីថ្ងៃទី១ មេសា ខាងមុខនេះ តម្លៃអគ្គិសនីសម្រាប់អ្នកប្រើប្រាស់ក្រោម៥០គីឡូវ៉ាត់ម៉ោងក្នុង១ខែ ដែលពេលនេះតម្លៃ៧០០ឬ៨០០ក្នុង១គីឡូវ៉ាត់ម៉ោង នឹងត្រូវចុះមកត្រឹម៦១០រៀលសម្រាប់អ្នកតភ្ជាប់ជាមួយបណ្តាញជាតិ ។ រីឯអ្នកប្រើក្រោម១០គីឡូវ៉ាត់ម៉ោង នឹងធ្លាក់មក៤៨០រៀលក្នុង១គីឡូវ៉ាត់ម៉ោង ហើយចំពោះអ្នកប្រើលើសពី៥០គីឡូវ៉ាត់ម៉ោង តភ្ជាប់ជាមួយបណ្តាញជាតិ ដែលតម្លៃពីមុន១.០០០ ឬ៩០០រៀលនោះ នឹងចុះមកត្រឹម៧៧០រៀលវិញ ។ នេះបើយោងតាមការថ្លែងរបស់ប្រមុខរាជរដ្ឋាភិបាលកម្ពុជា ។
ក្នុងពិធីប្រគល់សញ្ញាបត្រដល់គរុនិស្សិត-សិស្សនៅវិទ្យាស្ថានជាតិអប់រំ កាលពីថ្ងៃទី២២មីនា ម្សិលមិញ សម្តេចអគ្គមហាសេនាបតីតេជោ ហ៊ុន សែន មានប្រសាសន៍ថា ៖ « អ្នកមិនភ្ជាប់ជាមួយបណ្តាញជាតិ ក៏ត្រូវចុះមក៧៩០រៀល រីឯអ្នកប្រើប្រាស់ក្រោម៥០និងក្រោម១០គីឡូវ៉ាត់ គឺតម្លៃដូចគ្នា ។ ចំពោះវិស័យឯកជនដែលដាក់នៅក្រុមឆ្ងាយៗ មិនភ្ជាប់ជាមួយបណ្តាញជាតិ រដ្ឋបាលក្រោមជាតិ ក៏ដូចជាផ្នែកអគ្គិសនីបន្តការចរចាឱ្យបញ្ចុះថ្លៃ » ។
សម្តេចគូសបញ្ជាក់បន្ថែមថា ៖ « ក្នុងពេលអគ្គិសនីចុះថ្លៃ យើងក៏អំពាវនាវចំពោះទឹកក៏ត្រូវរត់រកចុះថ្លៃដែរ ។ ក្រសួងឧស្សាហកម្ម និងសិប្បកម្មត្រូវធ្វើការជាមួយក្រុមហ៊ុនទឹក ដើម្បីរកវិធីឱ្យចុះតាមតម្លៃអគ្គិសនីដែរ តិចច្រើនឱ្យបានតិចតួច » ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ មានប្រសាសន៍ថា ៖ « ការបញ្ចុះតម្លៃអគ្គិសនីនេះ ទី១-ជារឿងល្អ ព្រោះតម្លៃអគ្គិសនីយើងនៅថ្លៃជាងគេ បើធៀបនឹងប្រទេសជិតខាង ហើយបើយើងចង់ទាក់ទាញអ្នកវិនិយោគ ទាល់តែថ្លៃអគ្គិសនីយើងប្រហាក់ប្រហែលនឹងប្រទេសជិតខាងដែរ។ ទី២-យើងត្រូវយកចិត្តទុកដាក់ដែរ តើការបញ្ចុះថ្លៃនេះ EDC គាត់រត់រួចឬអត់ បើរត់រួច វាគឺជារឿងល្អ ។ ជាគោលការណ៍ អគ្គិសនីរដ្ឋត្រូវ ទម្លាក់ថ្លៃឱ្យថោកដើម្បីទាក់ទាញការវិនិយោគនិងអភិវឌ្ឍសេដ្ឋកិច្ចជាតិឱ្យបានជឿនលឿន។ ទី៣-ការបញ្ចុះតម្លៃអគ្គិសនីនេះ នឹងធ្វើឱ្យអ្នកប្រើប្រាស់កាន់តែច្រើនថែមទៀត ហើយខ្ញុំជឿថាមានសកម្មភាពវិនិយោគមួយចំនួនអាចរំពឹងទុកបាន ដោយសារអគ្គិសនីកម្ពុជាថោកជាងគេ » ។
លោកបណ្ឌិតលើកឡើងថា ៖ « សព្វថ្ងៃនេះ យើងមានអគ្គិសនីរយច្រើន ប៉ុន្តែអគ្គិសនីដែលមានគុណភាពមិនសូវមានច្រើនទេ ហើយដើម្បីទាក់ទាញវិនិយោគិនធំឱ្យមកវិនិយោគនៅកម្ពុជាទាល់តែអគ្គិសនីមានគុណភាពច្រើនជាងមុន ព្រោះតម្រូវការនៅតាមរោងចក្រ ខុសពីតម្រូវការប្រើប្រាស់នៅតាមផ្ទះ » ។
យោងតាមទិន្នន័យប្រភពអគ្គិសនី បង្ហាញថា ប្រភពអគ្គិសនីផ្សេងៗដែលផ្គត់ផ្គង់ឲ្យកម្ពុជារួមមាន ៖
១-ប្រភពអគ្គិសនីក្នុងស្រុក មានដូចជា ប្រភពដុតធ្យូងថ្ម, ប្រភពវារីអគ្គិសនី, ប្រភពដុត ប្រេង,ប្រភពBiomass, ប្រភពផ្ទាល់របស់ឧស្សាហកម្ម និងប្រភពផ្ទាល់របស់សេវាកម្មតូចៗ ។
២-ប្រភពអគ្គិសនីនាំចូល មានដូចជា នាំចូលពីប្រទេសថៃ, វៀតណាម និងប្រទេសឡាវ ៕
ចែករំលែកព័តមាននេះ