តុលាការកំពូលលើកពេលកាត់ទោសឧក្រិដ្ឋជនហេង ពៅ សំណុំរឿងដុល្លារក្លែងក្លាយ
រាជធានីភ្នំពេញ ៖ នាព្រឹកថ្ងៃទី២២ ខែមីនា ចៅក្រមតុលាការកំពូលបានលើកយកសំណុំរឿងបណ្តឹងសាទុក្ខរបស់អតីតស្នងការនគរបាលរាជធានីភ្នំពេញ
រាជធានីភ្នំពេញ ៖ នាព្រឹកថ្ងៃទី២២ ខែមីនា ចៅក្រមតុលាការកំពូលបានលើកយកសំណុំរឿងបណ្តឹងសាទុក្ខរបស់អតីតស្នងការនគរបាលរាជធានីភ្នំពេញ ហេង ពៅ លើករណីបង្ខាំងមនុស្សខុសច្បាប់ និងបទរក្សាទុកលុយដុល្លារអាមេរិកក្លែងក្លាយ ។ ប៉ុន្តែតុលាការបានលើកពេលជម្រះក្តី ដោយសារតែជនជាប់ចោទមិនព្រមទទួលយកមេធាវីដែលតុលាការផ្តល់ឲ្យការពារក្តី ហើយចង់រកមេធាវីដោយខ្លួនឯង ។ សវនាការនេះ ដឹកនាំដោយលោកស្រី គិម សត្ថាវី ជាប្រធានក្រុមប្រឹក្សាជំនុំជម្រះ និងលោក ច័ន្ទ តារារស្មី ជាតំណាងមហាអយ្យការ ។
គួរបញ្ជាក់ថា កាលពីថ្ងៃទី១៥ ខែមីនា អ្នកទោសឈ្មោះ ហេង ពៅ ត្រូវបានបញ្ជូនមកតុលាការកំពូលម្តងរួចហើយ ដើម្បីជំនុំជម្រះលើបណ្តឹងសាទុក្ខរបស់ខ្លួនក្នុងករណីបង្ខាំងមនុស្សខុសច្បាប់។ សវនាវការរឿងបង្ខាំងមនុស្សខុសច្បាប់នេះ ក៏ត្រូវបានលើកពេលវិញដែរ ដោយសារជនជាប់ចោទមិនមានមេធាវីការពារក្តី ។
ចំពោះការដែលតុលាការកំពូលបើកសវនាការនាពេលនេះ គឺធ្វើឡើងបន្ទាប់ពីសាលាដំបូងរាជធានីភ្នំពេញ និងសាលាឧទ្ធរណ៍ បានសម្រេចដូចគ្នាផ្តន្ទាទោសជនជាប់ចោទ ហេង ពៅ ដាក់ពន្ធនាគាររយៈពេល១៤ឆ្នាំក្នុងសំណុំរឿងនេះ តែជនជាប់ចោទមិនសុខចិត្ត ក៏បានប្តឹងសាទុក្ខមកតុលាការកំពូលទៀត ក្រោយពីសាលាឧទ្ធរណ៍បានតម្កល់ការសម្រេចរបស់សាលាដំបូងរាជធានីភ្នំពេញចាត់ទុកជាបានការដដែល ។
ជនជាប់ចោទ ហេង ពៅ ត្រូវបានចោទពីបទរក្សាទុកប្រាក់ដុល្លារក្លែងក្លាយ ប្រព្រឹត្តនៅផ្ទះលេខ៩ ភូមិតាខ្មៅ ស្រុកតាខ្មៅ បច្ចុប្បន្នក្រុងតាខ្មៅ ខេត្តកណ្ដាល កាលពីថ្ងៃទី៣១ ខែកក្កដា ឆ្នាំ២០០៦ ៕
ចែករំលែកព័តមាននេះ