រោងចក្រកាត់ដេរ «គ្លូប៊លGAT » ក្ស័យធន ខឹងថៅកែអត់បើកប្រាក់ឈ្នួលឱ្យ កម្មករធ្វើបាតុកម្មបិទផ្លូវ៣៧១
រាជធានីភ្នំពេញ ៖ រោងចក្រកាត់ដេរសម្លៀកបំពាក់«គ្លូប៊លGAT »ក្ស័យធន ថៅកែគ្មានប្រាក់បើកឲ្យ
រាជធានីភ្នំពេញ ៖ រោងចក្រកាត់ដេរសម្លៀកបំពាក់«គ្លូប៊លGAT »ក្ស័យធន ថៅកែគ្មានប្រាក់បើកឲ្យ បានធ្វើឲ្យកម្មករកម្មការិនីប្រមាណជាង៥០០នាក់ដែលបម្រើការងារនៅទីនោះ ផ្ទុះកំហឹងនាំគ្នាធ្វើបាតុកម្មបិទផ្លូវបង្កឲ្យមានការកកស្ទះរយៈពេល១ម៉ោង រហូតអាជ្ញាធរខណ្ឌចុះទៅធ្វើការសម្របសម្រួលទើបព្រមបើកផ្លូវឡើងវិញ។
បាតុកម្មខាងលើនោះបានផ្ទុះឡើងកាលពីវេលាម៉ោង១១និង៣០នាទី ព្រឹកថ្ងៃទី១៣ ខែតុលា ឆ្នាំ២០២២ នៅលើផ្លូវលេខ៣៧១ ភូមិម័ល សង្កាត់ដង្កោ ខណ្ឌដង្កោ ជាប់ព្រំប្រទល់ជាមួយសង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ។
ក្រុមកម្មករខាងលើបានប្រាប់ឲ្យដឹងថា ថៅកែខកខានមិនបានបើកប្រាក់ឈ្នួលនិងប្រាក់បំណាច់ផ្សេងៗឲ្យពួកគាត់ទៅតាមច្បាប់ការងារឡើយ បន្ទាប់ពីរោងចក្រក្ស័យធន់គ្មានការងារឲ្យកម្មករធ្វើ។ ថៅកែមិនបានគោរពច្បាប់ការងារឡើយ ហើយក៏ពុំបានគិតគូពីទុក្ខលំបាករបស់កម្មករសោះ កម្មករខិតខំធ្វើការដើម្បីទទួលបានប្រាក់ឈ្នួលយកទៅចំណាយរាល់តម្រូវការផ្សេងៗ ដូចជា ការហូបចុកប្រចាំថ្ងៃ ការធ្វើដំណើរ ទូទាត់ថ្លៃឈ្នួលផ្ទះ ជាពិសេសបងធនាគារតែម្ដង។
ក្រុមកម្មករបាននិយាយបន្តទៀតថា ដោយសារថៅកែអត់បើកប្រាក់ឈ្នួលឲ្យបែបនេះ ម្យ៉ាងគ្មានការងារធ្វើទៀតនោះ បានធ្វើឲ្យពួកគាត់ជួបការលំបាកយ៉ាងខ្លាំង គ្មានលុយសម្រាប់ចាត់ចែងតម្រូវការផ្សេងៗទេ។ ដំបូងឡើយពួកគាត់ធ្វើការតវ៉ាតាមបែបសន្តិវិធីប៉ុណ្ណោះ ដោយស្នើឲ្យថៅកែបើកប្រាក់ខែ និងប្រាក់បំណាច់ផ្សេងៗឲ្យពួកគាត់ តាមច្បាប់ការងារ តែរយៈពេលជិត១ខែមកហើយ នៅតែគ្មានដំណោះស្រាយទៀត ទើបពេលនេះពួកគាត់សម្រេចចិត្តលើកគ្នាចេញពីក្នុងរោងចក្រទៅឈរបិទផ្លូវតែម្ដងដើម្បីពន្លឿនការដោះស្រាយ។
ដោយឡែអាជ្ញាធរខណ្ឌដង្កោ ក្រោយពីទទួលដំណឹងថា កម្មករធ្វើបាតុកម្មបិទផ្លូវបង្កការកស្ទះចរាចរណ៍បែបនេះ លោកអភិបាលខណ្ឌ ជ គឹមស៊រ បានដឹកនាំកម្លាំងចុះទៅធ្វើការសម្របសម្រួលជាមួយកម្មករ ។លុះរយៈពេលជាង១ម៉ោងក្រោយមក ទើបកម្មករព្រមវិលចូលរងចក្រវិញរង់ចាំទទួលយកដំណោះស្រាយនៅពេលក្រោយ ៕
ចែករំលែកព័តមាននេះ