រាជធានីភ្នំពេញ ៖ នៅសល់តែប៉ុន្មានម៉ោងទៀតប៉ុណ្ណោះ ក្រុមជម្រើសជាតិកម្ពុជាដែលមានរហស្សនាមថា«គោព្រៃកម្ពុជា»នឹងបើកទ្វារពហុកីឡដ្ឋានជាតិអូឡាំពិកទទួលភ្ញៀវក្រុមជម្រើសជាតិឥណ្ឌា ដែល
រាជធានីភ្នំពេញ ៖ នៅសល់តែប៉ុន្មានម៉ោងទៀតប៉ុណ្ណោះ ក្រុមជម្រើសជាតិកម្ពុជាដែលមានរហស្សនាមថា«គោព្រៃកម្ពុជា»នឹងបើកទ្វារពហុកីឡដ្ឋានជាតិអូឡាំពិកទទួលភ្ញៀវក្រុមជម្រើសជាតិឥណ្ឌា ដែលមានរហស្សនាមថា «ខ្លាខៀវឥណ្ឌា»នៅវេលាម៉ោង៦និង៣០នាទីល្ងាចថ្ងៃទី២២ មីនា នេះ ក្នុងជំនួបមិត្តភាពអន្តរជាតិCLEAR ដែលមានការផ្សាយបន្តផ្ទាល់តាមកញ្ចក់ទូរទស្សន៍BTV-News ផងដែរ។
យោងតាមប្រវត្តិប្រកួតក្រុមទាំងពីរធ្លាប់ជួបគ្នាចំនួន៣លើករួចមកហើយ ក្នុងនោះក្រុមគោព្រៃកម្ពុជាឈ្នះ១ ចាញ់២ ហើយលើកចុងក្រោយចាញ់ក្រុមខ្លាខៀវឥណ្ឌា ៦-០ ក្នុងជំនួបដណ្ដើមពាននេរុហ៍ កាលពីឆ្នាំ២០០៧ ។
ថ្លែងក្នុងសន្និសីទសារព័ត៌មានស្តីពីជំនួបមិត្តភាពរវាងក្រុមគោព្រៃកម្ពុជា និងក្រុមខ្លាខៀវឥណ្ឌា កាលពីព្រឹកថ្ងៃទី២១ មីនា ម្សិលមិញនេះ លោក S.Constantine គ្រូបង្វឹកក្រុមខ្លាខៀវឥណ្ឌាបានថ្លែងថា មូលហេតុដែលឥណ្ឌារើសកម្ពុជា ជាគូប្រកួត ព្រោះជឿថា កម្ពុជាមានកីឡាករដែលមានសមត្ថភាពក្នុងការជួយឥណ្ឌាឱ្យបានសមជើងប្រកួតមុនពេលជួបក្រុមជម្រើសជាតិមីយ៉ាន់ម៉ា ។ ម្យ៉ាងកម្ពុជាមានរបបអាហារ និងអាកាសធាតុប្រហាក់ប្រហែលគ្នានឹងប្រទេសមីយ៉ាន់ម៉ាផងដែរ ។ ដូច្នេះក្រោយការប្រកួតមិត្តភាពនេះ ក្រុមជម្រើសជាតិឥណ្ឌានឹងបន្តហាត់សមនៅកម្ពុជា២ថ្ងៃទៀត ដើម្បីត្រៀមតិចនិកថ្មីសម្រាប់ប្រយុទ្ធនឹងក្រុមមីយ៉ាន់ម៉ា ។ គ្រូបង្វឹកជម្រើសជាតិឥណ្ឌាថ្លែងទៀតថា គ្រូបង្វឹកថ្មីរបស់ក្រុមជម្រើសជាតិកម្ពុជានឹងមានសមត្ថភាពបង្កើតទម្រង់លេងល្អៗឱ្យក្រុមកម្ពុជា មិនខាន ។ លោកជូនពរឱ្យក្រុមកម្ពុជាជួបតែភាពជោគជ័យ ប៉ុន្តែលើកលែងថ្ងៃស្អែក (ថ្ងៃនេះ) ចោល ព្រោះឥណ្ឌាមកនេះគឺដើម្បីឈ្នះ មិនមែនមកដើម្បីចាញ់ទេ ។
ចំណែកលោក Leonardo Vitorino គ្រូបង្វឹកថ្មីរបស់ក្រុមគោព្រៃកម្ពុជាមិនបានឆ្លើយតបអ្វីទៅកាន់សម្តីខាងលើនេះទេ លោកគ្រាន់តែមានប្រសាសន៍ថា កូនក្រុមរបស់លោកបានត្រៀមខ្លួនរួចរាល់ហើយសម្រាប់អ្នកគាំទ្រទាំងអស់គ្នា ។ ឥណ្ឌាជាក្រុមខ្លាំងប៉ុន្តែកម្ពុជាក៏មិនអន់ដែរព្រោះមានកីឡាករល្អៗដែលអាចលេងបាន ហើយបើលេងជាក្រុមបានល្អនោះ ក្រុមគោព្រៃកម្ពុជានឹងមានឱកាសធ្វើឱ្យអ្នកគាំទ្រសប្បាយចិត្តមិនខាន ។ លោកក៏បានលើកឡើងពីចាន់ វឌ្ឍនាកា ផងដែរថា ជាកីឡាករមានសមត្ថភាពនិងនៅក្មេងថែមទៀត អាចចូលលេងនៅលីគកំពូលជប៉ុនបាន មិនត្រឹមលេងនៅលីគទី៣នោះទេ ។ គាត់ជាកីឡាករតែងមានមោទនភាពក្នុងការស្លៀកពាក់ឯកសណ្ឋានជម្រើសជាតិកម្ពុជា ទើបលោកហៅគាត់ឱ្យត្រឡប់មកវិញ ។
ដោយឡែកសហព័ន្ធកីឡាបាល់ទាត់កម្ពុជាបានប្រកាសថា សំបុត្រប្រភេទ១តម្លៃ១ម៉ឺនរៀល សម្រាប់ចូលទស្សនាការប្រកួតរវាងក្រុមជម្រើសជាតិកម្ពុជា និងក្រុមជម្រើសជាតិឥណ្ឌា បានលក់អស់ហើយ នៅសល់តែសំបុត្រប្រភេទ២តម្លៃ៥ពាន់រៀលប៉ុណ្ណោះ ។ ដូច្នេះអ្នកគាំទ្រ សូមរួសរាន់មកទិញឲ្យបានទាន់ពេលវេលា ចៀសវាងការអត់សំបុត្រចូលទស្សនា ប្ដូរទៅជាការផ្លោះរបងដូចពេលកន្លងទៅ ៕
ចែករំលែកព័តមាននេះ