រាជធានីភ្នំពេញ ៖ កម្មការិនីរោងចក្រកាត់ដេរសម្លៀកបំពាក់យីហោ«ធៀនស៊ុង» ស្ថិតនៅក្នុងបុរីប៊ុន ហួរ ភូមិព្រៃព្រីងខាងត្បូង សង្កាត់ចោមចៅ ខណ្ឌពោធិ៍សែនជ័យ បានបន្តដួលសន្លប់ជាង៥០នាក់ទៀត កាលពីវេលាម៉ោង១០ព្រឹកថ្ងៃទី២០ ខែមីនា ហើយត្រូវបានខាងតំណាងរោងចក្រដឹកបញ្ជូនទៅកាន់គ្លីនិកឯកជន ដើម្បីសង្គ្រោះបន្ទាន់ភ្លាមៗ ។
រីឯអ្នកដែលមិនដួលសន្លប់ ត្រូវបានថៅកែបង្ខំឲ្យនៅធ្វើការបន្តទៀត ហើយរហូតដល់វេលារសៀលថ្ងៃដដែល ដោយសារពេលកំពុងធ្វើការមានកម្មការិនីសន្លប់បន្តទៀត ហើយថៅកែនៅមិនព្រមឲ្យកម្មករចេញទៀតនោះ ទើបអាជ្ញាធរខណ្ឌពោធិ៍សែនជ័យ បញ្ជាឲ្យអាជ្ញាធរសង្កាត់ចោមចៅ ចុះទៅផ្អាកសកម្មភាពរោងចក្រនោះជាបណ្ដោះអាសន្នសិន ដើម្បីកុំឲ្យមានអ្នកដួលសន្លប់បន្តទៀត ព្រោះតែរោងចក្រនេះមានកម្មករដួលសន្លប់៣ថ្ងៃជាប់ៗគ្នាមកហើយ ។
តាមប្រភពព័ត៌មានបានឲ្យដឹងថា នេះជាលើកទី៣ហើយដែលកម្មករនៅរោងចក្រនេះបានដួលសន្លប់ ។ កាលពីព្រឹកថ្ងៃទី១៧ ខែមីនា បានដួលសន្លប់ចំនួន៥នាក់ មូលហេតុបណ្ដាលមកពីការភិតភ័យខណៈមានការភ្ញាក់ផ្អើលពេលមានទុស្សេឆេះកាប៊ីនភ្លើងមួយនៅក្នុងរោងចក្រ ហើយអ្នករងគ្រោះត្រូវបានបញ្ជូនទៅសង្គ្រោះបន្ទាន់។ ឯកម្មករដែលមិនសន្លប់ មិនត្រូវបានថៅកែឲ្យឈប់សម្រាកឡើយ គឺឲ្យនៅធ្វើការរហូតដល់ចប់ចុងចប់ដើម ។
លុះនៅថ្ងៃទី១៨ ខែមីនា កម្មករបានចូលទៅធ្វើការតាមធម្មតា ប៉ុន្តែខណៈកំពុងធ្វើការសុខៗស្រាប់តែមានកម្មការិនីម្នាក់ដួលសន្លប់ជាថ្មីទៀត ជាហេតុបង្កឲ្យមានការភ្ញាក់ផ្អើលក៏មានអ្នកដួលសន្លប់ជាបន្តបន្ទាប់រដូករណែល ក្នុងនោះមានកម្មការិនីចំនួន៧៣នាក់និងកម្មករម្នាក់ និងបានបង្កឲ្យមានការជ្រួលច្របល់ពេញរោងចក្រតែម្ដង ។ រំលងបាន ស្រាប់តែនៅថ្ងៃទី២០ ខែមីនា ក៏មានកម្មការិនីជាង៥០នាក់ដួលសន្លប់ទៀត ។
ប្រភពដដែលបន្តថា រហូតមកដល់ពេលនេះ មូលហេតុនៃការដួលសន្លប់នៅតែជាអាថ៌កំបាំងដដែល ខណៈអ្នកខ្លះបានដាក់ការសង្ស័យថា បណ្ដាលមកពីបញ្ហាអាកាសធាតុ និងបរិស្ថាននៅក្នុងរោងចក្រអាប់អួ គួបផ្សំនឹងកម្មករធ្វើការហួសកម្លាំង មានសុខភាពខ្សាយ ទ្រាំនឹងក្លិនគីមីក្នុងក្រណាត់មិនបាន និងការភិតភ័យផង ទើបមានការដួលសន្លប់តែម្ដង។
ទោះបីជាបែបណា ករណីដួលសន្លប់នេះ កំពុងស្ថិតនៅក្នុងការស្រាវជ្រាវរបស់មន្ត្រីជំនាញពាក់ព័ន្ធនៅឡើយ ។ ចំណែករោងចក្រត្រូវបានបិទទ្វារជាបណ្ដោះអាសន្ន រង់ចាំការស្រាវជ្រាវរកមូលហេតុពិតប្រាកដ ហើយរយៈពេល៣ថ្ងៃកន្លងមកនេះ មានអ្នកដួលសន្លប់សរុបជាង១០០នាក់ហើយ ៕
ចែករំលែកព័តមាននេះ