រាជធានីភ្នំពេញ ៖ នៅទីស្នាក់ការគណៈកម្មាធិការជាតិអូឡាំពិកកម្ពុជា កាលពីថ្ងៃទី២១ មីនា មានបើកវគ្គបណ្ដុះបណ្ដាលអាជ្ញាកណ្ដាលប៊ូល និងប៉េតង់កម្រិតអន្តរជាតិលើកទី១ ដែលមានសិក្ខាកាមជាមន្ត្រី
រាជធានីភ្នំពេញ ៖ នៅទីស្នាក់ការគណៈកម្មាធិការជាតិអូឡាំពិកកម្ពុជា កាលពីថ្ងៃទី២១ មីនា មានបើកវគ្គបណ្ដុះបណ្ដាលអាជ្ញាកណ្ដាលប៊ូល និងប៉េតង់កម្រិតអន្តរជាតិលើកទី១ ដែលមានសិក្ខាកាមជាមន្ត្រីតំណាងសហព័ន្ធកីឡាប៊ូលនិងប៉េតង់មកពីតាមបណ្ដាប្រទេសក្នុងតំបន់អាស៊ីអាគ្នេយ៍ចំនួន៦ចូលរួម ។
តាមការឱ្យដឹងពីមន្ត្រីសហព័ន្ធកីឡាប៊ូល និងប៉េតង់កម្ពុជាថា នេះគឺជាលើកទី១ហើយដែលកម្ពុជាទទួលធ្វើជាម្ចាស់ផ្ទះបើកវគ្គបណ្ដុះបណ្ដាលអាជ្ញាកណ្ដាលប៊ូល និងប៉េតង់កម្រិតអន្តរជាតិ ដែលវគ្គនេះសិក្សាទាំងទ្រឹស្ដី និងការអនុវត្តជាក់ស្ដែងនៅលើទីលាន ។ ជាពិសេសការអនុវត្តជាក់ស្ដែងនៅលើទីលានធ្វើយ៉ាងណាឱ្យមានការវាស់វែងមានភាពសុក្រឹត និងយុត្តិធម៌ ។
វគ្គសិក្សានេះមានសិក្ខាកាមចូលរួមចំនួន២៧នាក់ក្នុងនោះមកពីមីយ៉ាន់ម៉ា២នាក់ វៀតណាម២នាក់ ឥណ្ឌូណេស៊ី២នាក់ ព្រុយណេ៤នាក់ ម៉ាឡេស៊ី៦នាក់ និងកម្ពុជា១១នាក់ ដោយធ្វើឡើងចាប់ពីថ្ងៃទី២១ដល់២៥ មីនា ។ ចំណែកគ្រូឧទ្ទេសក្នុងវគ្គនេះមាន២រូបគឺលោក មាស សារិន ជាមន្ត្រីនៅក្នុងសហព័ន្ធកីឡាប៊ូល និងប៉េតង់កម្ពុជា និងលោក Sheikh Ismail Silan ជាគ្រូអាជ្ញាកណ្ដាលប៊ូល និងប៉េតង់អន្តរជាតិមកពីម៉ាឡេស៊ី ។
លោក អិុន គឹមស្រ៊ុន អគ្គលេខាធិការសហព័ន្ធកីឡាប៊ូល និងប៉េតង់កម្ពុជា បានឱ្យដឹងថា វគ្គនេះមានសារសំខាន់ខ្លាំងណាស់ព្រោះវាជាឱកាសដ៏ល្អសម្រាប់កម្ពុជាក្នុងការត្រៀមខ្លួនធ្វើជាម្ចាស់ផ្ទះប្រកួតកីឡាស៊ីហ្គេមឆ្នាំ២០២៣ផងក៏ដូចជាចូលរួមប្រកួតនៅលើឆាកអន្តរជាតិផងដែរ ។ ម្យ៉ាងវិញទៀត រាល់ការបញ្ជូនកីឡាករកីឡាការិនីទៅចូលរួមប្រកួតនៅលើឆាកអន្តរជាតិ បើសិនជាយើងគ្មានគ្រូបង្វឹក និងអាជ្ញាកណ្ដាលទៅជាមួយទេគេនឹងពិន័យយើងជាមិនខាន ។ លោកបានឱ្យដឹងទៀតថា វគ្គនេះអាចតឹងតែងបន្តិចហើយព្រោះថាវាជាវគ្គកម្រិតអន្តរជាតិ អាចមានអ្នកដែលប្រឡងជាប់ត្រឹមតែ១០ទៅ២០ភាគរយប៉ុណ្ណោះ ហើយបើធ្លាក់ចេញពីវគ្គនេះ គឺបានជាប់ត្រឹមតែអាជ្ញាកណ្ដាលថ្នាក់ជាតិប៉ុណ្ណោះ ៕
ចែករំលែកព័តមាននេះ