ទឹកស្ទឹងព្រែកត្នោតបន្តហក់ឡើងយឺតៗ ហូរចូលលិចលំនៅឋាន៥សង្កាត់ ក្នុងខណ្ឌដង្កោ
- ភ្នំពេញ
រាជធានីភ្នំពេញ ៖ ទឹកស្ទឹងព្រែកត្នោបានបន្តឡើងដោយរហូតមកដល់ថ្ងៃទី១២ ខែតុលា ឆ្នាំ២០២២
រាជធានីភ្នំពេញ ៖ ទឹកស្ទឹងព្រែកត្នោបានបន្តឡើងដោយរហូតមកដល់ថ្ងៃទី១២ ខែតុលា ឆ្នាំ២០២២ បណ្ដាលឲ្យហូរចូលនិងលិចលំនៅដ្ឋានប្រជាពលរដ្ឋជាច្រើនខ្នង នៅក្នុងសង្កាត់ចំនួន៥ របស់ខណ្ឌដង្កោ រាជធានីភ្នំពេញ ដែលលំនៅដ្ឋានទាំងនោះសុទ្ធតែសង់ស្ថិតនៅជាប់ផ្ទាល់ និងមាត់ស្ទឹងតែម្ដង ពុំមែននៅឆ្ងាយពីមាត់ស្ទឹងនោះទេ ហើយកម្រិតទឹកស្ទឹងដែលកំពុងកើនឡើងនេះគឺមានសភាពយឺតៗប៉ុណ្ណោះ។ ពុំមែនហក់ឡើងយ៉ាងគំហុក ដែលនាំឲ្យមានការព្រួយបារម្ភខ្លាំងនោះឡើយ ហើយក៏កំពុងស្ថិតនៅក្នុងកម្រិតតាមដាននៅឡើយ។
បើតាមរបាយការរបស់មន្ត្រីដែលប្រចាំការនៅស្ថានីយ៍ស្ពាន7មករា កំពង់ទួល បានឲ្យដឹងថា នៅព្រឹកថ្ងៃទី១២ ខែតុលានេះ ទឹកនៅខាងមុខទ្វារទឹកមានកម្ពស់៥,៣២ម៉ែត្រ ខ្ពស់ជាងទំនប់បង្ហៀរ០,៥២ម៉ែត្រ។មន្ត្រីប្រចាំការបាន បើកទ្វារធំរំដោះទឹកកម្ពស់២,៧០×៤សន្លឹក ចំណែកនៅខាងក្រោយទ្វារទឹកមានកម្ពស់៧,៩០ម៉ែត្រមានការកើនឡើង ០,៣០ម៉ែត្រ បើធៀបកាលវេលាព្រឹកថ្ងៃទី១១ ខែតុលា ទឹកមានកម្ពស់៧,៦០ម៉ែត្រ ដោយឡែកកម្ពស់ទឹកទ្វារមុខ និងក្រោយទ្វារខុសគ្នា០,៤២ម៉ែត្រ ហើយស្ថានភាពទឹកស្ទឹងហូរក្នុងកម្រិតពេញស្ទឹង និងចូលដល់ជើងទំនប់សណ្ដរស្ទឹង។
អាជ្ញាធរខណ្ឌដង្កោបានឱ្យដឹងថា រហូតមកទល់នឹងពេលនេះ លំនៅឋានប្រជាពលរដ្ឋមួយចំនួនក្នុងភូមិជាង១០ ស្ថិតនៅក្នុងសង្កាត់ចំនួន៦ របស់ខណ្ឌដង្កោ រួមមានដូចជាសង្កាត់គងនយ សង្កាត់ស្ពានថ្ម សង្កាត់ព្រៃវែង សង្កាត់សាក់សំពៅ សង្កាត់ដង្កោនិងសង្កាត់ជើងឯក ប៉ុន្តែផ្ទះទាំងនោះសុទ្ធតែសង់នៅលើទីទំនាបជាប់ផ្ទាល់និងមាត់ស្ទឹង ហើយនៅពេលទឹកស្ទឹងហក់ឡើងគឺទឹកហូរចូល បណ្ដាលឲ្យលិច ហើយខ្លះលិចជ្រៅ និងខ្លះទៀតលិចរាក់ ហើយប៉ុន្តែពុំបណ្ដាលឲ្យមានប្រជាពលរដ្ឋណាម្នាក់រងគ្រោះថ្នាក់ឡើយ ។
ប្រភពដដែលបានប្រាប់ឲ្យដឹងបន្តទៀតថា ការកើនឡើងនូវកម្រិតទឹកនេះគឺដោយសារតែមានការហូរចាក់មកពីក្នុងភូមិសាស្ត្រខេត្តកំពង់ស្ពឺ ប៉ុន្តែទោះបីជាមានការហក់ឡើងក្ដី គឺឡើងក្នុងស្ថានយឺតប៉ុណ្ណោះមិនគំហុកឡើយ។រហូតមកដល់ពេលនេះពុំទាន់មានសញ្ញាដែលត្រូវប្រកាសអាសន្ននៅឡើយទេ ហើយអាជ្ញាធរមូលដ្ឋាន បានសហការណ៍ជាមួយមន្ត្រីក្រសួងនិងមន្ទីរធនធានទឹកនិងឧតុនិយមធ្វើការតាមដានស្ថានភាពទឹកស្ទឹងព្រែកត្នោតនេះជាប្រចាំមិនមានការធ្វេសប្រហែសឡើយ ៕
ចែករំលែកព័តមាននេះ