ប្រទេសកូរ៉េខាងត្បូងវាយតម្លៃកាលពីថ្ងៃទី២០ មីនា ថា ការសាកល្បងរបស់កូរ៉េខាងជើងនូវម៉ូទ័រកាំជ្រួចមួយគឺជាការរីកចម្រើនគួរឱ្យកត់សម្គាល់នៃកម្មវិធីបាលីស្ទិករបស់ក្រុងព្យុងយ៉ាង ។
បណ្តាសារព័ត៌មានកូរ៉េខាងជើងរាយការណ៍កាលពីថ្ងៃទី១៩ មីនា ថា មេដឹកនាំលោកគីម ជុងអ៊ុន បានត្រួតពិនិត្យការសាកល្បងម៉ូទ័រ កាំជ្រួចមួយដែលការសាកល្បងនេះធ្វើឡើងជួនពេលគ្នាជាមួយទស្សនកិច្ចនៅក្រុងប៉េកាំងរបស់រដ្ឋមន្ត្រីការបរទេសអាេមរិក លោក REX TILLERSON ។
ក្រុងព្យុងយ៉ាងរយៈពេលប៉ុន្មានខែចុងក្រោយនេះ បង្កើនការអភិវឌ្ឍន៍កម្មវិធីបាលីស្ទិក និងនុយក្លេអ៊ែរ ទោះបីមានការហាមឃាត់របស់សហគមន៍អន្តរជាតិក្តី ។ មហិច្ឆតារបស់ក្រុងព្យុងយ៉ាងគឺផលិតមីស៊ីលបាលីស្ទិករំលងទ្វីប ICBM ដែលអាចផ្ទុកក្បាលគ្រាប់នុយក្លេអ៊ែរបាញ់ដល់ទ្វីបអាមេរិក ។
លោក LEE JIN WOO អ្នកនាំពាក្យរបស់ក្រសួងការពារប្រទេសកូរ៉េខាងត្បូងថ្លែងទៅកាន់ក្រុមអ្នកកាសែតថា ការសាកល្បងលើកមុននូវម៉ូទ័រកាំជ្រួចរបស់កូរ៉េខាងជើងគឺកាលពីខែកញ្ញា ក្រោមវត្តមានរបស់លោកគីម ជុងអ៊ុន ដែរ ដែលពេលនោះស្នើដល់ប្រទេសរបស់លោកឱ្យបាញ់បង្ហោះបណ្តាផ្កាយរណបរយៈពេល២ឆ្នាំទៀត ៕
ចែករំលែកព័តមាននេះ