ខេត្តកំពង់ឆ្នាំង ៖ គំនរសម្រាមនៅសួនច្បារវិមានឯករាជ្យក្នុងក្រុងកំពង់ឆ្នាំងកំពុងបង្ហាញភ្ញៀវទេសចរណ៌ជាតិ និងអន្តរជាតិដែលធ្វើដំណើរកម្សាន្តនៅសួនច្បារយ៉ាងស្រស់ស្អាតកណ្តាលបេះដូងក្រុងកំពង់ឆ្នាំង
ខេត្តកំពង់ឆ្នាំង ៖ គំនរសម្រាមនៅសួនច្បារវិមានឯករាជ្យក្នុងក្រុងកំពង់ឆ្នាំងកំពុងបង្ហាញភ្ញៀវទេសចរណ៌ជាតិ និងអន្តរជាតិដែលធ្វើដំណើរកម្សាន្តនៅសួនច្បារយ៉ាងស្រស់ស្អាតកណ្តាលបេះដូងក្រុងកំពង់ឆ្នាំង ពិសេស អ្នកមកហាត់ប្រាណទាំងព្រឹក និងល្ងាច ។ គំនរសម្រាមទាំងនេះមានរយៈពេល២ទៅ៣ថ្ងៃហើយ ដោយគ្មានឃើញក្រុមហ៊ុនណាមកប្រមូលយកឡើយធ្វើឱ្យមានការរិះគន់ទៅថ្នាក់ដឹកនាំ ពិសេសសាលាក្រុងកំពង់ឆ្នាំង ថា មិនបានយកចិត្តទុកដាក់លើបញ្ហានេះ ។
នៅជុំវិញសួនច្បារវិមានឯករាជ្យគេឃើញមានធុងសម្រាមជាច្រើនបានដាក់យ៉ាងត្រឹមត្រូវ ប៉ុន្តែដោយសារគ្មានការប្រមូលយកធ្វើឱ្យសម្រាមបានពេញធុងហៀរចេញមកក្រៅ និងបន្ទាប់មកអ្នកចោលសម្រាមបានយកសម្រាមមក.គចោលនៅក្បែធុងសម្រាមបន្ថែមទៀត ។ គំនរសម្រាមក្រៅធុងទាំងនោះត្រូវបានសត្វឆ្កែ កកាយរកចំណីបណ្តាលឱ្យរាយប៉ាយ ហើរពេញសួនមើលទៅមិនខុសពីសួនច្បារសម្រាមឡើយ ។ មិនត្រឹមតែប៉ុណ្ណោះទេ មានទាំងមកចុះងូតទឹក បោកខោអាវក្នុងអាងនាគបាញ់ទឹកទៀត ដែលអាជ្ញាធរក្រុងបណ្តោយឱ្យមានករណីបែបនេះកើតឡើង ឬសួនច្បារនេះគ្មានអ្នកមើលថែនោះទេ ? ។ ប្រជាពលរដ្ឋដែលដើរហាត់ប្រាណបានប្រាប់ថា គំនរសម្រាមនេះមាន២ទៅ៣ថ្ងៃហើយមិនដឹងបាត់ក្រុមហ៊ុនប្រមូលសម្រាមនោះទៅណាទេ មិនឃើញមកប្រមូលសម្រាមចេញពីក្នុងសួនច្បារ ជាមុខមាត់ខេត្តបែបនេះ ។ពួកគាត់ប្រាប់ថា សម្រាមទាំងនោះភាគច្រើនគឺអ្នកលក់ដូរពេលល្ងាចជាអ្នកយកមកចោល ។
ជុំវិញបញ្ហានេះលោក ហៃ មនោរម្យ អភិបាលក្រុងកំពង់ឆ្នាំងបានប្រាប់តាមទូរស័ព្ទនៅរសៀលថ្ងៃទី១៩ ខែមីនា ឆ្នាំ២០១៧ ថា បញ្ហានេះមកពីក្រុមហ៊ុនប្រមូលសម្រាមទើបដេញថ្លៃបានថ្មីមិនទាន់អនុវត្តបានល្អតាមសៀវភៅបន្ទុក ។ កន្លងទៅខាងសាលាក្រុងធ្លាប់បានណែនាំច្រើនដងហើយតែនៅតែធ្វើមិនបានគឺប្រមូលមិនបានទៀងទាត់ ហេតុនេះលោកនឹងណែនាំម្តងទៀត ។ លោកអភិបាលក្រុងកំពង់ឆ្នាំងក៏បានបញ្ចាក់ដែរថា នៅថ្ងៃទី២២ ខែមិនា ឆ្នាំ២០១៧ ខាងមុខនេះអាជ្ញាធរខេត្តនឹងមានការប្រជុំមួយជាមួយអ្នកប្រមូលសម្រាម អ្នកលក់ដូរ អាជីវកម្ម ផ្ទះសំណាក់ និងភោជនីយ៍ដ្ឋានជាដើម ដើម្បីនិយាយពីរឿងអនាម័យទីក្រុងស្អាតនេះ ៕
ចែករំលែកព័តមាននេះ