ខេត្តបាត់ដំបង ៖ ប្រជាកសិករដែលដាំម្ទេស(ម្ទេសអាចម៍សត្វ) កំពុងប្រឈមមុខនឹងការខាតបង់យ៉ាងធ្ងន់ធ្ងរនៅក្នុងឆ្នាំនេះ ដោយសារតែឈ្មួញកណ្ដាលទិញផ្លែម្ទេសក្នុងតម្លៃយ៉ាងថោកបំផុតមិនធ្លាប់មានពីមុនមក ហើយពួកគាត់យល់ថាទំនងដោយសារតែការបើកដៃឱ្យឈ្មួញនាំចូលកសិផលពីប្រទេសជិតខាងច្រើនលើសលប់ពេក ។
ប្រជាកសិករបានអំពាវនាវដល់ស្ថាប័នពាក់ព័ន្ធនានា និងរាជរដ្ឋាភិបាលឱ្យជួយទប់ស្កាត់ និងជួយរកទីផ្សារសម្រាប់កសិផលក្នុងស្រុកផង ។
កសិករឈ្មោះ ចឹក សត់ ភេទស្រី អាយុ៤១ឆ្នាំ រស់នៅភូមិកំពង់ឆ្លង ឃុំវត្តតាមឹម ស្រុកសង្កែ និយាយថា ផលម្ទេសឆ្នាំនេះធ្លាក់ថ្លៃដល់កម្រិតទាបបំផុតស្មើនឹងជាង១០ដងបើប្រៀបធៀបទៅនឹងឆ្នាំមុនៗ ។ ឆ្នាំនេះតម្លៃផ្លែម្ទេស១គីឡូក្រាមតែ២.៥០០រៀលប៉ុណ្ណោះ ខណៈឆ្នាំមុនៗ១គីឡូក្រាមថ្លៃចាប់ពី១០.០០០ម៉ឺនរៀល ដល់២៧.០០០រៀលឯណោះ រីឯថ្លៃឈ្នូលបេះ ថ្លៃជី ថ្លៃភ្ជួរដី ថ្លៃពូជ និងថ្លៃទឹកស្រោចស្រពគឺតម្លៃថេរដដែល ។
ស្ថិតក្នុងចម្ការម្ទេស អ្នកស្រី ចឹក សត់ បេះម្ទេសបណ្ដើរនិយាយរអ៊ូរទាំបណ្ដើរថា មិនមែនមានតែអ្នកស្រីទេដែលប្រឈមនឹងការខាតបង់ គឺប្រជាកសិកររាប់រយគ្រួសារនៅកន្លែងដទៃៗទៀតដែលដាំម្ទេស សុទ្ធតែប្រឈមនឹងការខាតឡុងចុងដូចគ្នាក្នុងឆ្នាំនេះ រហូតកសិករខ្លះជំពាក់បំណុលគេវ័ណ្ឌកទៀតផង ។
ម្ចាស់ចម្ការមួយរូបទៀតគឺលោក ភឿក រដ្ឋា អាយុ៣៧ឆ្នាំ រស់នៅតំបន់នោះដែរ បានត្អូញត្អែរអំពីការធ្លាក់ចុះនៃតម្លៃម្ទេសថា«ឆ្នាំនេះខ្ញុំរកតែថ្លៃដើមស្ទើរមិនរួចខ្លួនផង» ។ គាត់និយាយថា ដីដំណាំម្ទេសរបស់គាត់ដែលអាស្រ័យផលរាល់ឆ្នាំមានចំនួនមួយហិកតា ។ ជារៀងរាល់ឆ្នាំ ក្នុង១រដូវគាត់ត្រូវចំណាយទុនលើការភ្ជួរដី ថ្លៃជី ថ្លៃទឹកស្រោចស្រព និងថ្លៃបេះពេលប្រមូលផលសរុប២.០០០ដុល្លារសម្រាប់ផ្ទៃដី១ហិកតានេះ ។
លោក ភឿក រដ្ឋា និយាយទៀតថា កាលពីឆ្នាំទៅមិញផ្លែម្ទេសបានថ្ងៃខ្ពស់គឺ ចាប់ពី១០.០០០រៀល រហូតដល់២៧.០០០រៀលក្នុង១គីឡូក្រាម ។ គាត់ប្រមូលផលបានជិត១តោនក្នុង១ហិកតា ហើយជាមធ្យមលក់បានពី៧ទៅ៨ពាន់ដុល្លារ បើទូទាត់នឹងការចំណាយ គឺអាចចំណេញជាងពាក់កណ្ដាលនៃការចំណាយ តែសម្រាប់ឆ្នាំនេះប្រហែលមិនរួចថ្លៃចំណាយទេ ។
លោក ភឿក រដ្ឋា បានប្រាប់ថា ពេលនេះម្ទេស១គីឡូក្រាមថ្លៃតែ២.៥០០រៀលប៉ុណ្ណោះ រីឯថ្លៃឈ្នួលបេះ១គីឡូក្រាម១.០០០រៀលដដែល និងតម្លៃសេវាដទៃទៀតក៏នៅថេរដដែលដែរ ។ ដូច្នេះ កសិករដែលមានដំណាំម្ទេសគឺច្រើនភូមិច្រើនគ្រួសារណាស់ ដែលកំពុងប្រឈមនឹងការខាតបង់ក្នុងឆ្នាំនេះ ។
មិនថាតែលោក ភឿក រដ្ឋា ទេដែលរអ៊ូរទាំអំពីការខាតបង់នេះ គឺស្ទើរគ្រប់ទីកន្លែងសុទ្ធតែប្រឈមមុខនឹងវិបត្តិម្ទេសធ្លាក់ថ្លៃនេះដូចគ្នា រហូតកសិករខ្លះសម្រេចចិត្តនាំក្រុមគ្រួសារធ្វើចំណាកស្រុកទៅរកការងារធ្វើនៅតាមបណ្ដាស្រុកនានាជាប់ព្រំដែនថៃ ឬចេញទៅធ្វើការនៅប្រទេសថៃតែម្ដង ដើម្បីរកប្រាក់សងធនាគារ ។
ជាមួយនឹងការធ្លាក់ថ្លៃយ៉ាងគំហុកនៃផ្លែម្ទេសនេះ កសិករភាគច្រើនបានស្វែងយល់ថា អាចបណ្ដាលមកពីលំហូរចូលនៃបន្លែពីប្រទេសជិតខាងច្រើនលើសលប់ពេក ។ កសិករបានស្ដីបន្ទោសស្ថាប័នពាក់ព័ន្ធនានា និងថ្នាក់ដឹកនាំថា ហាក់ធ្វើព្រងើយកន្តើយមិនព្យាយាមទប់ស្កាត់ចំពោះការនាំចូលបន្លែទាំងនោះ ទើបធ្វើឱ្យបន្លែ និងកសិផលនានានៅក្នុងស្រុកគ្មានទីផ្សារ ។
ប៉ុន្តែមន្ត្រីកសិកម្មមួយរូបដែលសុំមិនប្រាប់ឈ្មោះបានឆ្លើយតបដូច្នេះថា តម្លៃកសិផលក្នុងស្រុកដែលធ្លាក់ចុះ ដោយសារតែទីផ្សារដែលយើងធ្លាប់នាំចេញកំពុងចង្អៀតនិងចាល់ដូចគ្នាដែរ ។ មន្ត្រីរូបនេះបញ្ជាក់ថា មិនមែនមានតែម្ទេសទេដែលធ្លាក់ថ្លៃ គឺស្ទើរតែគ្រប់កសិផលទាំងអស់ នេះក៏ដោយសារតែទីផ្សារបរទេសកំពុងជួបបញ្ហាដែរ អីុចឹងហើយទើបកសិផលក្នុងស្រុករបស់យើងងើបមិនរួច ។
ទោះជាមានការបកស្រាយដូច្នេះក្ដី ប្រជាកសិករនៅតែអំពាវនាវដល់ស្ថាប័នរដ្ឋនានានិងរាជរដ្ឋាភិបាល ឱ្យប្រឹងប្រែងជួយរកទីផ្សារកសិផលជូនកសិករផង ។ ពួកគាត់បានលើកឡើងថា បើតាមពិនិត្យជាក់ស្ដែង កសិករខ្មែរបច្ចុប្បន្នអាចដាំដំណាំបានល្អស្ទើរគ្រប់មុខទាំងអស់មិនចាញ់ប្រទេសជិតខាងទេ តែពេលបានផលបែរជាគ្មានទីផ្សារទៅវិញ។ ដូច្នេះ បើមានការទប់ស្កាត់ការនាំចូលកសិផល ឬបន្លែផ្សេងៗពីបរទេសបានខ្លះ ប្រហែលកសិផលខ្មែរអាចមានទីផ្សារគ្រាន់បើជាងសព្វថ្ងៃជាមិនខាន ៕
ចែករំលែកព័តមាននេះ