រាជធានីភ្នំពេញ ៖ អ្នកស្រីសូ សាវឿន ម្ចាស់បទចម្រៀង«ស្ទឹងសែនប៉ារីស»ដែលបានចាកចេញទៅរស់នៅប្រទេសបារាំងជាង៣០ឆ្នាំមកហើយនោះតែងតែមកលេងប្រទេសកំណើតជា រឿយៗ ។ ពេលនេះ
រាជធានីភ្នំពេញ ៖ អ្នកស្រីសូ សាវឿន ម្ចាស់បទចម្រៀង«ស្ទឹងសែនប៉ារីស»ដែលបានចាកចេញទៅរស់នៅប្រទេសបារាំងជាង៣០ឆ្នាំមកហើយនោះតែងតែមកលេងប្រទេសកំណើតជារឿយៗ ។ ពេលនេះអ្នកស្រីសូ សាវឿន បានមកលេងប្រទេសកម្ពុជាសាជាថ្មី ។
អ្នកស្រីសូ សាវឿន នៅមានសុខភាពរឹងប៉ឹងល្អ ហាក់មិនសក្តិសមទៅនឹងវ័យជាង៧០ឆ្នាំទេ ចំណែកទឹកដមសំឡេងនៅតែពីរោះ ។
ប្រាប់អ្នកយកព័ត៌មានកាលពីពេល ថ្មីៗកន្លងមកអ្នកស្រីសូ សាវឿន ឱ្យដឹងថាអ្នកស្រីមកលេងប្រទេសកម្ពុជាច្រើនដងមកហើយ ។
មកលេងកម្ពុជាលើកនេះ អត់ចាំថាជាលើកបានប៉ុន្មានទេ ព្រោះតាំងពីឆ្នាំ១៩៨៨តែងតែមកជា រឿយៗ ។ មកលើកនេះ គឺមកកម្សាន្តដូចរាល់ដងដោយមានអ្នកនៅក្នុងស្រុកម្នាក់អាណិតស្រឡាញ់អ្នកស្រីបានអញ្ជើញអ្នកស្រីមកលេងកម្ពុជាឱ្យសប្បាយ ។ «អ្នកដែលអញ្ជើញខ្ញុំមកក្នុងន័យយល់ថាវ័យយើងហក់ទៅមុខ ហើយខ្ញុំពិតជាអរគុណដល់ម្ចាស់កម្មវិធីដែលជួយការងារមកកម្សាន្តនេះទាំងស្រុងតែម្តង ។ សម្រាប់ការមកលេងមាតុភូមិនេះ គឺមកកម្សាន្ត និងចូលរួមកម្មវិធី ផ្សេងៗរបស់មិត្តភក្តិព្រមទាំងការងារជាក់ស្តែង» ។
មានវ័យជាង៧០ឆ្នាំហើយក្តី តែអ្នកស្រីសូ សាវឿន ឱ្យដឹងថា អ្នកស្រីនៅតែចូលរួមច្រៀង មិនរាថយទេឱ្យតែគេត្រូវការ ។ ជាក់ស្តែងនៅស្រុកបារាំងគេនៅតែហៅច្រៀងរាល់កម្មវិធីបុណ្យទានដូចជាចូលឆ្នាំថ្មីប្រពៃណីជាតិខ្មែរ ភ្ជុំបិណ្ឌ ឬកម្មវិធីសប្បុរសធម៌ ផ្សេងៗ ។
ចំពោះអំឡុងពេលមកលេងកម្ពុជានេះ បើសិនជាស្ថានីយទូរទស្សន៍ណាហៅច្រៀង អ្នកស្រីសូ សាវឿន នឹងចូលរួម ។
អ្នកស្រីសូ សាវឿន មានពេលច្រើននៅកម្ពុជាគឺប្រហែលជា៦ខែឯណោះ ។ អ្នកស្រី សូ សាវឿន មានកូន៤នាក់ ក្នុងនោះស្រី១ ហើយអ្នកស្រីក្លាយខ្លួនជាស្ត្រីមេម៉ាយដោយស្វាមីលាចាកលោកនេះកាលពីជាងមួយឆ្នាំមុននេះ ។ បទចម្រៀងល្បីរបស់អ្នកស្រីសូ សាវឿន មានដូចជាបទ«ស្លៀកខ្យល់ដណ្តប់មេឃ» «លលកវាយំ» និងបទ«ស្ទឹងសែនប៉ារីស»ជាដើម ៕
ចែករំលែកព័តមាននេះ