ស្អុយណាស់ ! សូមអាជ្ញាធរខេត្តទៅជួយហិតផង
ខេត្តប៉ៃលិន ៖ បន្ទាប់ពីភ្លៀងធ្លាក់ជោកជាំស្ទើររាល់ថ្ងៃអស់រយៈពេលជាង១សប្តាហ៍ រហូតមកដល់ពេលនេះ ទឹកស្អុយសារធាតុពុលដំឡូងមី បានហូរចេញពីស្តង់មួយកន្លែងដែលមានយីហោ
ខេត្តប៉ៃលិន ៖ បន្ទាប់ពីភ្លៀងធ្លាក់ជោកជាំស្ទើររាល់ថ្ងៃអស់រយៈពេលជាង១សប្តាហ៍ រហូតមកដល់ពេលនេះ ទឹកស្អុយសារធាតុពុលដំឡូងមី បានហូរចេញពីស្តង់មួយកន្លែងដែលមានយីហោ «ក្រុមហ៊ុនខ្មែរវិនិយោគកសិកម្ម» ស្ថិតនៅភូមិកូនខ្លុង សង្កាត់អូរតាវ៉ៅ បានធ្វើឱ្យប៉ះពាល់យ៉ាងធ្ងន់ធ្ងរដល់ការរស់នៅរបស់ប្រជាពលរដ្ឋជាច្រើនគ្រួសារ រួមទាំងប៉ះពាល់ដល់វិហារអ៊ិស្លាម១កន្លែងផងដែរ ។
បញ្ហាក្លិនស្អុយនេះ ធ្វើឱ្យមនុស្ស ក្មេង ចាស់ ប្រុស ស្រី មានអាការឈឺក្បាល វិលមុខ និងខ្លះទៀតកើតជំងឺផ្តាសាយ រលាកបំពង់ក មើលមិនជាសះស្បើយនោះឡើយ ។ តែគេមិនធ្លាប់ឃើញមានអាជ្ញាធរ ឬមន្ត្រីនៃមន្ទីរបរិស្ថានណាម្នាក់ ចុះទៅត្រួតពិនិត្យរៀបចំដោះស្រាយជូនពួកគាត់នោះទេ ដោយចេះតែបណ្តែតបណ្តោយពីមួយថ្ងៃទៅមួយថ្ងៃធ្វើឱ្យប៉ះពាល់កាន់តែធ្ងន់ធ្ងររហូតដល់អ្នកខ្លះស្នាក់នៅក្នុងផ្ទះជួបជុំគ្រួសារលែងសុខសាន្តតទៅទៀត ។
ប្រភពព័ត៌មានពីបុរសម្នាក់ឈ្មោះ មហា ម៉ាត់ អាយុ៥៤ឆ្នាំ ជាខ្មែរអ៊ិស្លាម ដែលកំពុងស្នាក់នៅថែទាំព្រះវិហារ ក្បែរស្តង់ដំឡូងមីខាងលើ បានរៀបរាប់ឱ្យដឹងថា បន្ទាប់ពីភ្លៀងធ្លាក់ជាប់ៗគ្នាអស់រយៈពេលជាង១អាទិត្យនេះមក ធ្វើឱ្យសមាជិកព្រះវិហារខ្មែរអ៊ិស្លាម មានការលំបាកក្នុងការចូលរួមថ្វាយបង្គំព្រះ ។
លោកបន្តទៀតថា ជាពិសេសខណៈពេលដែលលោកគ្រូធំៗចង់មកពីភ្នំពេញចូលរួមថ្វាយបង្គំនៅទីនោះដែរ តែដោយសារធុំក្លិនស្អុយខ្លាំងពេក ក៏ប្តូរទៅកន្លែងផ្សេងវិញ ព្រោះខាងខ្មែរអ៊ិស្លាម ត្រូវការអនាម័យក្លិនក្រអូប មិនត្រូវការស្អុយបែបនេះទេ ។ លោកក៏មានសំណូមពរឱ្យអាជ្ញាធរភូមិ-សង្កាត់ ក្រុង-ខេត្តទាំងអស់ មេត្តាចុះទៅរៀបចំស្តង់ដំឡូងមីខាងលើ នេះឱ្យបានល្អផង កុំឱ្យទឹកស្អុយសារធាតុគីមីដំឡូងមីហូរទៅក្បែរព្រះវិហារពួកគាត់ថ្វាយបង្គំព្រះបន្តទៀត ។
ចែករំលែកព័តមាននេះ