ព្រះមហាក្សត្រអារ៉ាប៊ី សាអូឌីត អាប់ដាល់ឡាហ៍ កំពុងខិតខំបង្កើនការផ្តល់ជំនួយទប់ការឆ្លងរាលដាលនៃការបះបោរក្នុងពិភពអារ៉ាប់ ក៏ប៉ុន្តែពួកបញ្ញវ័ន្តចង់បានការកែទម្រង់ខាងនយោបាយ។
អារ៉ាប៊ី សាអ៊ូឌី បានតស៊ូដើម្បីឱ្យឃ្លាតពីការបះបោរតវ៉ា។ ខណៈដែលចលនាបាតុកម្មកំពុងមានការកើនឡើងក្នុងប្រទេសយេម៉ែន និងអូម៉ង់នៅជាប់ជិតខាង ព្រះមហាក្សត្រអាប់ដាល់ឡាហ៍បន្តចែកចាយប្រាក់ជាច្រើនពាន់លានដុល្លារដើម្បីសំរាលការមិនសប្បាយចិត្តដែលនៅបន្តក្នុងចំណោមពួកនិស្សិត និងពួកអ្នកគ្មានការងារធ្វើ។
កាលពីថ្ងៃទី២៧ កុម្ភៈ កន្លងមកនេះ ព្រះមហាក្សត្រអង្គនោះបានចេញបញ្ជាឱ្យពលរដ្ឋអារ៉ាប៊ី សាអ៊ូឌីត ដែលមានការងារបណ្តោះអាសន្នក្នុងផ្នែកសាធារណៈឱ្យទទួលបានតំណែងអចិន្ត្រៃយ៍មួយ។ ពួកអ្នកមានការងារបណ្តោះអាសន្នមានចំនួនប្រមាណជា៩០.០០០នាក់។ កាលពីសប្តាហ៍មុនព្រះចៅអាប់ដាល់ឡាហ៍បានចែកចាយរួចហើយនូវទឹកប្រាក់ជាង៣៥ពាន់លានដុល្លារជាជំនួយផ្សេងៗចំថ្ងៃដែលព្រះអង្គយាងចូលប្រទេសវិញ ក្រោយសំរាកព្យាបាលព្រះរោគ៣ខែនៅសហរដ្ឋអាមេរិក និងម៉ារ៉ុក។ ព្រះអង្គក៏លើកលែងទោសផងដែរដល់ពលរដ្ឋទាំងឡាយណាដែលទទួលទោសពីបទទាក់ទិននឹងហិរញ្ញវត្ថុ។ ព្រះអង្គបន្តថា ភាពក្រីក្រនៅតែមានក្នុងប្រទេសអារ៉ាប៊ី សាអូឌីត ទោះបីប្រទេសនេះជាអ្នកផលិតប្រេងធំជាងគេលើពិភពលោកក្តី។ បញ្ហាឥតការងារធ្វើរបស់កូនចៅយើងត្រូវយកចិត្តទុកដាក់ឱ្យខ្លាំង។ ការងារចំនួនជាង៤លានត្រូវបង្កើតក្នុងរយៈពេល១០ឆ្នាំខាងមុខទៀតដើម្បីផ្តល់ការងារដល់ប្រជាជនយើងចំនួន៦០%ដែលមានអាយុក្រោម២០ឆ្នាំ ៕
ចែករំលែកព័តមាននេះ