អ៊ុយក្រែនចូលរួមដញថ្លៃធ្វើសហម្ចាស់ផ្ទះ World Cup 2030 ជាមួយអេស្ប៉ាញ និងព័រទុយហ្គាល់
អ៊ុយក្រែន ៖ ប្រទេសអ៊ុយក្រែននឹងចូលរួមការដេញថ្លៃជាមួយប្រទេសអេស្ប៉ាញ និងព័រទុយហ្គាល់
អ៊ុយក្រែន ៖ ប្រទេសអ៊ុយក្រែននឹងចូលរួមការដេញថ្លៃជាមួយប្រទេសអេស្ប៉ាញ និងព័រទុយហ្គាល់ ដើម្បីធ្វើជាសហម្ចាស់ផ្ទះរៀបចំការប្រកួតព្រឹត្តិការណ៍បាល់ទាត់ពិភពលោក World Cup ផ្នែកបុរសសម្រាប់ឆ្នាំ ២០៣០។ ដោយប្រធានសហព័ន្ធកីឡាបាល់ទាត់នៃប្រទេសទាំង៣ បានប្រកាសគម្រោងនេះ នៅក្នុងសន្និសីទសារព័ត៌មានមួយក្នុងប្រទេសស្វីសកាលពីថ្ងៃទី៥ ខែតុលា ឆ្នាំ២០២២។
សហព័ន្ធបាល់ទាត់អេស្ប៉ាញ (RFEF) បានលើកឡើហនៅក្នុងសេចក្តីថ្លែងការណ៍មួយថា គម្រោងនេះមានគោលបំណងបំផុសសង្គមតាមរយៈកីឡាបាល់ទាត់ ដោយបង្ហាញអំពីសាមគ្គីភាព និងក្តីសង្ឃឹម។
លោក Luis Rubiales ប្រធានសហព័ន្ធបាល់ទាត់អេស្ប៉ាញ បានប្រាប់អ្នកយកព័ត៌មាននៅទីស្នាក់ការកណ្តាលសហព័ន្ធបាល់ទាត់ទ្វីបអឺរ៉ុប (UEFA) ក្នុងទីក្រុង Nyon យ៉ាងដូច្នេះថា «ខ្ញុំជឿថា សង្គមអេស្ប៉ាញទាំងមូលនឹងមានមោទកភាពចំពោះកេរដំណែលដ៏សំខាន់ ដែលការដេញថ្លៃនេះបន្សល់ទុកសម្រាប់ប្រវត្តិសាស្ត្រ។ យើងម្នាក់ៗតំណាងឱ្យប្រទេសរបស់យើងដោយឡែកពីគ្នា ប៉ុន្តែយើងរួមគ្នាតំណាងឱ្យអំណាចផ្លាស់ប្តូរដែលបាល់ទាត់មាននៅលើសង្គម»។
ចំណែកលោក Fernando Gomes ប្រធានសហព័ន្ធបាល់ទាត់ព័រទុយហ្គាល់ (FPF) បានបន្ថែមថា គម្រោងនេះត្រូវបានអនុម័តដោយរដ្ឋាភិបាលនៃរដ្ឋទាំង៣ ហើយត្រូវបានគាំទ្រដោយលោក Aleksander Ceferin ប្រធាន UEFA ផ្ទាល់តែម្តង។
សហព័ន្ធបាល់ទាត់ព័រទុយហ្គាល់ បានលើកឡើងនៅក្នុងសេចក្តីថ្លែងការណ៍របស់ខ្លួនថា «ឧទាហរណ៍នៃភាពអត់ធ្មត់ និងភាពធន់ដែលបង្ហាញដោយប្រជាជនអ៊ុយក្រែនគឺជាប្រភពនៃការបំផុសគំនិតនេះឡើង។ ហើយលក្ខខណ្ឌនៃសមាជិកភាពរបស់អ៊ុយក្រែននៃការដេញថ្លៃនេះ នឹងត្រូវបានពិភាក្សា និងកំណត់ក្នុងពេលសមស្រប»។
អេស្ប៉ាញ និងព័រទុយហ្គាល់បានសហការគ្នា និងរៀបចំការដេញថ្លៃរួមគ្នាធ្វើម្ចាស់ផ្ទះ World Cup 2030 អស់រយៈពេលជិត៣ឆ្នាំកន្លងមកហើយ។ ខណៈដែលលោក Andriy Pavelko ប្រធានសហព័ន្ធកីឡាបាល់ទាត់អ៊ុយក្រែន (UAF) ក៏មានវត្តមាននៅក្នុងសេចក្តីប្រកាសនេះផងដែរ៕ (ដកស្រង់ចេញពី Euronews)
ចែករំលែកព័តមាននេះ