កងកម្លាំងសន្តិសុខយេម៉ែនបានសម្លាប់មនុស្ស៥នាក់ និងបណ្តាលឱ្យមនុស្សច្រើនរយនាក់ទៀតរងរបួសនៅថ្ងៃទី២ នៃការបង្ក្រាបដោយហិង្សានូវបាតុកម្មប្រឆាំងរដ្ឋាភិបាល។ មនុស្សម្នាក់ក្នុងចំណោមអ្នកស្លាប់ទាំង៥នាក់នេះជាសិស្សសាលាអាយុ១៥ឆ្នាំ ។ ក្នុងការវាយប្រហារលើក្រុមបាតុករនោះកងកម្លាំងសន្តិសុខបានប្រើកាំភ្លើង និងឧស្ម័នបង្ហូរទឹកភ្នែក ជាការបង្ក្រាបយ៉ាងសាហាវមួយរបស់រដ្ឋាភិបាលក្នុងអំឡុងពេលនៃការធ្វើបាតុកម្មរយៈពេលមួយខែមកហើយទាមទារឱ្យលោកប្រធានាធិបតីអាលីអាប់ឌុលឡាហ៍ សាឡេហ៍ ចុះចេញពីតំណែងក្រោយពីកាន់អំណាចអស់រយៈពេល៣២ឆ្នាំមកហើយ ។
ការបង្ក្រាបដោយហិង្សានេះធ្វើឡើងមុនពេលព្រលឹមស្រាងៗ ថ្ងៃទី១៣ មីនា នៅទីលានកណ្តាលទីក្រុងសាណា រដ្ឋធានីយេម៉ែន ជាកន្លែងដែលបាតុករជាច្រើនពាន់នាក់បោះជំរំធ្វើបាតុកម្ម។ សាក្សីនិយាយថា កងកម្លាំងសន្តិសុខបានព័ទ្ធជុំវិញទីលាននោះដោយមានរថយន្តប៉ូលិស និងរថពាសដែកមុនពេលពាក់កណ្តាលអាធ្រាត្រ ហើយអំពាវនាវដល់បាតុករតាមរយៈម៉ាស៊ីនឃោសនាឱ្យបំបែកគ្នា ហើយវិលត្រឡប់ទៅផ្ទះវិញ ប៉ុន្តែទោះបីជាបែបណា ក្រុមបាតុករនៅតែមិនព្រមបំបែកគ្នា ធ្វើឱ្យកងកម្លាំងសន្តិសុខខឹងបាញ់រះទៅលើក្រុមបាតុករបណ្តាលឱ្យស្លាប់៥នាក់ និងច្រើននាក់ទៀតរងរបួស ។
ការវាយឆ្មក់បង្ក្រាបប្រឆាំងក្រុមបាតុករនៅទីលានក្នុងទីក្រុងសាណា ធ្វើឡើងក្រោយពីក្រុមបាតុករបដិសេធមិនព្រមបំបែកគ្នា ។ រដ្ឋមន្ត្រីការបរទេសអង់គ្លេស លោក William Hague បានចាត់ទុកការបង្ក្រាបដោយហិង្សាប្រឆាំងបាតុករនេះថា ជារឿងមិនអាចទទួលយកបានឡើយ ។ លោក William Hague ថ្លែងក្នុងសេចក្តីថ្លែងការណ៍មួយថា «ខ្ញុំមានការរន្ធត់ និងតក់ស្លុតយ៉ាងខ្លាំងចំពោះការបង្ក្រាបដោយហិង្សា ដែលមិនអាចទទួលយកបាននេះ ដែលកើតឡើងនៅក្នុងទីក្រុងសាណា»។ លោកថ្លែងទៀតថា ចក្រភពអង់គ្លេសនៅតែមានការព្រួយបារម្ភយ៉ាងខ្លាំង ចំពោះការប៉ះទង្គិចគ្នាម្តងហើយម្តងទៀត រវាងពួកបាតុករជាមួយប៉ូលិស ៕
ចែករំលែកព័តមាននេះ