ខេត្តស្វាយរៀង ៖ បុរសចំណាស់មួយរូបបានស្លា.ប់បាត់បង់ជីវិត ក្រោយពីគ្រូពេទ្យ សុវណ្ណរៀម ដាក់សេរ៉ូម និងចាក់ថ្នាំបានតែ១ថ្ងៃ ។ មុននេះ១ថ្ងៃ បុរសរូបនេះដែលមានអាការៈឈឺសន្លាក់ដៃជើង ក៏បានជិះម៉ូតូទៅពិគ្រោះជំងឺនៅបន្ទប់ពិគ្រោះជំងឺ សុវណ្ណ រៀម ស្ថិតក្នុងភូមិសៀម ឃុំស្ដៅកោង ស្រុកបាភ្នំ ខេត្តព្រៃវែង ។
តាមមន្ត្រីសមត្ថកិច្ចឲ្យដឹងថា ខណៈនោះគ្រូពេទ្យ សុវណ្ណ រៀម ឱ្យបុរសខាងលើនៅសម្រាកព្យាបាល១ថ្ងៃ និងបានដាក់សេរ៉ូមជាបន្តបន្ទាប់អស់់៤ប្លោក និងចាក់ថ្នាំចំនួន៤ម្ជុល ។ ក្រោយមក ស្រាប់តែអ្នកជំងឺមានប្រតិកម្មធ្វើទុក្ខខ្លាំង រហូតដកចង្កាមាន់លែងដឹងខ្លួនតែម្តង ទើបស្អែកឡើងគ្រូពេទ្យបានបញ្ជូនជនរងគ្រោះទៅមន្ទីរពេទ្យបង្អែកខេត្ត តែជាអកុសលជនរងគ្រោះបានស្លា.ប់នៅតាមផ្លូវ បាត់ទៅហើយ។
ពេលជនរងគ្រោះស្លា.ប់ គ្រូពេទ្យ សុវណ្ណ រៀម បានចរចាសម្របសម្រួលជាមួយគ្រួសារជនរងគ្រោះ ដោយផ្តល់ប្រាក់ចូលបុណ្យស.ពចំនួន១.០០០ដុល្លារ ដើម្បីបញ្ចប់រឿងកុំឱ្យមានប្ដឹងប្តល់ ។
ប្រភពដដែលបន្តថា បុរសចំណាស់ដែលស្លា.ប់នេះមានឈ្មោះ ហែម ភឿង អាយុ៥៦ឆ្នាំ រស់នៅភូមិត្របែក ឃុំស្តៅកោង ស្រុកបាភ្នំ ខេត្តព្រៃវែង បានស្លា.ប់នៅតាមផ្លូវ កាលពីរសៀលថ្ងៃទី២២ ខែកញ្ញា ឆ្នាំ២០២២កន្លងទៅ ។ រីឯម្ចាស់បន្ទប់ពិគ្រោះជំងឺខាងលើ ឈ្មោះ សុវណ្ណ រៀម ភេទប្រុស អាយុ៣៥ឆ្នាំ នៅភូមិសៀម ឃុំស្ដៅកោង ស្រុកបាភ្នំ ខេត្តព្រៃវែង ។
ប្រភពព័ត៌មានបានបញ្ជាក់ថា ជនរងគ្រោះមានជំងឺសន្លាក់ឆ្អឹងរ៉ាំរ៉ៃ ប៉ុន្តែមិនធ្ងន់ធ្ងរឡើយ គឺដើរបាន និងធ្វើការងារបានជាធម្មតា ពោលគឺគ្រាន់តែឈឺសន្លាក់ដៃជើងប៉ុណ្ណោះ ។ លុះនៅព្រឹកថ្ងៃទី២១ ខែកញ្ញា ឆ្នាំ២០២២ ជនរងគ្រោះបានជិះម៉ូតូទៅពិគ្រោះជំងឺនៅបន្ទប់ពិគ្រោះជំងឺ «សុវណ្ណរៀម» ហើយពេលនោះ គ្រូពេទ្យបានដាក់សេរ៉ូម និងចាក់ថ្នាំ ។
ទាក់ទិនករណីខាងលើនេះ សមត្ថកិច្ចមិនហ៊ានធ្វើការសន្និដ្ឋានថា តើមកពីកំហុសបច្ចេកទេស ឬប្រើប្រាស់ថ្នាំខុស ឬក៏ដាក់សេរ៉ូមលើស ឬមួយចាក់ថ្នាំលើសកម្រិតនោះទេ? ស្រាប់តែជនរងគ្រោះមានប្រតិកម្មខ្លាំងធ្វើទុក្ខធ្ងន់ ស្លឺភ្នែកលែងដឹងខ្លួន និងដកចង្កាមាន់តែម្តង។ លុះមកដល់ព្រឹកទី២២ ខែកញ្ញា ឆ្នាំ២០២២ គ្រូពេទ្យបានហៅរថយន្តសាមុយ មកដឹកជនរងគ្រោះចេញពីគ្លីនិករបស់ខ្លួន បញ្ជូនទៅមន្ទីរពេទ្យបង្អែកស្រុកបាភ្នំ ។
ប៉ុន្តែដោយឃើញអាការៈធ្ងន់ពេក ក៏ដឹកបន្តទៅមន្ទីរពេទ្យបង្អែកខេត្តព្រៃវែង ប៉ុន្តែក្រុមគ្រូពេទ្យបានបញ្ជូនបន្តទៅមន្ទីរពេទ្យកាល់ម៉ែតឯរាជធានីភ្នំពេញទៀត ។ ខណៈពេលនោះ គ្រូពេទ្យប្រាប់ថា អាការៈអ្នកជំងឺធ្ងន់ និងបាត់ចលនាជីពចរ អស់ហើយ មិនអាចសង្គ្រោះបានទេ ហើយក្រុមគ្រួសារក៏ដឹកអ្នកជំងឺត្រឡប់មកផ្ទះវិញ ។ លុះមកដល់ផ្លូវជាតិលេខ១ ក្នុងខណ្ឌច្បារអំពៅ នៅរសៀលថ្ងៃទី២២ ខែកញ្ញា ឆ្នាំ២០២២ដដែលនោះ អ្នកជំងឺក៏បានស្លា.ប់នៅលើរថយន្តតែម្ដង ។
ទាក់ទិនករណីនេះដែរ អ្នកយកព័ត៌មានយើងបានព្យាយាមសុំការបកស្រាយពីលោក សុវណ្ណ រៀម ម្ចាស់បន្ទប់ពិគ្រោះជំងឺខាងលើដែរ ប៉ុន្តែមិនអាចទាក់ទងបាន ។ ចំណែកលោក អ៊ូ ណារ៉ា ប្រធានការិយាល័យសុខាភិបាលស្រុកប្រតិបត្តិបាភ្នំ បានឲ្យដឹងថា ជនរងគ្រោះពិតជាទទួលការព្យាបាលពីបន្ទប់ពិគ្រោះជំងឺ សុវណ្ណ រៀមប្រាកដមែន ។
នៅរសៀលថ្ងៃទី៤ ខែតុលា ឆ្នាំ២០២២ នគរបាលប៉ុស្តិ៍ឃុំស្តៅកោង បានឲ្យដឹងថា ក្រោយពីមានអ្នកសារព័ត៌មានចុះផ្សាយ លោកប្រធានមន្ទីរសុខាភិបាលខេត្តព្រៃវែង បានដឹកនាំកម្លាំងចុះទៅបិទបន្ទប់ពិគ្រោះជំងឺ សុវណ្ណ រៀម ហើយ កាលពីថ្ងៃទី២៨ ខែកញ្ញា ឆ្នាំ២០២២ ។ ប៉ុន្តែមហាជននៅតែមិនអស់ចិត្ត ដោយលោកប្រធានមន្ទីរសុខាភិបាលខេត្ត មិនបានដាក់ទណ្ឌកម្មផ្លូវច្បាប់ទៅលើគ្រូពេទ្យ សុវណ្ណ រៀម ហើយគ្រួសារជនរងគ្រោះទទួលបានត្រឹមតែប្រាក់ចូលបុណ្យស.ពចំនួន១.០០០ដុល្លារ ដើម្បីបញ្ចប់រឿង៕
ចែករំលែកព័តមាននេះ